Pe E te Manatua?

Pe na e talisapaia le faitauina o lōmiga talu ai nei o Le Olomatamata? Seʻi vaʻai la pe mafai ona e taliina fesili o loo mulimuli mai:

• O le ā na faafaigofie ai ona taliaina e Korea le Kirisimasi?

Sa iai se talitonuga ua leva lava i Korea faapea foʻi i isi atunuu e faatatau i se atua o le umukuka o lē na manatu i ai e sau mai i le alāasu ma aumai meaalofa ia Tesema. E lē gata i lena, ina ua mavae le Taua Lona Lua a le Lalolagi, na tufatufa atu ai e fitafita a le Iunaite Setete meaalofa ma fesoasoani i falesā i lena lava vaipanoa.—12/15, itūlau 4, 5.

• I le faataunuuga o le Isaia 21:8, o ai le “tagata vaai” a le Atua o loo iai i o tatou taimi?

O Kerisiano faauuagagaina, o loo auauna o se vasega o le tagata vaʻai, ua latou lapataʻia tagata e faatatau i le uiga o mea o loo tutupu i le lalolagi lea o loo faataunuuina ai valoaga o le Tusi Paia. Ua latou fesoasoani foʻi i tagata aʻoga o le Tusi Paia ina ia mātaulia ma ʻalofia aʻoaʻoga ma gaoioiga e lē faale-Tusi Paia.—1/1, itūlau 8, 9.

• O ai le “ʻAuuso Polani”?

O i latou o se vaega faalotu toʻalaiti i senituri lona 16 ma le 17 i Polani o ē na faalāʻeiʻauina le tausisi atu i le Tusi Paia ma ia teʻena ai talitonuga taatele faalotu, e pei o le Tasitolu, papatisoga o pepe, ma le afi i seoli. Mulimuli ane, na matuā sauāina i latou ma faamālosia ai ona taapeape atu i isi atunuu.—1/1, itūlau 21-23.

• Aiseā e ao ai ona maufaatuatuaina valoaga o le Tusi Paia na i lo valovaloga a saienitisi po o i latou e sāʻili atu i faailoga i fetu?

O tagata ua fia pei o ni perofeta ua faamaonia lo latou lē maufaatuatuaina auā latou te lē amanaʻia Ieova ma le Tusi Paia. E na o valoaga o le Tusi Paia e mafai ona fesoasoani ia te oe ina ia e iloa le auala e fesootaʻi ai mea tutupu ma le fuafuaga a le Atua, e maua ai aogā tūmau e oe ma lou ʻāiga.—1/15, itūlau 3.

• O ā nisi o faamaoniga e faamautinoa ai ua tatou ola i aso e gata ai?

Ua mafai ona tatou vaʻaia āuga o le lafoeseina mai o Satani mai le lagi. (Faaaliga 12:9) Ua tatou ola i taimi o le “tupu” mulimuli o lo taʻua i le Faaaliga 17:9-11. Ua faaitiitia le numera o Kerisiano moni ua faauuina, e ui i lea, e foliga mai o le a totoe pea nisi o i latou i le lalolagi i le taimi e amata ai le puapuaga tele.—1/15, itūlau 12, 13.

• O anafea na tusia ai le tusi o Sapakuka, ma aiseā e ao ai ona tatou naunau i ai?

O lenei tusi na tusia pe tusa o le 628 T.L.M. O loo aumaia ai faamasinoga a Ieova faasaga ia Iuta ma Papelonia anamua. O loo faailoa mai ai foʻi le faamasinoga tauatua ua lē o toe umi ae oo mai i le faiga amioleaga o mea o loo iai nei.—2/1, itūlau 8.

• O gafea o le Tusi Paia e mafai ona tatou maua ai fautuaga atamai a se tinā mo avā lelei?

O le matāʻupu mulimuli o le tusi o Faataoto, matāʻupu e 31, o se puna sili lea ona lelei o fautuaga faapena.—2/1, itūlau 30, 31.

• Aiseā e mafai ai ona tatou lotofaafetai ona ua faaalia mai e Ieova “le finagalo o Keriso” ia i tatou? (1 Korinito 2:16)

E ala mai i faamaumauga a Evagelia, ua saunia ai e Ieova le avanoa tatou te aʻoaʻoina ai manatu o Iesu, o faalogona, o galuega, ma mea na ia faamuamua. Ua mafai e lenei mea ona fesoasoani ia i tatou ina ia atili ai ona pei o Iesu, ae maise lava i le faatāua o loo tatou avea i le galuega talaʻi faasaoola.—2/15, itūlau 25.

• Pe e tali mai le Atua i tatalo i aso nei?

Ioe. E ui o loo faaalia mai e le Tusi Paia faapea e lē talia e le Atua tatalo uma, ua faamaonia e mea tutupu i aso nei faapea e masani ona ia tali mai i tagata latou te tatalo atu mo faamāfanafanaga ma le fesoasoani i matāʻupu e pei o le foʻia o faafitauli tau le faaipoipoga.—3/1, itūlau 3-7.

• O le ā e mafai ona tatou faia ina ia maua le mālosi mai le Atua?

E mafai ona tatou ōle atu i ai i le tatalo, maua le mālosi faaleagaga mai le Tusi Paia, ma ia maua le mālosi e ala i auaufaatasiga faa-Kerisiano.—3/1, itūlau 15, 16.

• E mafai faapēfea e mātua ona fesoasoani i a latou fanau ina ia maua atili ni aogā i sauniga faa-Kerisiano?

E mafai ona latou fesoasoani i a latou fanau ina ia tūmau ona ala pea, atonu e ala i le muaʻi faamomoe ae leʻi oo i taimi o sauniga. E mafai ona faalāʻeiʻau fanau ina ia faia “faamaumauga,” e pei o le makaina o le pepa i taimi taʻitasi e faaaogā ai ni upu po o ni igoa e masani ai.—3/15, itūlau 17, 18.

• O ā nisi o mea e mafai ona tatou aʻoaʻoina mai le faataʻitaʻiga a Iopu?

Na faamuamua e Iopu le la faiā ma le Atua, sa lē faailoga tagata i le feagai ai ma uso a tagata, sa tauivi e faamaoni i lana pāʻaga faaipoipo, faaalia le manatu mamafa mo le itu faaleagaga o lona ʻāiga, ma tūmau ma le faamaoni i tofotofoga.—3/15, itūlau 25-27.

• Pe e iai se feʻau faalilolilo o loo i le Tusi Paia e mafai ona faamalamalama aʻi ni feʻau o loo nātia ai?

Leai. O faamatalaga e faatatau i se feʻau faalilolilo e mafai foʻi ona faia faasaga i nisi o tusi a le lalolagi. E faalēaogāina na feʻau o loo faapea o loo iai i le Tusi Paia ona o le eseesega o le sipelaga o loo iai i manusikulipi Eperu.—4/1, itūlau 30, 31.