Tauaofiaga Faavaomalo i le 2003

I LE Aso Toonaʻi o Oketopa 6, 2001, na faia ai le fonotaga faaletausaga a sui o le Watch Tower Bible and Tract Society of Pennsylvania i Jersey City, i New Jersey, i le Iunaite Setete o Amerika. Ina ua māeʻa lenā fonotaga, sa olioli ai sui ma a latou mālō i se polokalame faapitoa. I le aso na sosoo ai, na faia ai fonotaga faaopoopo i aai e fā i Kanata ma le Iunaite Setete, ma ina ua uma le lauga faaiʻu, na faia ai e sui o le Vaega Pule o Molimau a Ieova le faasilasilaga lenei:

“A o tatou vaavaai atu i le lumanaʻi, e matuā tāua tele mo tagata uma o le Atua ona aua neʻi lafoaʻiina le faapotopotoina o i latou. Na apoapoaʻi mai le aposetolo o Paulo e faapea, o lenei mea, atoa ma le faamalosiau o le tasi i le isi, ua tatau ona atili ai ona faia faapea auā ua tatou iloa ua matuā lalata mai lava le aso tele ma le mataʻutia o Ieova. (Eperu 10:24, 25) I le ōgatasi ai ma lenei poloaʻiga faale-Tusi Paia, ua iā i matou ai le faamoemoe e faia ni tauaofiaga itumalo i tuluʻiga uma o le lalolagi i le tausaga o le a sau [2002]. Ma i le tausaga e 2003, pe a tusa ai ma le finagalo o Ieova, atonu o le a mafai ai ona faia ni tauaofiaga faapitoa faavaomalo i nisi o vaega o le lalolagi. O le taimi lenei ia mataalia ai ma ia faaauau pea ona mataala, i le mātauina o le auala o loo tutupu ai mea i le lalolagi.”

E ui lava i le tuputupu pea o le lē mautonu ma feteenaʻiga a o lalata atu lenei faiga o mea i lona iʻuga, e tatau ona agaʻi i luma le galuega a tagata o le Atua. E tatau ona folafola atu le tala lelei o le Malo e aofia ai ma le feʻau lapataʻi, i atunuu uma, ituaiga, gagana, ma tagata uma, ma uunaʻia i latou ia ‘matatau i le Atua, ma avatu ia te ia le viiga, aua ua matuā lalata mai lava le itu aso o lana faamasinoga.’ (Faaaliga 14:6, 7) O lea la, pe a tusa ai ma le finagalo o lo tatou Tamā faalelagi ma lona agalelei, ua fuafuaina ai e faia ni tauaofiaga faavaomalo i vaega eseese o le lalolagi i le tausaga e 2003.

Ina ia amata ai, ua fuafuaina ni tauaofiaga mo ni nai aai e lē o mautinoa i le taimi nei i Amerika i Mātū, ona sosoo ai lea ma Europa. I se taimi mulimuli ane o le tausaga e 2003, o le a fuafuaina ai ni vaega o sui usufono e faimalaga atu i nisi o aai i Asia; ma i le agaʻi atu i le faaiʻuga o le tausaga, o le a malaga atu ai nisi vaega i Aferika, Amerika i Saute, ma vaipanoa o le Pasefika. O le a talosagaina nisi o lālā ina ia aauina atu ni aofaʻiga faatapulaaina o sui usufono i nofoaga patino e faia ai tauaofiaga, o lea, o le a lē mafai ona valaaulia tagata uma e auai. Ae peitaʻi, o le a avea ma se faalaeiauga le iai o se vaega faatapulaaina o sui usufono e fai ma sui o atunuu eseese i nofoaga taʻitasi.

Ua lē pine ona maua lea e faapotopotoga taʻitasi o Molimau a Ieova ni faamatalaga e faatatau i nei tauaofiaga. O le a avatu ai foʻi e ala atu i o latou lālā ia faamatalaga e uiga i aso tonu ma nofoaga patino o le a mafai ona auai ai ia sui usufono o loo valaaulia. I lea, e talosaga atu ai, e aua e te tusi atu pe e te fesili atu foʻi e uiga i lenei mataupu i le taimi nei.

O i latou o le a filifilia mulimuli ane e avea ma sui usufono, o le a faatapulaa mai i Molimau ua tuuina atu ma papatisoina, o ē o le a avea ma faaaʻoaʻoga lelei ma faaalia le alofa māfana faaleuso i le ʻauuso i na atunuu. I lea, o le a maua foʻi e uso i atunuu na ni avanoa lelei e faaali atu ai i sui usufono le alofa māfana ma le agaga talimālō moni. (Eperu 13:1, 2) O lenei mea, o le a mafai ona ‘fefaamafanafanai ai.’ (Roma 1:11, 12) O nisi faamatalaga atili e uiga i nei fuafuaga, o le a avatu i lālā ia ua valaaulia ina ia aauina atu ni sui usufono i se atunuu po o ni atunuu faapitoa.

O tauaofiaga itumalo e tolu aso mo le tausaga e 2003, o le a fuafuaina i le tele o atunuu e pei lava ona masani ai. O le faapotopoto faatasi, o le a maua ai e tagata uma lava le avanoa e ‘faalogo ai, aʻoaʻo, ma faamāfanafanaina ai.’ (Teuteronome 31:12; 1 Korinito 14:31) O lenei fuafuaga, o le a mafai ai e tagata uma o le Atua ona maua se avanoa e ‘tofotofo ai ma iloa e lelei Ieova.’ (Salamo 34:8) I tauaofiaga faavaomalo uma faapea ma le tele o tauaofiaga itumalo, o le a auai ai ia misionare, o nisi o i latou o le a fai se vaega i le polokalame.

A o faagasolo lenei tausaga e 2002, o le a tatou olioli ai i le Tauaofiaga Itumalo, “O Ē Maelega e Faalauiloa le Malo” lea o le a uunaʻia ai i tatou ina ia avatu se molimau e sili atu. A o tatou faia lenei mea, e mautinoa o le a faateleina lo tatou naunau e vaavaai atu i luma mo mea o loo teuina e Ieova mo i tatou i le tausaga o loo fotuaʻi mai. O le a fesoasoani lenei mea iā i tatou e ‘tumau ai pea ona tatou mataala, leoleo, ma nofo sauni ai’ ona o nei taimi ua faigatā ma tele mea mataʻutia o loo tutupu ai.—Mataio 24:42-44.