XA MANNU heeꞌranni noohu Maganu hedino garinni diꞌꞌikkino. Maganu hedo, uullate aana isi aliidimma ayirrisannohu, biddishshasi harunsannohunna isi akatta noonsa manni woꞌmanno gedeeti. Qoleno Maganu mannu uullate aana ooso ile lossiꞌranni, haaro coye rosanninna gannate halashshanni hegerera heeꞌrara hasiꞌranno.

• “Baattote qacce geeshsha nooha ola uurrisanno.”—Faarso 46:9.

• “Baatto huntannore hunatto yanna iillitu.”—Yohaannisi Ajuuja 11:18.

• “‘Dhiwamoommo’ yaannoha dianfanni.”—Isayaasi 33:24.

• ‘Loosidhinorinni seeda diro hagiidhitanni heedhanno.’—Isayaasi 65:22.

Tini masaalo woꞌmitannohu hiittoonniiti? Maganu Beettosi gashshootisira moote asse shoomino; kuni gashshooti Yesuusi Moote ikke iima heeꞌre uulla gashshannoho guuta gashshooteeti. Qullaawu Maxaafi konne gashshoote Maganu Mangiste yaanno. (Daanieeli 2:44) Qullaawu Maxaafi Yesuusi daafira kulanni togo yaanno: “Maganu ayirrinyu barcima aannosi. [Isi] hegerera moohanno.”—Luqaasi 1:32, 33.

Yesuusi uullate aana noo yannara, lowo maalale loosino; tini albillitte uulla gashshanno woyite mannu heeshsho xaatenni lowo geeshsha woyyaabbanno gede assannota leellishshanno.

• Duuchunku gari dhibba hursino; tini mannu ooso dhibbunni gatisannota leellishshanno.—Maatewoosi 9:35.

• Baara sammi assino; tini kalaqamu wolqa aana silxaane noosi daafira mannu ooso agarannota leellishshanno.—Maarqoosi 4:36-39.

• Kumunni kiirranni manna itisino; tini mannu oosora hasiisannore wonshannota leellishshanno.—Maarqoosi 6:41-44.

• Jilunniwa waa woyinete soorrino; tini mannu ooso hagiirru noo heeshsho heedhanno gede assannota leellishshanno.—Yohaannisi 2:7-11.

Maganu baxxannosirira qixxeessino heeshsho afiꞌra dandaattohu hiittoonniiti? Tenne heeshsho afiꞌrate haꞌra hasiissannohe “doogo” no. Qullaawu Maxaafi tini doogo ‘heeshshote widira massitannote; ise afiꞌranno manni shiimaho’ yaanno.—Maatewoosi 7:14.

Heeshshote doogo maati? Maganu togo yiino: “Woyyannoꞌnere baala rosiiseemmoꞌnehunna, hadhinanni doogo kuleemmoꞌnehu Maganiꞌne Kaaliiqi aneeti.” (Isayaasi 48:17) Tenne doogo haꞌra,  baalanta roortino heeshsho afiꞌneemmo gede assitannonke.

Yesuusi, “Doogono, halaaluno, heeshshono aneeti” yiino. (Yohaannisi 14:6) Yesuusi rosiisino halaale ammanneemmohanna isi faale haꞌneemmoha ikkiro, Maganunniwa shiqanna baalanta roortino heeshsho afiꞌra dandiineemmo.

Heeshshote doogo afiꞌra dandaattohu hiittoonniiti? Alamete aana lowo ammaꞌno no; Yesuusi kayinni togo yee qorowisiisino: “‘Mootichaꞌya! Mootichaꞌya!’ yaannoehu baalu gordu Gashshoote dieanno. Gordu Gashshoote eannohu Anniꞌya yiinore wonshannoho.” (Maatewoosi 7:21) Isi lede, “Insa baddine affinannihu guminsanniiti” yiino. (Maatewoosi 7:16) Qullaawu Maxaafi halaalaancho ammaꞌno badde afatto gede kaaꞌlannohe.—Yohaannisi 17:17.

Heeshshote doogo haꞌra dandaattohu hiittoonniiti? Balanxe heeshshote Buicho ikkino Magano afa hasiissannonke; yaano suꞌmasi, akattasi, isi maa assanni nooronna ninke maa assinammora hasiꞌrannoro afa hasiissannonke. a

Maganu mannu ooso kalaqinohu loosidhara, ittara, boohaartaranna ooso ilte lossidhara calla ikkikkinni, isi daafira rossaranna jaallasi ikkitaraati. Isi fajjo assineemmoha ikkiro, banxeemmosita leellinsheemmo. Yesuusi togo yiino: “Hegere heeshshono, ati callu halaalaancho Magano ikkoottotanna soottoha Yesuusa Kiristoosa afate.”—Yohaannisi 17:3.

Halaalaancho Magano Yihowa hagiirsiisate, heeshshokki giddo mito coye biddi assiꞌra hasiissannoheha ikkara dandaanno. Hatto assa dandaattokkiha lawahera dandaanno. Ikkollana heeshshote doogo haꞌra hanafatto woyite, heeshshokki hagiirru noota ikkitanno. Maganu daafira xaꞌminannite qara qara xaꞌmuwara dawaro afiꞌrate, Yihowa Farciꞌraasine injiitannohe yannaranna basera Qullaawa Maxaafa woxe baaxxittokkinni xiinxallissannohe. Yihowa Farciꞌraasinenni xaadate, www.jw.org/sid daaꞌꞌata dandaatto.