O se Samaria Agalelei i Ona Pō Nei

TUSIA E LE TUSITALA O LE ALA MAI! I MEKISIKŌ

Ua masani le to‘atele o i tatou ma le tala i le Samaria agalelei o loo i le Tusi Paia, e faatatau i se tagata na agalelei atu i lona tuaoi. (Luka 10:29-37) Na faamatalaina ai e Iesu i lea faataoto le taumafaiga tele na fai e se tagata Samaria ona o lona alofa i se tagata sa mana‘omia se fesoasoani. Po o iai i nei aso nisi e pei o lea Samaria agalelei? Se‘i taga‘i fo‘i i le tala mai Mekisikō.

Ina o aga‘i atu le aiga o Petueli i lo latou fale ua fo‘i mai i la latou malaga, na latou vaaia ai i le alatele se faalavelave mata‘utia tau taavale, ma e lē mamao mai le mea e iai lo latou fale. Na faatū la latou taavale e vaai pe mana‘omia se fesoasoani. Na talosaga ane iā i latou se alii foma‘i na aveina se tasi o taavale lea na lavea i le faalavelave, ina ia latou ave lana avā e ma‘itaga, faapea ma lana fanau teine laiti e to‘alua i le falema‘i mo togafitiga. Sa latou faia faapea, ma na toe fo‘i ane Petueli i le mea na tupu ai le faalavelave e vaai po o le ā se isi fesoasoani o mana‘omia.

Ua faamatala mai e Petueli e faapea: “Na ō atu leoleo, ma na latou taofia le foma‘i auā a latou su‘esu‘ega, ona ua iai se tasi ua maliu i le faalavelave. Ina ua fesili mai le foma‘i pe aiseā ua ou fesoasoani atu ai, na ou faamatala i ai o a‘u o se Molimau a Ieova, ma ua matou iloa mai le Tusi Paia e ao ona alolofa i tuaoi. Na ou fai i ai e aua le popole i lona aiga, o lea e matou te vaaia. Na maligi ona loimata i lona talisapaia, ma na ia tuu mai iā te a‘u ana mea totino tāua ou te vaaia.”

Na tausi e le aiga o Petueli le aiga o le foma‘i mo ni nai aso, ma na faaaogā e Petueli le avanoa e su‘esu‘e ai le Tusi Paia ma i latou. Ina ua toe tatala mai le foma‘i, na ia faaalia lona loto faafetai ma lona mata‘ina o Molimau a Ieova. Na ia ta‘utino mai o le a faaauau lana su‘esu‘ega i lona nuu, ma afai e fanau lana avā o se tama, o le a faaigoa o ia iā Petueli. Ua faaauau le faamatalaga a Petueli e faapea: “Na maua se avanoa e asia ai i latou i le lua tausaga mulimuli ane ai. Na faate‘ia a‘u ona o loo faaauau pea la latou su‘esu‘ega o le Tusi Paia, ma o le igoa o le tamaitiiti la‘itiiti, o Petueli!”

[Ata i le itulau 11]

Petueli