Lipoti a Ē Faalauiloa le Malo

Tatala Maota o le Malo i so o se Tasi

A O TOLENIINA e Iesu ona soo mo le galuega talaʻi, na ia faalaeiau i latou e “talaʻi atu i luga o fale.” (Mataio 10:27) Ioe, sa tatau ona faatinoina i lumamea la latou faiva faa-Kerisiano, ina ia iloa uma atu e tagata. I le faatatauina o le timaʻiga a Iesu, ua faatino ai foʻi e Molimau a Ieova la latou galuega i le lautele. O le faia faapea ua manumalo ai Molimau a Ieova mai teteega ma ua faaaloalogia ai i latou.

E ui lava e talia so o se tasi i sauniga a faapotopotoga a Molimau a Ieova, ae ua faatalatū isi e ō atu i Maota o le Malo talu ai faamatalaga sesē taufaaleaga i Molimau. Na tupu lenā mea i Finilani. E faatalatū nisi tagata e asiasi atu i ni nofoaga fou. Pe a uma le fausiaina po o le toe faafouina o se Maota o le Malo, e masani lava ona fuafua e tatala mo ē fia maimoa. Atonu e faia ni asiasiga faapitoa e valaaulia ai tuaoi e ō mai e maimoa i le Maota o le Malo, ma faamasani ai i Molimau a Ieova.

I se tasi o vaipanoa, sa fuafua ai e Molimau a Ieova le ofoina o mekasini i le aso lava lea o le a tatala ai le Maota fou o le Malo mo tagata maimoa. Na feiloaʻi ni Molimau se toʻalua ma se tamā o lē na faapea mai e fiafia tele e faitau mekasini o le Olomatamata ma le Ala Mai! Na la ofoina atu e la te momoliina o ia e maimoa i le Maota fou o le Malo ua faatoʻa tatala. Na tali mai ma le fiafia si toeaina. Ma na faapea mai foʻi le toʻalua o le toeaina, o lē na faalogologo ifo i le talanoaga: “Ou te fia alu foʻi aʻu!”

A o ulufale atu i le Maota o le Malo, na faapea le tala a le toeaina: “Auoi, e lē pogisa. Oka se fale inā matagofie ma malamalama. Na fai mai isi tagata e pogisa Maota o le Malo!” Na maimoa solo lenei ulugalii, ma na la talosaga foʻi mo ni a la lomiga o mekasini.

Sa mananaʻo se tasi faapotopotoga e faasalalau i le nusipepa le aso e faapaiaina ai lo latou Maota fou o le Malo ma o le a tatalaina foʻi mo ē fia maimoa. Ina ua maua tala e faatatau i lenā mea, sa manatu ai loa le faatonu o se nusipepa e lelei pe a tusia se faamatalaga e uiga i lenā aso. Na malilie i ai le ʻauuso, ma mulimuli ane na lomiaina ai e lenā nusipepa se faamatalaga na taʻuleleia ai le ʻauuso, atoa ai ma mea na tutupu i lenā aso faapea foʻi ma meafai a le faapotopotoga o Molimau a Ieova i lenā vaipanoa.

Na feiloaʻi se tuafafine Molimau a Ieova i se tasi o ona tuaoi sa faitauina le faamatalaga na tusia i le nusipepa, ma sa ia faapea mai: “O le manaia ia o le tala a le nusipepa i le asō e uiga i Molimau a Ieova!” Sa mafai loa ona talaʻi atu i ai le tuafafine ma tuu iai le polosiua Jehovah’s Witnesses in the Twentieth Century.

O fuafuaga faapenei e pei o le tatalaina ma le faapaiaina o Maota fou o le Malo, e lē gata e faasaʻo ai manatu sesē o tagata e faasaga i Molimau a Ieova ae ua faagaeetia ai foʻi le ʻautalaʻi e valaaulia tagata i sauniga. Ioe, ua iloa e tagata i le tele o atunuu e aofia ai foʻi ma le atunuu nei o Finilani, o Maota o le Malo o Molimau a Ieova, e tatala mo so o se tasi.