1, 2. a) ¿Ima letrerokunan askha runata salvaran? (Kay paginapi fotota qhaway.) b) ¿Ima yanapaytan Diospa siervonkuna chaskinku?

PACHAJ watakuna jinañan wakin nacionkunapi letrerokunata churanku trenwan carreterawan tupaq ñanpi. Chay letrerokunan kay jinata nin: “SAYAY, QHAWAY, UYARIY”, nispa. Chaykunatan churanku carrokunata tren ama sarunanpaq, chay letrerokunan askha runakunata salvaran.

² Jehová Diosqa manan letrerokunallatachu churawanchis ñak’ariymanta wañuymantapas salvawananchispaq. Aswanpas kamachikuyninkunatan qowanchis, yachachiwanchistaq wiñay kausayta chaskinanchispaq imatachus ruwananchista. Arí, oveja michiq jinan Jehová Diosqa allin ñanninta pusawanchis (leey Isaías 30:20, 21).

3. ¿Imaraykun runa wañun?

³ Runata kamasqanmantapachan Jehová Diosqa kamachikuyninkunata qoran. Ejemplopaq, Edén huertapin sut’itapuni  runakunaman willaran kusisqa wiñay kausanankupaq imatachus ruwanankuta (Gén. 2:15-17). Adanwan Evawanmi ichaqa mana kasukurankuchu. Evaqa mach’aqwayta otaq Saqratan kasuran, Adantaq Evata kasuran. Chayraykun iskayninku ñak’ariranku, mana ima suyakuyniyoqtaq wañupuranku. Paykuna mana kasukusqankuraykun llapanchis wañunchis.

4. a) ¿Imaraykun Dios qoran mosoq kamachikuykunata sinchi para qhepaman? b) ¿Imatan entiendechiwanchis chay kamachikuykuna?

⁴ Askha watakuna qhepamanmi Jehová Diosqa Noeman willaran salvakunankupaq imachus ruwanankuta. Sinchi para qhepamantaq mosoq kamachikuykunata qoran. ¿Imarayku? Aychata mijunanku kasqanrayku. Diosmi kamachiran: “Yawarnintin aychatan ichaqa ama mijunkichischu, yawarpin kausayqa kashan”, nispa (Gén. 9:1-4). Chaywanmi entiendenchis Diosqa kausayta anchata valorasqanta. Kamawaqninchis kasqanraykun payqa derechonpi kashan kausaymanta kamachikuykunata qowananchispaq. Ejemplopaq, Diosqa juchachanmi runa wañuchiyta. Paymi munan yawartapas kausaytapas respetananchista, mana respetaqkunatataq castiganqa (Gén. 9:5, 6).

5. a) ¿Imatan kay estudiopi yachasun? b) ¿Imata ruwananchispaqmi yanapawasun?

⁵ Noepa wañupusqan qhepamanpas Diosqa serviqninkunatan pusarishallaran. ¿Imaynata? Kay estudiopin chaymanta yachasun. Jinaspapas yanapawasunmi Jehová Diospa ima niwasqanchista kasukunapaq, paraisoman apaq ñanninta purinanchispaqpas.

6. a) ¿Imaraykun Israel runakuna kamachikuy simita kasukunanku karan? b) ¿Imatan ruwananku karan bendecisqa kanankupaq?

⁶ Moisespa tiemponpiqa Jehová Diosqa mosoq kamachikuykunatan llaqtanman qoran. Chay kamachikuykunan karan imayna kausanankumanta, imaynata payta adoranankumantawan. ¿Imaraykun chay kamachikuykunata qoran? Israel runakuna Egipto llaqtapi 200 más watakuna kasqankuraykun. Egipto runakunaqa mana allinkunatan ruwaqku, wañusqakunatan adoraqku, imaymana idolokunayoqtaqmi kaqkupas. Chaymi Israel runakuna Egiptomanta lloqsispanku mosoq kamachikuykunata necesitaranku. Paykunaqa Moisesman kamachiy simikuna qosqantan kasukunanku karan. Investigaq runakunan ninku “kamachikuy” nisqaqa “pusariy” “yanapay” kasqanta. Moisesman kamachikuy qosqanmi yanaparan jatun juchakunaman mana urmanankupaq, pantasqa religionkunapipas ama chaqrukunankupaq. Chay mosoq kamachikuykunata kasukuspaqa allinmi kausankuman, mana chayqa ñak’ariykunapin tarikunkuman (leey Deuteronomio 28:1, 2, 15).

