¿Imaninmi Biblia?

 Bautizakuyqa unuman chinkaykuymi. a Bibliapiqa willashanmi askha runakunaq bautizakusqankumanta (Hechos 2:41). Jujninmi kashan Jesuspa bautizakusqan, payqa Jordán mayumanmi chinkaykachisqa karqan (Mateo 3:13, 16). Watakuna qhepamanmi Etiopía llaqtamanta runapas rishasqan ñanpa qayllanpi “unuq kasqanman” chayaspa bautizakurqan (Hechos 8:36-40).

 Jesusqa sut’itan willarqan paypa discipulonkuna kananchispaqqa bautizakunanchispuni kasqanta (Mateo 28:19, 20). Apóstol Pedropas kaqtan nillarqantaq bautizakuymanta yachachishaspa (1 Pedro 3:21).

Kaypin kaykunamanta yachasun:

•  ¿Bautizakuspa imatan rikuchinchis?

•  ¿Imaninmi Biblia chayllaraq nacesqa wawakunata bautizaymanta?

•  ¿Iman Yayaq, Churiq, santo espirituq sutinpi bautizakuy?

•  ¿Juchachu wajmanta bautizakuy?

•  Jujniray bautizakuykunamanta

•  Bautizakuymanta pantasqa yachachikuykuna

 ¿Bautizakuspa imatan rikuchinchis?

 Bautizakuspaqa jujkunamanmi rikuchinchis juchanchismanta pesapakusqanchista, Diosmanpas paypa munaynillantaña ruwananchispaq prometekusqanchista. Rikuchillanchistaqmi Jehová Diostapas Jesustapas tukuy ima ruwasqanchispi kasukuyta munasqanchista. Chaymantapas Bautizakuspaqa wiñay kausayman apaq ñanpin Diospa munasqanman jina puriyta qallarinchis.

 Unuman chinkaykuyqa ñaupa kausayninchista saqepusqanchiswanmi tupan, chayraykun Bibliaqa bautizakuyta tupanachin p’ampasqa kaywan (Romanos 6:4; Colosenses 2:12). Bautizakuspaqa wañupusunmanpas jinan, chayta ruwaspan ñaupa kausayninchista saqepunchis. Unumanta lloqsimuspataq mosoq runa jinan Diosllapaqña kausayta qallarinchis.

 ¿Imaninmi Biblia chayllaraq nacesqa wawakunata bautizaymanta?

 Bibliaqa manan rimanchu chayllaraq nacesqa wawakunata bautizaymantaqa. b Aswanpas willanmi imakunatas ruwana manaraq bautizakushaspa chayta.

 Bautizakunapaqqa Bibliapi yachachikuykunatan allinta entiendenanchis chayman jinataqmi kausananchis, chaymantapas jucha ruwasqanchiskunatan saqepunanchis, juj mañakuypitaqmi Diosman entregakunanchis (Hechos 2:38, 41; 8:12). Chayllaraq naceq wawakunaqa manan chaykunataqa ruwayta atinkumanchu.

 ¿Iman Yayaq, Churiq, santo espirituq sutinpi bautizakuy?

 Jesusmi qatikuqninkunata kamachirqan: “Yachachimuychis discipuloykuna kanankupaq, jinaspa Yayaq, Churiq, santo espirituq sutinpi paykunata bautizamuychis. Qankunaman llapa kamachisqaykunata imaynatachus kasukunanku chayta paykunaman yachachimuychis”, nispa (Mateo 28:19, 20). Sutinpi bautizamuychis nispaqa bautizakuq runa Yayapas Churipas autoridadniyoq kasqankuta imayna kasqankuta reconocenanmantan rimashan, imas santo espiritupas chaytapas allinta entiendenanmantan. Apóstol Pedropas such’u naceq runata qhaliyachinanpaqmi sutinpin nisqa palabrata utilizarqan, nirqanmi: “Nazaret llaqtayoq Jesucristoq sutinpin niyki: Sayarispa puririy”, nispa (Hechos 3:6). ¿Imaraykun chayta nirqan? Payqa yacharqanmi chay milagrotaqa Cristoq atiyninwan ruwashasqanta.

