Miyambo 13:1-25
13 Mwana wanzeru amalandira malangizo* ochokera kwa bambo ake,+Koma wonyoza samvera akadzudzulidwa.*+
2 Munthu adzadya zinthu zabwino kuchokera pa zipatso zapakamwa pake,+Koma anthu achinyengo amalakalaka kuchita zachiwawa.
3 Amene amayangʼanira pakamwa pake* amateteza moyo wake,+Koma amene amatsegula kwambiri pakamwa pake adzawonongeka.+
4 Waulesi amalakalaka zinthu, chonsecho alibe chilichonse.+Koma munthu wakhama zinthu zidzamuyendera bwino.*+
5 Wolungama amadana ndi mabodza,+Koma zochita za munthu woipa zimabweretsa manyazi ndi kunyozeka.
6 Chilungamo chimateteza munthu wosalakwa,+Koma kuchita zoipa kumachititsa kuti wochimwa awonongeke.
7 Pali munthu amene amadzionetsa ngati wolemera koma chonsecho alibe chilichonse.+Pali munthu winanso amene amadzionetsa ngati wosauka koma ali ndi chuma chambiri.
8 Chuma chimawombola moyo wa munthu,+Koma anthu osauka saopsezedwa* nʼkomwe.+
9 Kuwala kwa nyale ya anthu olungama kukuwonjezeka kwambiri.*+Koma nyale ya anthu oipa idzazimitsidwa.+
10 Kudzikuza kumangoyambitsa mikangano basi,+Koma anthu amene amapempha malangizo* amakhala ndi nzeru.+
11 Chuma chimene munthu amachipeza mofulumira* sichichedwa kutha,+Koma chuma cha munthu amene wachipeza pangʼonopangʼono* chidzawonjezeka.
12 Chinthu chimene umayembekezera chikalephereka, mtima umadwala.+Koma chomwe umalakalaka chikachitika, chimakhala ngati mtengo wa moyo.+
13 Aliyense amene safuna kutsatira malangizo, adzakumana ndi mavuto chifukwa cha zochita zakezo,+Koma munthu amene amamvera malamulo adzalandira mphoto.+
14 Zimene munthu wanzeru amaphunzitsa* zimapereka moyo,+Chifukwa zimapulumutsa munthu kumisampha ya imfa.
15 Munthu wozindikira kwambiri, anthu amamukomera mtima,Koma anthu achinyengo moyo wawo umakhala wodzaza ndi mavuto.
16 Munthu wochenjera amadziwa zimene akuchita,+Koma wopusa amaonetsa uchitsiru wake wonse.+
17 Munthu woipa wobweretsa uthenga amakumana ndi mavuto,+Koma nthumwi yokhulupirika imachiritsa.+
18 Aliyense amene amanyalanyaza malangizo* amasauka ndipo amanyozeka,Koma amene amamvera akadzudzulidwa adzalemekezedwa.+
19 Zimene munthu amalakalaka zikakwaniritsidwa amasangalala.+Koma opusa amadana ndi zoti asiye zinthu zoipa.+
20 Munthu woyenda ndi anthu anzeru adzakhala wanzeru,+Koma amene amachita zinthu ndi anthu opusa adzapeza mavuto.+
21 Tsoka limatsatira ochimwa,+Koma anthu olungama zinthu zimawayendera bwino.+
22 Munthu wabwino amasiyira cholowa zidzukulu zake,Koma chuma cha munthu wochimwa chidzasungidwa kuti chidzakhale cha munthu wolungama.+
23 Munda wa munthu wosauka akaulima umatulutsa chakudya chochuluka,Koma chingathe kutengedwa* ndi anthu opanda chilungamo.
24 Munthu amene sakwapula* mwana wake ndiye kuti akudana naye,+Koma amene amamukonda salephera* kumupatsa chilango.+
25 Wolungama amadya nʼkukhuta,+Koma mimba za anthu oipa zimakhala zopanda kanthu.+
Mawu a M'munsi
^ Kapena kuti, “akalangizidwa.”
^ Mawu amʼchilankhulo choyambirira amene amasuliridwa kuti “malangizo” ali ndi matanthauzo ambiri. Akhoza kutanthauza malangizo, kuphunzitsa, kudzudzula, kulimbikitsa, kulanga kapena uphungu.
^ Kapena kuti, “zimene amalankhula.”
^ Mʼchilankhulo choyambirira, “adzanenepa.”
^ Mʼchilankhulo choyambirira, “sadzudzulidwa.”
^ Mʼchilankhulo choyambirira, “kukusangalala.”
^ Kapena kuti, “amene amakhala pamodzi nʼkumakambirana.”
^ Mʼchilankhulo choyambirira, “wachisonkhanitsa ndi manja ake.”
^ Kapena kuti, “mʼnjira zachinyengo.”
^ Kapena kuti, “Chilamulo cha munthu wanzeru.”
^ Kapena kuti, “akadzudzulidwa.”
^ Kapena kuti, “angathe kuwonongedwa.”
^ Kapena kuti, “sapereka chilango kwa.”
^ Mabaibulo ena amati, “sazengereza.”