7. a) ¿Imaraykupiwanmi Israel runakuna kamachikuy simita kasukunanku karan? b) ¿Imaraykun nisunman kamachikuy simi Israel runakunata ‘pusaq’ kasqanta?

⁷ Chaymantapas Jehová Diosmi munaran Israel runakuna Mesiaspa jamunanpaq preparasqa kanankuta, chaypaqmi Moisesman kamachikuykuna qosqan yanaparan. Jinaspapas chay kamachikuykunan yuyarichiran pantaq runakuna kasqankuta. Yanapallarantaqmi juchamanta  wañuymantawan kacharichisqa kay necesitasqankuta entiendenankupaq (Gál. 3:19; Heb. 10:1-10). Chaymantapas Mesiaspa familiantan cuidaran. Mesías chayamuqtintaq kamachikuy simi yanaparan reqsinankupaq. Biblian willan kamachikuy simiqa Cristota reqsinankupaq ‘pusaqlla’ kasqanta (Gál. 3:23, 24).

8. ¿Imapin kamachikuy simi yanapawasunman?

⁸ Noqanchispaqpas ancha allinmi Moisesman qosqan kamachikuykunaqa. Imaynan carro manejaqqa trenwan ama saruchikunanpaq sayaykuspa allinta qhawan, chhaynatan sayaykuspa qhawananchis imaraykuchus chay kamachikuykunata Dios qoran chayta. Manan obligasqachu kashanchis chay kamachikuykunata kasukunanchispaq, chaywanpas yanapawasunmanmi allinta kausananchispaq Diostapas adorananchispaq. Chaychá Diosqa Bibliapi qelqachiran chaykunamanta yachananchispaq pusarichikunanchispaqpas. Jinaspapas Jesustan anchata agradecekunanchis kamachikuy simimanta aswan allin kaqkunataraq yachachiwasqanchismanta. Ejemplopaq, uyarinanchismi Jesuspa kay nisqanta: “Uyarirankichismi: ‘Aman wasanchankichu’ nisqa kasqanta. Noqataq ichaqa niykichis, pipas juj warmita munapakuspa qhawaqqa ñan sonqonpi chay warmiwan wasanchay juchata ruwanña”, nispa (Mat. 5:27, 28). Kamachikuy simiqa wasanchay juchatan juchachaq. Jesusmi ichaqa mana chayllatachu yachachiwaranchis, aswanpas yachachiwaranchis umanchismanta millay piensaykunata munapayaykunatawan orqonanchispaqmi.

9. ¿Imanaqtinmi 33 watapi mosoq kamachikuykunata Dios qoran?

⁹ Jesús mesías kapusqan qhepamanmi Diosqa mosoq kamachikuykunata qoran, mana willasqankunatataq willaran. Diosqa 33 watapin Israel llaqtata rechazapuran juj llaqtatataq ajllakuran, chayqa karan iñiq t’aqa cristianokunan.

10. a) ¿Imaraykun mosoq kamachikuykuna necesitakuran ñaupa cristianokunaq tiemponpi? b) ¿Imanaqtinmi Cristoq kamachikuy simin mana kaqllachu Moisespa kamachikuy chaskisqanwan?