•   “Yaya” nispaqa rimashan Jehová c Diosmantan. Paymi kamawaqninchis, kausay qowaqninchis tukuy atiyniyoq Diosqa. Chhaynaqa payllan tukuy munayniyoqqa (Génesis 17:1; Apocalipsis 4:11).

•   “Churi” nispaqa rimashan Jesusmantan, paymi noqanchisrayku wañurqan (Romanos 6:23). Chhaynaqa salvasqa kananchispaqqa allintan entiendenanchis Jesuspa wañusqanrayku wiñay kausayta chaskiyta atisqanchista (Juan 14:6; 20:31; Hechos 4:8-12).

•   “Santo espíritu” nispaqa rimashan Diospa atiyninmantan otaq kallpanmanta. d Diosqa santo espiritunwanmi tukuy imaymanata kamarqan, kausaytapas qowarqanchis. Santo espiritunwanmi profetankunata wakin runakunatapas rimapayaq, munayninta ruwanankupaqpas atiyninta qoq (Génesis 1:2; Job 33:4; Romanos 15:18, 19). Chaymantapas santo espiritunwanmi wakin runakunata yanaparqan imachus piensasqanta Bibliapi qelqanankupaq (2 Pedro 1:21).

 ¿Juchachu wajmanta bautizakuy?

 Askha runakunan juj religionpi bautizasqaña kashaspa juj religionman ripuspa wajmanta bautizakunku, ¿juchachu kanman chayta ruway? Wakinqa yaqapaschá arí juchan ninkuman Efesios 4:5 textota jujniraymanta entiendesqankurayku, chaypin nishan: “Señorpas jujllan, iñiypas jujllan, bautismopas jujllan”, nispa. Ichaqa chaypiqa manan wajmanta bautizakuyqa juchan nishanchu. ¿Imaraykun chayta ninchis?

 ¿Imamantan rimashan? Efesios 4:5 textopiqa apóstol Pabloqa rimasharqan juj nisqalla kayqa ancha importante kasqanmantan. Cheqaq cristianokunaqa juj nisqallan iñiyninkupi kananku (Efesios 4:1-3, 16). Juj nisqalla kanapaqqa llapankun Jesusta qatikunanku, kaqtakaman Bibliaq imachus yachachisqantapas entiendenanku, bautizakunapaq imakunachus ruwana chaykunatapas llapantan junt’ananku.

 Juj kutinpin apóstol Pabloqa Bautizasqaña kashaq runakunata kallpacharqan wajmanta bautizakunankupaq. Chay runakunaqa Bibliapi kaq yachachikuykunata mana allinta entiendespan bautizakusqaku (Hechos 19:1-5).

 ¿Imatan ruwananchis bautizakusqanchista Dios allinpaq qhawarinanpaq?Pipas bautizakuyta munan chayqa, allintaraqmi Bibliamanta yachanan, chayraqmi Diosqa bautizakusqanta allinpaq qhawarinqa (1 Timoteo 2:3, 4). Sichus juj runa mana allin yachachikuykunata allinpaq qhawarispa bautizakurqan chayqa, Diosqa manan allinpaqchu chay bautizakusqanta qhawarin (Juan 4:23, 24). Yaqapaschá chaytaqa sonqomanta ruwarqan, ichaqa manan “Diosmanta allintachu yacharqan” (Romanos 10:2). Bautizakusqanta allinpaq Dios qhawarinanpaqqa ñaupaqtan Bibliamanta cheqaq kaqta allinta yachanan, jinaspan chayman jina kausanan, chaymantataq Diosman prometekuspa wajmanta bautizakunan. Chayta ruwaspaqa manan juchatachu ruwashan, aswanpas Diospa munasqanman jinan ruwashan.

 Jujniray bautizakuykunamanta

 Jesuspa qatikuqninkunaqa unupin bautizakurqanku, Bibliapin ichaqa rimashallantaq jujniray bautizakuykunamanta. Wakinmanta yachasun:

 Bautizaq Juanpa bautizasqanmanta. e Judío runapas judío runaman tukupuq runapas bautizaq Juanwanmi bautizachikuqku, ñaupaqtan ichaqa Moisesman Diospa qosqan kamachikuykuna contra juchallikusqankumanta pesapakuqku. Juanpa bautizasqanqa runakunatan yanaparqan Mesías kasqanta reparanankupaq chaskinankupaq ima (Lucas 1:13-17; 3:2, 3; Hechos 19:4).

