E Fesoasoani le Tusi Paia i Lau Faaipoipoga

O NISI e maua o latou lagona fiafia pe a taʻua le upu faaipoipoga. Ae i nisi o se mea faatigā loto. Na auē mai se tasi o avā e faapea: “Ua ou lagona e pei lava o lea ua tatala laʻu faaipoipoga. Ua ou lagona le teena ma le tuua toʻatasi i taimi uma.”

Aiseā ua leai ai se lagona alofa lea na māfua ai e ni tagata se toʻalua ona taʻutino e alofa ma faapelepele le tasi i le isi? O se tasi o vala, o le lē lava lea ona aʻoaʻoina po o le ā e aofia ai i le faaipoipoga. Ua mātauina e se tasi o tusitala e faapea: “Ua tatou faaipoipo e aunoa ma le aʻoaʻoina po o le ā lenā mea.”

Na faamaonia e suʻesuʻega na faia e Saʻiliʻiliga Tau i Faaipoipoga Faalemalo a le Iunivesite o Rutger i New Jersy i Amerika e faapea, e toʻaitiiti lava tagata ua iai so latou malamalamaaga e faatatau i faaipoipoga. Ua tusi mai le ʻaufaatonu o lenei saʻiliʻiliga e faapea: “O le toʻatele o i latou na suʻesuʻeina na ola aʻe i se aiga e leaga va o mātua po o le teteʻa foʻi o mātua. Ua latou iloa tonu lava le mea ua taʻua o le faaipoipoga lē manuia, peitaʻi latou te lē o mautinoa pe faapeī se faaipoipoga taulau manuia. E mafai ona manatu nisi o le faaipoipoga e taulau manuia lea ‘e tuufaafeagai ma le faaipoipoga a oʻu matua.’”

Pe o saʻoloto mai Kerisiano i faafitauli tau i le faaipoipoga? E leai. O le mea moni, sa tatau ona avatu i nisi Kerisiano i le uluaʻi senituri fautuaga patino faapea ia ‘aua le saʻili ina ia tatalaina’ a latou faaipoipoga. (1 Korinito 7:27) E manino so o se faaipoipoga lava a ni tagata lē lelei atoatoa se toʻalua e iai lava faafitauli, peitaʻi, ua iai so tatou fesoasoani. E mafai ona faaleleia e tane ma avā a latou faiā e ala i le faatatauina o mataupu silisili a le Tusi Paia.

Ioe, o le Tusi Paia ua lē o se tusi ua fuafuaina e na o faatonuga mo faaipoipoga. Ae talu ai na faagaeeina e Lē na amataina faatulagaga faalefaaipoipoga, tatou te faatalitalia ai la le aogā o ana mataupu silisili. Na fetalai Ieova e ala i le perofeta o Isaia e faapea: “O aʻu o Ieova, o lou Atua, o loo aʻoaʻo iā te oe i mea e aogā, o loo taʻitaʻiina oe i le ala e te ui ai. E! ana uaʻi mai ou taliga i aʻu poloaʻiga, po ua tusa ma se vaitafe lou manuia; ma lau amiotonu, e tusa lea ma peau o le sami.”​—Isaia 48:17, 18.

Pe ua amata ea ona mou atu le alofa lea sa iā oulua ma lau paaga? Pe ua e lagona ua saisaitia oe i se faaipoipoga e aunoa ma se alofa? Na faapea mai se avā na faaipoipo mo le 26 tausaga: “E matuā faigatā lava ona faamatalaina le tigā e maua mai i lenei ituaiga o faiā. E tumau ma faaauau pea lava pea.” Na i lo lou onosaia ma le loto tigā se faaipoipoga e lē mafai ona faamalieina ou manaʻoga, aiseā e lē filifili ai e faia se gaoioiga e faatatau i ai? O le a faailoa atu e le mataupu o loo sosoo mai i tane ma avā, le auala e fesoasoani ai mataupu silisili o le Tusi Paia i a latou faaipoipoga i se vala autū​—o le maumauaʻi ia tausia ma faasaoina le faaipoipoga.