Kirisimasi—i Atunuu i Sasaʻe

• PE Ā MA LE LUASELAU TAUSAGA UA MAVAE, na asiasi atu ai i Peking, i Saina, se tagata aʻoga faapitoa ma lauiloa mai Korea. A o ia faataupupula atu i se ātatusi i luga o le faʻalo o se malumalu tele, na ia vaaia ai le āta o Maria o loo sii le pepe o Iesu i ona lima. O lana faamatalaga lenei e uiga i lenei āta na faateʻia ai:

“O loo sii i vae o se tamaʻitaʻi se tamaitiiti e foliga mata maʻi, pe tusa ma le lima pe ono ona tausaga. E foliga mai ua tau lē mafai e le tamaʻitaʻi ona ea i luga lona ulu, e peiseaī e faigatā ia te ia ona vaai atu ma le faanoanoa i si ana tama. Ae i se vaaiga mamao atu i o la tua, o loo iloa atu ai le anoanoaʻi o aitu ma ni pepe fai apaʻau o loo felelei solo. A o oʻu faataupupula atu i na mea i oʻu luga aʻe, sa foliga mai e lē o toe mamao lava ona paʻūū ifo lea ia te aʻu. Ona o loʻu teʻi tele, na ou aapa atu ai e tau puʻe mai i latou.”

NA TUPU lena mea i tuā lava ina ua mavae ona amata le Toe Fuataʻiga i Europa, i tuā lava ina ua mavae atu vaitaimi leaga o le talafaasolopito o Europa mai le pe tusa o le 500 T.A. e oo atu i le tusa o le 1500 T.A. Peitaʻi i le toʻatele o tagata mai Atunuu i Sasaʻe, o le Faa-Kerisiano sa lē o se mea na masani ai e pei lava ona lē masani i le ātatusi. Maʻeu se suiga ua iai i lena tulaga! I vaitau taʻitasi o le Kirisimasi, e faamatilatila mai ai āta faafaatusa o le pepe o Iesu. Ua amata ona masani atunuu i Sasaʻe i na vaaiga o āta faafaatusa, ma o teuteuga o loo faia nei i ona magāala ua tali tutusa lava ma teuteuga i magāala i Europa.

I le afiafi o Novema 25, 1998, e tusa toe tasi le masina oo i le Kirisimasi, sa matuā malama atoa ai le Champs Élysées i Pale, i matāuila e silia ma le 100,000 i luga o laau e 300 o loo siʻomia ai lena nofoaga taʻutaʻua. I se faatusatusaga fetaui, i magāala o le taulaga i Seoul, i Korea, e faatū ai se laau Kirisimasi telē lava e se faleoloa tele ma amata ona matuā faamalamalama ai le po i lena aai. E lē umi lava, ae teuteuina atoa ona magāala i teuteuga o le Kirisimasi.

E faalausosoo i aso uma ona faasalalau mai e le televise, le leitiō, ma nusipepa, polokalame o le Kirisimasi. Pe a oo ina faagaeetia i le agaga o le Kirisimasi, e matuā anoanoaʻi mea e faia e le atunuu atoa ina ia taliaina ma le fiafia le iʻuga o le tausaga. O falesā i Seoul, o le tele lava e matuā maofa ai le toʻatele o tagata asiasi, e vave lava ona teuteuina. O Korea la, ma isi atunuu i Sasaʻe e matuā uunaʻia i le agaga o le Kirisimasi i le taimi tonu lava foʻi o loo vevesi ai le Iunaite Setete i le faamanatuina o la latou Aso o le Faafetai (Thanksgiving Day) lea e fai i le faaiʻuiʻuga o Novema.

O le tele o atunuu i Sasaʻe e lē o manatu i ai o se vaega o Kerisinetoma. Mo se faataʻitaʻiga, e na o le 26.3 pasene o le faitau aofaʻi o Korea e faapea mai o ni Kerisiano. O Hong Kong e 7.9 pasene, o Taiwan e 7.4 pasene, ma i Iapani, e na o le 1.2 pasene. E manino mai la, o le toʻatele o tagata i Sasaʻe latou te lē faatinoina le Faa-Kerisiano, peitaʻi e foliga mai latou te lē teena le faamanatuina o le Kirisimasi. O le mea moni, e foliga mai o latou e sili atu le maelegā i lena  faamanatuga na i lo tagata e pei o i latou i atunuu i Sisifo. Mo se faataʻitaʻiga, ua lauiloa Hong Kong i le matuā sasalu o lona faamanatuina o le Kirisimasi, e ui lava o le toʻatele o tagata o loo nonofo ai e lolotu Puta pe lolotu Tao. E oo foʻi i Saina, lea e na o le 0.1 pasene i latou e faapea mai o ni Kerisiano, ua vave faatuputupulaʻia ai le avea o le faamanatuina o le Kirisimasi ma se mea e fiafia ai le toʻatele o tagata.

Aiseā ua matuā lauiloa ai le faamanatuina o le Kirisimasi i atunuu i Sasaʻe? Aiseā e oo ai lava i tagata o ē lē talia le avea o Iesu ma Mesia, ua latou auai atu i le faamanatuina o le Kirisimasi, lea e manatu i ai le toʻatele o ē faapea mai o Kerisiano, o le aso fanau o Iesu? Pe tatau ea i Kerisiano moni ona faataʻitaʻi atu i manatu o na tagata e faatatau i le Kirisimasi? O le a tatou maua le tali a o tatou talanoaina pe na faapefea ona oo ina avea le Kirisimasi ma se mea e fiafia i ai le toʻatele o tagata i Korea, o se atunuu ua leva o iai i Sasaʻe.