Pe e Tatau Ona E Saʻiliʻili Atu i Isi Lotu?

UA FAAPEA mai Miguel, o lē ua avea nei ma Molimau a Ieova i Amerika i Saute: “Sa ou auai i sauniga faa-Kerisiano mo le toetoe lava atoa le tausaga, ma sa ou fiafia e taʻu atu i isi e uiga i le Malo o le Atua. Ona amata loa lea ona ou faalogologo i polokalame faalelotu i le leitiō ma matamata i failauga faalelotu o talaʻi mai i le televise. Sa ou manatu e faapea, o le a fesoasoani mai na polokalame ia te aʻu ou te malamalama lelei ai i tagata o isi lotu. Sa ou iloa le lē ōgatusa o a latou aʻoaʻoga ma le Tusi Paia, ae sa ou fia iloa lava.”

I le nuu lava lea, sa maelega ai Jorge i le aʻoaʻoina o isi e uiga i le tapuaʻiga moni. Peitaʻi, i se tasi taimi, na amata ai foʻi ona ia faalogologo i polokalame faalelotu i le leitiō ma le televise. Sa masani lava ona ia faapea mai: “E manaʻomia ona e iloa po o ā manatu o isi tagata.” Ina ua fesili atu i ai e uiga i lamatiaga e ono iai ona o le faalogologo i na aʻoaʻoga sesē, ae tali mai o ia e faapea: “E leai se mea e mafai ona faavaivaia ai le faatuatua o se tasi ua iloa le upu moni o le Tusi Paia.” O nei mea tutupu ua lāgā ai se fesili tāua, Pe e atamai le faalogologo i mea e talitonu i ai isi?

Iloaina o le Faa-Kerisiano Moni

Ina ua maliliu le ʻauaposetolo, sa oo ai ina filogia le tapuaʻiga moni i aʻoaʻoga auiluma a le tele o ituaiga o Faa-Kerisiano pepelo. I le muaʻi silafia o lenei mea, na faailoa mai ai e Iesu le tasi o auala e iloa ai le eseesega o le Faa-Kerisiano moni mai le Faa-Kerisiano pepelo. Muamua lava, na ia lapataʻi mai: “Ia outou ma perofeta pepelo, o e o mai ia te outou i ofu faamamoe, a o totonu o luko feai lava i latou.” Ona ia faaopoopo atu lea: “Tou te iloa i latou i o latou fua.” (Mataio 7:15-23) Ua faatino e soo o Iesu mea na ia aʻoaʻo atu, ma e faigofie lava ona iloa i latou i fua lelei latou te fuaina mai. E pei ona sa faia e Iesu lava ia, e latou te asiasi atu i tagata e  faamatala atu i ai le Malo o le Atua mai le Tusi Paia. I le mulimuli i le faaaʻoaʻoga a Iesu, e latou te tutū ese ai mai faiga faapolotiki ma feteenaʻiga lautele a le lalolagi. E latou te talia le Tusi Paia o le Afioga a le Atua ma faaaloalo i ai o le upu moni lea. E latou te faalauiloa atu le suafa o le Atua. Ma talu ai latou te tauivi ina ia faatino le alofa ua aʻoaʻo mai e le Atua, e latou te lē auai i taua. Na i lo o lea, e fealofani i latou i le avea o se ʻauuso.—Luka 4:43; 10:1-9; Ioane 13:34, 35; 17:16, 17, 26.

E tusa ai ma le Tusi Paia, e mafai lava ona “iloa . . . e eseese le amiotonu ma le amio leaga; e ese le ua auauna i le Atua, ma le ua le auauna ia te ia.” (Malaki 3:18) O tagata tapuaʻi moni i aso nei e autasi i manatu ma galuega, e pei lava ona sa iai i Kerisiano o le uluaʻi senituri. (Efeso 4:4-6) O le taimi lava e te iloa ai lena vaega o Kerisiano moni, aiseā e te fia suʻesuʻe ai fua pe fia iloa e uiga i talitonuga o isi lotu?

