Alu i mataupu o loo iai

Alu i le lisi o mataupu

E lē taunuu valovaloga mai i le Doomsday Clock, talu ai ua folafola mai e le Atua se lumanaʻi matagofie mo tagata ma le lalolagi

MATAUPU AUTŪ | PE E TOE FOʻI I SE LELEI LE LALOLAGI?

Pe e Toe Foʻi i se Lelei le Lalolagi?—Le Manatu o le Tusi Paia

Pe e Toe Foʻi i se Lelei le Lalolagi?—Le Manatu o le Tusi Paia

NA VALOIA mai i le Tusi Paia i le tele o senituri ua mavae le tulaga leaga ua iai le lalolagi i aso nei. Ae o le mea e sili ona tāua, o loo taʻu saʻo mai ai le faamoemoe matagofie mo tagata. E lē tatau ona tatou manatu māmā i faamatalaga i le Tusi Paia, pe a mafaufau i le tele o valoaga o loo taʻua ai ua uma ona faataunuuina i ni auala mataʻina.

O se faaaʻoaʻoga, seʻi iloilo nisi nei o valoaga o le Tusi Paia:

  • “O le a siitaua atu isi atunuu i isi atunuu, ma isi malo i isi malo, o le a iai foʻi oge ma mafuiʻe i lea mea ma lea mea.”​—Mataio 24:7.

  • “O aso e gata ai e oo mai ai aso e sili ona faigatā. Auā e avea tagata ma ē e alolofa iā i latou lava, o ē e mananaʻo tele i tupe, o ē e fia tagata, o ē e faamaualuluga, o ē e fai upuleaga i isi, o ē e lē usiusitaʻi i mātua, o ē e lē lotofaafetai, o ē e lē faamaoni, o ē e lē lotoaiga, o ē e mumusu i maliega, o ē e faia tala taufaaleaga, o ē e lē amio pulea, o ē e sauā, o ē e lē fiafia i mea lelei, o ē e faalata, o ē e faaulumalō, o ē ua faafefeteina i le faamaualuga, o ē e pupū i mea faafiafia nai lo o le alolofa i le Atua.”​—2 Timoteo 3:1-4.

O loo faamatalaina i na valoaga se lalolagi e manatu i ai isi e lē mafai ona toe foʻi i se lelei. Pe a mafaufau lelei i ai, o le tulaga moni lenā ua iai le lalolagi, ae i se uiga e faapea e lē mafai ona toe foʻi i se lelei e ala i taumafaiga a tagata. E tusa ai ma faamatalaga mai i le Tusi Paia, e lē o i le tagata le poto ma le malosi e aumaia ai se vaifofō tumau. O loo faamatilatila mai lenā manatu i mau nei:

  • “Ua iai le ala e tonu i le manatu o le tagata, a o lona taunuuga o ala ia e oti ai.”​—Faataoto 14:12.

  • ʻUa pule le tagata i le isi tagata ma ua matuā afāina ai o ia.’​—Failauga 8:9.

  • “E lē o i le tagata . . . ona faatonuina le mea e ui ai o ia.”​—Ieremia 10:23.

Pe afai e faaauau ona faia e tagata mea e latou te mananaʻo i ai, e mautinoa lava la le oo mai o se mala e sili ona mataʻutia i le lalolagi. Ae e lē o le mea lenā o le a tupu. Aiseā? O faamatalaga nei mai i le Tusi Paia:

  • ʻUa faavaeina e le Atua le lalolagi i luga o ona faavae malolosi; e lē maluelue e faavavau, faavavau lava.’​—Salamo 104:5.

  • “E mavae atu le tasi tupulaga ae e sau le isi tupulaga; a o le lalolagi e tumau lea e faavavau.”​—Failauga 1:4.

  • “E fai lava le lalolagi mo ē e amiotonu, e nonofo ai pea i latou e oo i le faavavau.”​—Salamo 37:29.

  • “O le a tele saito i le laueleele; o le a fau ma soloi i tumutumu o mauga.”​—Salamo 72:16.

Ua aumaia i le Tusi Paia tali manino. E lē faaumatia atoatoa tagata ona o le faapolusioneina o le ʻea ma le sami, utiuti o taumafa ma vai, po o se faamaʻi oti e aafia ai le lalolagi atoa. E lē faaumatia foʻi lenei lalolagi i se taua faaniukilia. Aiseā? O loo i aao o le Atua le lumanaʻi o le lalolagi paneta. E moni o loo faataga pea e le Atua tagata e fai lo latou saʻolotoga e filifili ai. Peitaʻi, o le a latou selesele i iʻuga o a latou filifiliga. (Kalatia 6:7) E lē pei le lalolagi o se nofoaafi e matuā alu saoasaoa, e lē mafai ona taofia ma e iʻu atu i se iʻuga mataʻutia. Ua faataatia e le Atua tapulaa po o mea e gata mai ai le malosi o le tagata i mea e na te faaleagaina.​—Salamo 83:18; Eperu 4:13.

Ae e tele isi mea o le a faia e le Atua. O le a ia aumaia le “tele o le filemu.” (Salamo 37:11) O le vaaiga mautinoa o loo faamatalaina i lenei mataupu, ua na o se faaataga lenā o le faamoemoe matagofie ua aʻoaʻoina e le faitau miliona o Molimau a Ieova, e ala i le suʻesuʻeina o le Tusi Paia.

O Molimau a Ieova o se vaega o tagata mai i le lalolagi atoa, e faia aʻe i tane ma fafine e eseese le matutua ma aganuu. E latou te tapuaʻi i le Atua moni, o lona suafa o Ieova e pei ona faaalia i le Tusi Paia. E latou te lē popole i le lumanaʻi auā ua faapea mai le Tusi Paia: “O le fetalaiga lenei a Ieova, o Lē na foafoaina le lagi, o Ia o le Atua moni, o le Mataisau o Lē na faia le lalolagi, o Ia o Lē na faatumauina, na ia lē foafoaina fua ae na ia faia ina ia ʻainā: ʻO aʻu o Ieova, e leai se isi.’”​—Isaia 45:18.

Na iloiloina i lenei mataupu nisi o aʻoaʻoga a le Tusi Paia e faatatau i le lumanaʻi o le lalolagi ma tagata. Mo nisi faamatalaga, tagaʻi i le lesona e 5 o le polosiua Tala Lelei Mai i le Atua! lomia e Molimau a Ieova ma o loo maua i le www.jw.org/sm

E mafai foʻi ona e maimoa i le vitiō Aiseā na Foafoaina ai e le Atua le Lalolagi? o loo maua i le www.jw.org/sm. (Tagaʻi i le LOMIGA > VITIŌ)