¹⁰ Jehová Diosqa kamachikuy simiwanmi Israel runakunata yachachiran imayna kausanankuta, adoranankutapas. Jesús janaq pachaman ripusqan qhepamanmi ichaqa, mosoq kamachikuykunata qoran. ¿Imanaqtin? Diosta serviqkunaqa manañan juj llaqtallamantachu karanku, aswanpas askha llaqtakunamantan; paykunan Diospa cheqaq Israel llaqtan. Paykunawanmi mosoq rimanakuyta ruwakuran chhaynapitaq cristiana iñiq t’aqa qallariran. Chaykunan rikuchiwanchis ‘Diosqa mana mayqen runatapas rijch’ayninta qhawaspachu ajllasqanta’, aswanpas ima llaqtamantaña kaqtinkupas Diospa nisqanman jina kausaqtinkuqa paypa chaskisqan kasqankuta (Hech. 10:34, 35). Chay cristianokunaqa “Cristoq kamachikuy simintan” kasukunanku karan. Chay kamachikuyqa manan rumipi qelqasqa Moisesman qosqan kamachikuykuna jinachu karan. Aswanpas cristianokunaq sonqonkupi qelqasqan karan, chaywanmi Diosqa serviqninkunata pusarinan karan maymantaña kankuman chaypas (Gál. 6:2).

11. ¿Ima kamachikuykunatan Jesús qoran?

 ¹¹ Diospa cheqaq Israel llaqtanqa otaq ajllasqa cristianokunaqa ‘Cristoq kamachikuy siminwanmi’ beneficiakuranku. Manaraq mosoq rimanakuyta ruwakushaqtinmi Jesusqa iskay kamachikuykunata qoran. Jujninmi predicación, jujkaqtaq iñiqmasipura sumaqta qhawarinakunamanta. Kay pachapiña janaq pachapiña tiyasun chaypas, llapanchismi chaykunataqa kasukunanchis.

12. ¿Imaraykun predicación mosoq kamachikuy karan?

¹² Ñaupa tiempopiqa juj llaqtamanta kaq runa Diosta serviyta munaspaqa, Israel llaqtatan maskhanan karan (1 Rey. 8:41-43). Jesusmi ichaqa discipulonkunata kamachiran waj runakunata maskhamunankupaq (leey Mateo 28:19, 20). Chayta cristianokuna ruwanankupaqmi Diospas sut’ita rikuchiran 33 watapi pentecostés fiestapi. Chay p’unchaymi santo espirituta chaskiranku 120 jina. Chaymi askha simikunapi predicayta qallariranku judío runakunamanpas waj llaqtayoqkunamanpas (Hech. 2:4-11). Chaymantataq Samaria llaqtayoqkunata predicaranku, 36 watapitaq mana judío runakunaman predicaranku. Chaymi sut’ita rikuchiran cristianokunaqa pachantinpi predicanankuta.

13, 14. a) ¿Imatan ruwananchis Jesuspa kamachikuyninta junt’anapaq? b) ¿Imatan Jesuspa ruwasqanmanta yachasunman?

¹³ Jesusmi juj “mosoq kamachikuyta” qollarantaq, chayqa iñiqmasipura sumaqta qhawarinakunamantan (leey Juan 13:34, 35). Sapa p’unchaymi iñiqmasinchiskunataqa sumaqta qhawarinanchis, ichaqa manan chayllatachu Jesusqa nisharan. Aswanpas iñiqmasinchisrayku vidanchista qonamantan nisharan. Chayqa manan karanchu Moisespa kamachikuy simi chaskisqanpiqa (Mat. 22:39; 1 Juan 3:16).

¹⁴ Jesusqa qatikuqninkunatan sinchita munakuran, chaymi paykunarayku kausaynintaraq qoran. Payqa munan iñiqmasinchiskunata sinchita munakunanchistan, paykunarayku wañunanchistaraq. Chayta ruwananchispaqmi llapanchis listo kashananchis (1 Tes. 2:8).

15, 16. a) ¿Imaynatan kay tiempopi Jehová Dios llaqtanta pusarishan? b) ¿Imakunapin tarikushanchis?