 Jesuspa bautizakusqanmanta. Jesustaqa bautizaq Juanmi bautizarqan, ichaqa jujniraymi karqan juj runakunaq bautizakusqankumantaqa. ¿Imarayku? Payqa ch’uyan karqan, manan jayk’aqpas juchallikurqanchu (1 Pedro 2:21, 22). Jesusqa manan juchasapa runakuna jinachu juchamanta pesapakuspa otaq “allin concienciayoq” kananpaqchu bautizakurqan (1 Pedro 3:21). Aswanpas bautizakusqanwanmi rikuchirqan Diospa munayninta ruwananpaq ajllasqa Mesías pay kasqanta. Noqanchisraykun payqa vidanta qorqan (Hebreos 10:7-10).

 Santo espirituwan bautizasqa kaymanta. Bautizaq Juanpas Jesuspas rimarqankun santo espirituwan bautizakuymanta (Mateo 3:11; Lucas 3:16; Hechos 1:1-5). Ichaqa chay bautismoqa manan kaqllachu santo espirituq sutinpi bautizakuywanqa (Mateo 28:19). ¿Imaraykun mana kaqllachu?

 Santo espirituwan bautizakuqkunaqa Jesusta qatikuqkunan kanku, ichaqa pisillan kanku. Chay cristianokunaqa santo espirituwan ajllasqan kanku, paykunaqa janaq pachamantan Jesuswan kuska reykuna jina sacerdotekuna jina kay jallp’a pachata gobiernanqaku f (1 Pedro 1:3, 4; Apocalipsis 5:9, 10). ¿Pikunatan gobiernamunqaku? Kay pachapi millonninpi wiñay kausayta suyakuq Jesusta qatikuq runakunatan (Mateo 5:5; Lucas 23:43).

 Jesuspi bautizasqa kaymanta wañuyninpi bautizasqa kaymantawan. Santo espirituwan bautizasqa kaqkunaqa “Jesuspi bautizasqan” kallankutaq (Romanos 6:3). Chay bautismotaqa chaskinku janaq pachamanta Jesuswan kuska gobiernamunankupaq ajllasqa kaqkunallan. Paykunaqa Jesuspi bautizasqa kaspan paypa iñiq t’aqanmanta kapunku; Jesusmi umaqa, paykunataq cuerponpa partenkuna kanku (1 Corintios 12:12, 13, 27; Colosenses 1:18).

 Janaq pachaman rinankupaq ajllasqa cristianokunaqa Jesuspa “wañuyninpi bautizasqan” kallankutaq (Romanos 6:3, 4). Chay cristianokunaqa manan paykunapaqñachu kausanku, aswanpas tukuy atisqankutan kallpachakunku Jesús jina Jehová Diosta kasukunankupaq, paykunaqa allintan yachanku suyakuyninkuqa mana kay jallp’api wiñaypaq tiyanankupaqchu kasqanta. Chaymantapas paykunaqa wañupusqanku qhepamanmi espíritu cuerpopi janaq pachapi tiyanankupaq kausarichisqa kanku, chaywanmi Jesuspa wañuyninpi bautizasqa kanku (Romanos 6:5; 1 Corintios 15:42-44).

 Ninawan bautizasqa kaymanta. Bautizaq Juanmi nirqan: “Paymi [Jesusmi] bautizasunkichis santo espirituwan ninawan ima. Wayrachinanqa makinpin kashan, eranta allintapuni limpiaspan payqa trigonta taqena wasiman oqarinqa, q’opatataq mana jayk’aq wañuq ninapi kanapunqa”, nispa (Mateo 3:11, 12). Chaypi nisqanman jinaqa ninawan bautizasqa kaywan, santo espirituwan bautizasqa kaywanqa manan kaqllachu. Chhaynaqa, ¿imatataq chay nisqanwanri nishanman karqan?

 Trigoqa tupan Jesusta uyarispa kasukuqkunawanmi, paykunaqa santo espirituwanmi bautizasqa kayta atinkuman. Q’opataq tupan Jesusta mana kasukuqkunawan, paykunaqa ninawan bautizasqan kanqaku, chayqa wiñaypaq chinkachisqa kaywanmi tupan (Mateo 3:7-12; Lucas 3:16, 17).