Aiseā e Faigatā Tele ai Ona Faatoese Atu?

IĀ IULAI 2000, na pasia ai e le Fono Faitulafono i Kalifonia i le Iunaite Setete, se tulafono e tuusaunoa ai tagata mai se faasalaga pe afai e latou te faatoese atu i se tasi na afāina i se faalavelave na faapogaia ona o i latou. Aiseā ua faia ai sea tulafono? Sa mātauina e faapea, pe a faamanuʻalia se tasi pe faaleagaina ni mea ona o se faalavelave faafuaseʻi, e masani lava ona lē fia ō atu tagata e faatoese ona o le fefefe ina neʻi molia i le tulafono e faapea ua nofosala. I le isi itu, o le a lē fiafia tagata ia e manatu sa tatau ona vave faatoese atu iā i latou, ma avea ai ma faafitauli telē se faalavelave faatauvaa.

O le mea moni, e lē talafeagai ona faatoese atu mo se faalavelave e lē o oe na mafua ai. Ma i nisi taimi, e tatau ona e faautauta i upu e te fai atu ai. Ua faapea mai se faataoto anamua: “O le tele o upu e lē oge solitulafono ai; a o lē ua taofi ona laugutu, o le tagata poto lea.” (Faataoto 10:19; 27:12) Peitaʻi, e mafai lava ona e faaalia le faaaloalo ma avatu le fesoasoani.

Pe e lē moni ea e tusa lava pe e lē molia ai i le faamasinoga, ae o le toʻatele o tagata e lē fia faatoese atu? E ono tagi  talatala mai se avā, ‘E lē taitai lava ona faatoese mai laʻu tane i se mea sesē na te faia.’ Atonu e faitio mai se pule i le galuega e faapea, ‘E lē ioeina e aʻu tagata faigaluega a latou mea sesē e fai, ma e seāseā foʻi ona latou faamalie mai mo a latou mea sesē.’ I le aʻoga, e ono lipotia mai e se faiaʻoga e faapea, ‘E lē o aʻoaʻoina tamaiti e faapea mai, faamalie atu, pe tulou lava.’

O se tasi o māfuaaga e faatalatū ai se tagata e faatoese atu, atonu ona o le fefe ina neʻi teena. Ua popole i le manatu ina neʻi teena ma le faasausili, ma lē mafai ai ona ia faamatala atu ona lagona moni. O le mea moni, atonu e matuā lē fia pupula mai lava le tagata lea na manuʻa i lē na manuʻa ai, ma matuā faigatā ai ona faia se faaleleiga.

O le lē manatu mamafa i faalogona o isi tagata, o le isi lea māfuaaga ua faatalatū ai nisi e faatoese atu. Atonu e manatu i latou, ‘O le faatoese atu o le a lē faaleleia ai le mea sesē lea na ou faia.’ Ona o iʻuga e oo mai ai, ua faatalatū ai pea nisi e faamalie atu e tusa ma so latou sesē. Ua latou manatu e faapea, ‘Po o le a tuuaʻia aʻu ma faapea mai ou te totogia se mea na faaleagaina?’ Ae peitaʻi, o le faamaualuga, o le toʻatugā sili lea i le ioeina o se mea sesē na fai. O se tagata e faamaualuga tuʻuvale e faigatā ona faapea atu, “Faamolemole ua ou sesē” ona o le manatu, ‘Ou te lē fia toʻilalo. O le a taʻu faatauvaaina ai loʻu tulaga.’

Po o le ā lava le māfuaaga, e matuā faigatā lava i le toʻatele ona faatoese atu. Ae, po o se mea tatau ona faatoese atu? O ā aogā e maua ona o le faatoese atu?

[Ata i le itulau 3]

“E lē o aʻoaʻoina tamaiti e faapea mai, faamalie atu, pe tulou lava”

[Ata i le itulau 3]

“E lē ioeina e aʻu tagata faigaluega a latou mea sesē e fai”

[Ata i le itulau 3]

“E lē taitai lava ona faatoese mai laʻu tane i se mea sesē na te faia”