Ia Taumafai E Faaleleia Lou Soifua Mālōlōina

PO O e manatua Ram lea na taʻua i le mataupu muamua o lenei faasologa o mataupu? I le pei o le toʻatele o tagata i le lalolagi aoao, e leʻi iloa e Ram le tāua o taumafa ma isi mea e fai i aso uma, i le soifua mālōlōina. Ua ia taʻua: “Na fesoasoani iā te aʻu le mataupu i le Ala Mai! o Oketopa 8, 2002, ʻTaumafa Paleni e Mafai Ona E Maua,’ e iloa ai le pogai e tatau ai ona tatou nofouta i taumafa tatau.”

Ua taʻua e Ram: “Na taumafai lo matou aiga e faatatau mea na matou aʻoaʻoina mai i le mataupu. Na matou iloa mulimuli ane, ua faamalosia ai sela o o matou tino e tetee atu ai i faamaʻi. Sa masani ona matou mamaʻi i le fulū, ona e matou te leʻi manatu mamafa i meaʻai tatau, ae i le taimi nei ua seāseā toe fulū. Sa matou iloa foʻi auala taugofie ma faigofie e maua ai vaiinu mamā, ona o le mataupu i le Ala Mai! o Ianuari 8, 2004, ʻ6 Auala e Puipuia ai Lou Soifua Mālōlōina.’”

“Sa fesoasoani foʻi se isi Ala Mai! iā te aʻu, e faaleleia ai le soifua mālōlōina o loʻu aiga. Ua faaulutalaina, ʻLe Fasimoli—O se “Tui Puipui e Fai e Oe Lava,”’ i le lomiga o Aperila 8, 2004. O le taimi lava na matou faitau ai i lenei mataupu, na matou faatatauina loa fautuaga o loo iai. I le taimi nei, e lē o toe mamaʻi o matou mata, e pei ona iai muamua.

“I le mea o loo matou nonofo ai, e lē popole tagata i le tele o lago ma namu. Ae i le vitiō The Bible—Its Power in Your Life, * na matou iloa ai e tatau ona faamamao ese mai i na iniseti. Na fesoasoani foʻi lea e tausia ai pea lo matou soifua mālōlōina lelei.”

Aua le fiu! Po o ā lava suiga e manaʻomia ona e faia, e tele aogā e te maua pe a faasolosolo lelei ona fai, ma aua le faia ni sini e lē mafai ona e ausia. O se faaaʻoaʻoga, ia faaitiitia meaʻai e lē lelei mo le soifua mālōlōina, ae lē o le matuā taofi uma. Ia vave ona moe ma fai sina faamalositino. E sili atu le fai o se mea nai lo o le lē faia. E masani ona alu se taimi, vaiaso po o ni masina, a o leʻi avea se masaniga fou e fai ma au masani. Ae pe afai e te lē o vaaia i le taimi nei ni aogā o au taumafaiga, aua le faavaivai. E ui ina faigatā, ae o le finafinau, e atili ai ona faaleleia lou soifua mālōlōina.

I lenei lalolagi lē lelei atoatoa, e faigatā i se tasi ona maua se soifua mālōlōina lelei atoatoa. A e maʻi, e lē faapea ona o lou faatamala, ae atonu ona o ni vaivaiga tuufaasolo faaletagata. Aua la e te popolevale, ona o faafitauli o le soifua mālōlōina po o isi mea. Na fetalai Iesu: “O ai ea se tasi o outou e mafaia i lona popole ona faaopoopo ni nai aso i lona olaga?” (Luka 12:25) Ia ʻalofia mea e lē manaʻomia, e ono puupuu ma faaleagaina ai le soifua. O le faia faapea, o le a e fiafia ai i se soifua mālōlōina e sili ona lelei i le taimi nei, seʻia oo i le lalolagi fou a le Atua, lea o le a “lē fai mai foʻi se tasi ua nofo ai: ʻOu te maʻi.’”​—Isaia 33:24.

[Faaopoopoga i lalo]