Cunanlla cazarashcagunaga tucui urasmi cushilla causanata munanaun. Chitaga, pactachibaglla chan. Ashca huatagunata Jehovata sirvic cazarashcagunaga cushilla causanaun. Paigunaga Biblia cunashcatami casusha catishcauna.

1. Bibliaga carigunata imatata cunan

Jehovaga cariguna paiguna ailluta cuirasha pushachun munan (Efesios 5:23​ta leipai). Ailluta cuirangahua, alita yuyasha, imatas alita rachun munan. Bibliaga carigunata caitami cunan: “Canguna huarmita llaquina anguichi” (Efesios 5:25). Llaquic cariga, paiba huarmillahuan ausha o shuc runagunahuan aushahuas, paiba huarmita llaquishcata ricuchin. Paiba huarmita cuirasha, pai minishtishcata cusha, cushi sintirichunmi munan (1 Timoteo 5:8). Chimandas, paiba huarmita Jehovamanda yachachisha yanapan (Mateo 4:4). Paiba huarmihuan Diosta mañasha, Bibliatas leina man. Shuc cari, Jehovahuan amigo tucunata munashaga, paiba huarmita llaquishami cuirana an (1 Pedro 3:7​ta leipai).

2. Bibliaga huarmigunata imatata cunan

Bibliaga, huarmiguna “paihua cari nishcata pactachina manguichi nin” (Efesios 5:33). Imashinata shuc huarmi paiba carita respetashcata ricuchina ushan. Huarmiga, paiba cari ali shunguyuc, paita cuirac, huahuagunata alita cuirac ashcata yuyana an. Paiba cari rangaraushcata cushiyasha yanapan. Paiba cari Jehovata mana quiricpihuas, paita llaquihuan rimasha, paimanda shuccunata alita rimashami, paita balichishcata ricuchin.

3. Cazarashcagunaga imashinata cushilla causanata ushanaun

Cazarashcagunamanda Bibliaga caita nin: “Ishcandi shuc aichalla tucungami” (Mateo 19:5). Chiraicu, cazarashcaguna llaquinacusha catingahua, ishcandi yangamanda mana caruyana chanaun. Cazarashcagunaga pariulla pasana anaun. Chasnallata, paiguna imashina sintirishcata, imashina yuyashcata, mana pacashachu llaquihuan cuintanacuna anaun. Jehovata punda churashca huasha, cariga paiba huarmita balichina man. Huarmihuas, chasnallata rana an. Cazarashcaguna shuc carihuan o shuc huarmihuan mana yapa apanacusha caillayana chanaun.

 CAIMANDA MASTA YACHAI

4. Cari, camba huarmita llaquisha cuirai

5. Huarmi, camba carita llaquisha respetai

Bibliaga, cazarashca huarmita, Jehovata sirvic o mana sirvic carita charishahuas, respetana mangui nin. 1 Pedro 3:1, 2​ta leichi, huasha cai tapuigunamanda cuintanacuichi:

• Camba cari Jehovata mana sirvic acpiga, canga camba cari Jehovata sirvichun munanguima. Camba cari Jehovata sirvichun nisha yanapangahua: tucui uraschu paita predicana angui, o paita llaquishachu respetashcata ricuchinguima. Imahuata casna yuyangui.

Cazarashcagunaga imata rangaraushcata pariulla cuintanacunaun. Imasaibiga, huarmiga mana paiba cari shinachu yuyanga. Chasna tucusha, huarmiga paiba carita cungailla respetohuan rimanga. Jehovaga, cari paiba ailluta  imashina cuirana ashcata saquira. Chiraicu, huarmiga cari paiba ailluta cuirangahua imata rangaraushcata yanapana man. Caita pactachisha, aillu ucuibi, huinguna cushimi causangauna. 1 Pedro 3:3-5​ta leichi, huasha cai tapuimanda cuintanacuichi:

• Huarmi carita balichisha respetacpiga, Jehovaga imashinashi sintiringa.

6. Cazarashcaguna problemagunata charishaga alichinata ushanaun

 IMATA YACHASHCANGUI

Cazarashcaguna llaquinacusha, respetanacusha, Biblia nishcata casusha, cushi causanata ushanaun.

Yachashcata cuintai

• Aillu cushi causangahua, cariga imatata rana an.

• Aillu cushi causangahua, huarmiga imatata rana an.

• Can cazarashca ashaga, ailluibi cushi causangahua, Biblia ima cunashcatata catinguima.