Ia Faaeteete i Aʻoaʻo Pepelo

Ua faailoa mai e le Tusi Paia e faapea e tusa lava po ua uma ona aʻoaʻoina upu moni o le Tusi Paia, e iai lava le lamatiaga i le faaleagaina faaleagaga mai aʻoaʻoga sesē. Na lapataʻi mai le aposetolo o Paulo: “Ia outou, neʻi faatagataotauaina outou e se tasi i le poto le aoga e faasese ai, e tusa ma le uputuu a tagata, e tusa ma mataupu muamua a le lalolagi, a e le tusa ma mataupu a Keriso.” (Kolose 2:8, LT) Pagā se ata manino ua faailoa mai e lenei mau! I le pei o manu feʻai e mananaʻo e ave oe ma ʻai, e mafai foʻi la e aʻoaʻoga a aʻoaʻo pepelo ona e oo ai i se tulaga lamatia moni lava.

E moni, sa mātauina e Paulo mea na talitonu i ai isi. Sa iai sana lauga na faatomuaina e ala i lona faapea atu: “O outou Atenai e, ua ou iloa i mea uma lava ua sili la outou tapuai i atua. Aua na ou ui ane, ma ou matamata i a outou mea paia, ona ou iloa atu lea o le fata ua tusi i ai, mo le Atua e le iloa.” (Galuega 17:22, 23) Ae peitaʻi, sa leʻi fafagaina pea lava pea e Paulo lona mafaufau i filosofia a failauga popoto o Eleni.

E ese le iloa e uiga i le pogai ma aʻoaʻoga a lotu sesē, ae ese foʻi le fafagaina ai o oe i na mea. * Ua tofia e Ieova “le auauna faamaoni ma le mafaufau” na te saunia aʻoaʻoga e faavae i lana Afioga. (Mataio 4:4; 24:45) Na tusia e Paulo lava ia e faapea: “Tou te le mafaia ona faatofutofusia i le laoai a le Alii [o Ieova] atoa ma le laoai a temoni. Tatou te faaonoono ea i le Alii?”—1 Korinito 10:20-22.

O nisi o aʻoaʻo pepelo atonu sa avea muamua ma Kerisiano moni, ae na iai se taimi na liliu ese ai mai le upu moni i le upu sesē. (Iuta 4, 11) E lē o se mea lenei tatou te ofo ai. Ina ua uma ona talanoa e uiga i le “auauna faamaoni ma le mafaufau” o ē fai ma sui o Kerisiano faauuina, ona talanoa loa lea o Iesu e uiga i le “auauna leaga,” o se vasega e faitio e faapea, “ua faatuai mai loʻu matai,” ma amata ona fafasi i ona uso a auauna. (Mataio 24:48, 49) E masani lava, o nei tagata ma o latou soo e leai ni a latou lava aʻoaʻoga manino; e pau lava le mea e fiafia i ai i latou o le faaumatia lea o le faatuatua o isi. O lea na tusi ai le aposetolo o Ioane e faatatau ia i latou: “Pe a alu atu ia te outou se tasi a e le molia lenei lava aʻoaʻoga, aua tou te talia o ia i o outou fale, aua foi tou te ofo alofa ia te ia.”—2 Ioane 10; 2 Korinito 11:3, 4, 13-15.

O tagata lotofaamaoni o ē o loo saʻili mo le upu moni, e lelei mo i latou ona iloilo ma le faaeteete mea o latou faalogologo i ai mai lotu eseese. I se taimi, o le a faamanuia ai e le Atua tagata lotofaamaoni o ē o loo saʻili i le upu moni. Ua faapea mai le Tusi Paia e uiga i le poto faaleatua: “Afai e te sailiili ia te ia, e pei ona sailiili i le ario; afai e te suesue i ai, pei ona suesue i le oloa lilo; ona e . . . maua ai [o] le poto i le Atua.” (Faataoto 2:4, 5) I le mauaina o lenei poto i le Atua e ala i le Tusi Paia ma le faapotopotoga Kerisiano, ma i le vaai atu i le auala o loo faamanuia ai e Ieova i latou o loo taʻitaʻiina e lena poto, e lē sāga faaauau ai pea la e Kerisiano moni ona faalogologo i aʻoaʻoga sesē faalelotu.—2 Timoteo 3:14.

[Faamatalaga pito i lalo]