“Ona Latou Tuʻi ai Lea i a Latou Pelu e Fai ma Uamea o Suotosina”—O Afea?

O SE faatagata taʻutaʻua i luma o le fale o Malo Aufaatasi i le Aai o Niu Ioka, o loo faaali mai ai se tamāloa o loo tuʻi se pelu e fai ma suōtosina. O loo faavae lena ata mai i valoaga o le Tusi Paia i le Isaia mataupu e 2, fuaiupu e 4, ma le Mika mataupu e 4, fuaiupu e 3. E faapefea ma o afea o le a faataunuuina ai nei upu?

I se lipoti talu ai nei i le New York Times, o loo iai se ulutala e faapea: “Ua Matuā Oso Maualuga le Faatauina Atu o Auupega i le Lalolagi i le $30 Piliona”! I le 1999, o ai na taʻimua i le faatauina atu o lenei vaega matuā tele o auupega eseese? Na taʻimua lava le Iunaite Setete i le faatauina atu o auupega e tusa ma le $11.8 piliona. E lona lua ai Rusia e itiiti ifo i le ʻafa o lena faitau aofaʻi. Ae peitaʻi, na toetoe lava a faaluaina le faatau atu a Rusia i le tausaga talu ai. Ona sosoo ai lea ma Siamani, Saina, Falani, Peretania ma Italia. Ua faaauau mai lena lava lipoti e faapea: “ E pei lava o tausaga ua mavae, i se fua faatatau, pe tusa o le luavaetolu o auupega uma na faatau atu i atunuu tauatiaʻe.”

Ina ua mavae taua e lua a le lalolagi ma isi lava taua tetele i le faagasologa o lona 20 o senituri, lea na maliliu ma manunuʻa ai le faitau selau miliona o tagata, ua māfua ai ona fesili se tasi, “O afea ea e mafai ai e atunuu ona aʻoaʻoina le filemu na i lo o taua?” Ua faailoa mai e le Tusi Paia e faapea, o lenei liliu atu i le filemu, o le a faia i “aso e gata ai.” (Isaia 2:2) O le mea moni, ua leva ona amata le faataunuuga o lenei valoaga, a o faaavanoa atu e le toetoe lava ono miliona o Molimau a Ieova i latou e ‘aʻoaʻoina e Ieova.’ O le iʻuga, ua matuā ‘tele lo latou [filemu].’ —Isaia 54:13.

Ua toe o se aga ona aumaia loa lea e Ieova le iʻuga i auupega ma taua uma ma i latou o loo faia na mea, auā o le a ia ‘faafanoina i latou o ē na fano ai le lalolagi.’ Afai e te fia iloa atili e uiga i lenei suiga ofoofogia, faamolemole ia faafesootaʻi Molimau a Ieova i lou vaipanoa pe tusi atu foʻi i se tuatusi talafeagai o loo lisiina i le itulau e 5.—Faaaliga 11:18.