¹⁵ Kay tiempopin Jesusqa ‘allin yuyayniyoq junt’aq kamachita’ churaran “tiempollanpi” espiritual mijunata qowananchispaq (Mat. 24:45-47). Chay ‘junt’aq kamachiwanmi’ Jehová Diosqa imapichus tarikusqanchisman jina kamachikuykunata qowanchis. ¿Imakunapin tarikushanchis?

¹⁶ ‘Tukukuy qaylla p’unchaykunapiñan’ tarikushanchis, pisillapitaqmi ‘manchay ñak’ariypi’ tarikusunchis (2 Tim. 3:1; Mar. 13:19). Jinaspapas Saqran supayninkunawan kay pachata waqllichishanku (Apo. 12:9, 12). Noqanchistaq Jesuspa kamachiwasqanchista ruwashanchis, chaymi mana jayk’aq jinaraq askha simikunapi pachantinpi predicashanchis.

17, 18. ¿Imatan ruwananchis junt’aq kamachiq yanapaykuna qowasqanchiswan?

¹⁷ Allin yuyayniyoq junt’aq kamachiqa predicananchispaqmi yanapaykunata qowanchis. ¿Yanapachikushanchischu chaykunawan? Juñunakuykunapin  yachachiwanchis imaynata chaykunata utilizananchista. Chay yanapaykunataqa Jehová Diosmi qowanchis, ¿chhaynatachu chaykunata qhawarinki?

¹⁸ Sichus Diospa bendicionninkunata chaskiyta munanchis chayqa, yanapayninkunaman jinan ruwananchis. Kunanmantapacha kasukuq kasun chayqa, manchay ñak’ariy tiempopipas kasukusunmi (Mat. 24:21). Chay qhepamanqa Saqran wisq’asqa kanqa, noqanchistaq mosoq pachapi kasunchis, chaymi juj kamachikuykunata necesitasunchis.

19, 20. a) ¿Ima mosoq qelqakunan paraisopi kicharikunqa? b) ¿Iman pasanqa chay mosoq qelqakuna kicharikuqtin?

¹⁹ Ñaupa tiempopiqa Jehová Diosmi Israel llaqtaman kamachikuykunata qoran. Chaymantataq cristiana iñiq t’aqaman ‘Cristoq kamachikuyninta’ qoran. Paraisopitaq “qelqasqa” mosoq kamachikuykunata qonqa (leey Apocalipsis 20:12). Chaykunaman jina kausananchistachá Diosqa munanqa. ¿Iman pasanqa chay mosoq qelqakuna kicharikuqtin? Chaykunata estudiaspan noqanchispas kausarimpuqkunapas yachasunchis imatachus Dios munasqanta. Llapanchismi Diospa piensasqanta aswan allinta entiendesun. Aswan allinta Bibliata entiendesqanchisraykutaq, munakuywan, respetowan allinta qhawarinakusunchis (Is. 26:9). Jesucristo reyninchis kaqtinqa, imakunataraqchá yachasunchis jujkunamanpas yachachisunchis. ¡May munaychá chayqa kanqa!

²⁰ Sichus “qelqasqa” mosoq kamachikuykunata kasukusun, waranqa wata qhepamantaq Jehová Diospaq junt’a sonqo kasun chayqa, ‘kausaq libropin’ sutinchis qelqasqa kanqa. Chhaynaqa llapanchispas atisunmi wiñay kausayman chayayta. Chaypaqmi imaymana ruwasqanchismanta SAYAYKUSPA Bibliata leenanchis, tukuy yuyaytaq imatachus yachachisqanta QHAWANANCHIS, Diospa niwasqanchistataq UYARINANCHIS. Llapa chaykunata ruwasun chayqa, manchay ñak’ariy tiempopin salvasqa kasunchis, wiñaypaqtaq munakuq Diosninchismanta imaymanata yachasunchis (Ecl. 3:11; Rom. 11:33).