I LE amataga o le 2017, na faia ai e se vaega o saienitisi se faalauiloaga e faapopoleina ai. Iā Ianuari na latou faailoa mai ai, e lē o toe umi ae aafia le lalolagi i se mala e sili ona mataʻutia. Na faaaogā e saienitisi se uati faafaatusa e taʻua o le Doomsday Clock, e faataʻitaʻi mai ai le latalata ina aafia o le lalolagi i se mala e sili ona mataʻutia, e ala i le ki i luma o le uati i le 30 sekone. Ua seki nei lenā uati faafaatusa i le toe lua minute ma sekone e 30 tā le 12 i le pō, o le sili foʻi lenā ona latalata o le lalolagi i se mala e sili ona mataʻutia, i lo o se isi lava taimi i le silia ma le 60 tausaga.

I le 2018, ua fuafua saienitisi e toe iloilo ai po o le ā le umi o totoe ona oo mai lea o le iʻuga o le lalolagi. Po o le a faaauau ona faailoa mai e le Doomsday Clock se mala o loo faaloloʻi mai ma e leʻi tupu muamua? O le ā sou manatu, faamata e toe foʻi i se lelei le lalolagi? Atonu e faigatā ona e taliina nei fesili. E oo lava foʻi i tagata atamamai, e eseese o latou manatu e faatatau i lenei mataupu. E lē o tagata uma e talitonu e oo mai le iʻuga o lenei lalolagi.

Ae o le mea moni, e faitau miliona tagata e talitonu i se lumanaʻi matagofie. E latou te faapea mai e iai faamaoniga o le a ola e faavavau tagata ma tumau pea le lalolagi, ma o le a faaleleia le tulaga o o tatou olaga. Pe e moni na faamaoniga? Pe e toe foʻi i se lelei le lalolagi pe leai?