Pe na Teʻi Lava ua Iai?

Le Ala Suāsusu

▪ Afai ua e tagaʻi o fanau se tamaʻi mamoe, po o se ʻoti, po o se povi, atonu o le a e ofo i le vave ona mafai ona tu i luga ma susu i lona tinā. O manu uma e iai nei ituaiga o meaola, e faasusu a latou tama. Ae o tama a manu e iai le mamoe, oti, ma le povi, e iai foʻi se isi vala e ofoofogia ai, e lē o mafai ona iloa atu.

Mātau mai: O povi, e fā vaega o latou puta e faamalūina ai le vao ma meaʻai faapena. Ae o tamaʻi povi, e na o le suāsusu e aai ai, ma e lē manaʻomia ona faamalūina. A oo la ina susu le tamaʻi povi, e iai se ala suāsusu faapitoa e matala e alu saʻo ai lava le suāsusu i le vaega mulimuli i lona manava.

Afai ae sao sina suāsusu i le vaega muamua o le puta (rumen), o le a mafatia le tamaʻi povi ona o i inā e iai meaola ninii faapitoa e faamalūina meaʻai malō. O le a mafu ai le suāsusu ma maua ai ma le kasa lea e lē mafai e tamaʻi povi ona faaalu ese mai o latou puta. Ae i le taimi e susu ai le tamaʻi povi i lona tinā pe inu le suāsusu mai se pakete, e māpuni le ala suāsusu ma poloka le suāsusu ia lē sao atu i le vaega muamua o lona puta.

Ae o le mea e ofo ai, ona e ese foʻi le mea e tupu pe a inu vai le tamaʻi povi. E tele vai e manaʻomia i le vaega muamua o le puta ina ia faatele ai meaola ninii e aogā i le povi pe a oo ina ʻai i vao. E alu saʻo le suāsusu i le vaega mulimuli o le puta o le povi, ae alu saʻo le vai i le vaega muamua o le puta. E na o le suāsusu lava e mafai ona alu saʻo i le ala suāsusu o le tamaʻi povi!

O le ā la sou manatu? Pe na teʻi lava ua iai lena ala suāsusu? Po o se mea na faia e Lē na faia mea uma ma le poto?

[Siata/Ata i le itulau 27]

(Tagaʻi i le lomiga mo le ata atoa)

E alu saʻo atu lava le suāsusu i le vaega mulimuli o le puta o le tamaʻi povi

[Siata]

Ala suāsusu

1 Rumen

2 Reticulum

3 Omasum

4 Abomasum (vaega mulimuli o le puta)