Jesuspa yachachikuyninkuna

¿Imatan ruwana familia ukhupi kusisqa kawsanapaq?

¿Imaynatan qhawarina casarasqa-kayta?

Diosmi casarakuyta paqarichirqan. Chaymi Jesusta divorciakuymanta tapuqtinku, khaynata kutichirqan: “¿Manachu Diospa Simin Qelqata leerqankichis? Diosqa qallariypi kamarqan qharita warmitawanmi. Diospa Simin Qelqan nin: ‘Chayraykun runaqa taytantapas mamantapas saqepunqa, hinaspan warminman hukllachaykakapunqa, huk cuerpollataq kapunqaku’, nispa. Chay hinaqa, manan iskayñachu kanku aswanpas huk cuerpollañan. Chayrayku, runaqa Diospa hukllachasqantaqa ama t’aqachunchu [...]. Pipas warminmanta ima hawallapas t’aqakunman wak qhariwan mana wasanchashaqtin, hinaspa wak warmiwan casarakapunman chayqa, wasanchay huchatan ruwan”, nispa (Mateo 19:4-6, 9). Jesuspa nisqanta casarasqa warmi-qhari kasukuqtinkun llapa familia ukhupi kaqkuna kusisqa kawsanqaku.

Kusisqa kanapaqqa Diostan munakuna

Jesusmi nirqan: “Señor Diosniykitan munakunki tukuy sonqoykiwan, tukuy almaykiwan, tukuy yuyayniykipiwan. Chaymi aswan chaniyoq ñawpaqkaq kamachikuyqa. Iskaykaq aswan chaniyoqqa kaymi: ‘Runamasiykitan qan kikiykita hina munakunki’”, nispa (Mat. 22:37-39). Chhaynaqa familiapi kusisqa kawsanapaqqa Diostan munakuna, payta munakusun chayqa, runamasinchistapas munakusunmi. Familianchispas runamasinchismi.

 ¿Imaynatan warmi-qhari tratanakunanku?

Jesusqa allin ejemplon qosakunapaq. Payqa esposanta hinan Diospa llaqtanta qhawarirqan, chaymi chay llaqtarayku wañurqan (Efesios 5:25). Chaymi nirqan: ‘Manan servichikunaypaqchu hamurqani, aswanpas servinaypaqmi’, nispa (Mat. 20:28). Chaymi Jesusqa qatikuqninkunata llamp’u sonqowan sumaqta tratarqan. Manan hayk’aqpas millaytaqa pitapas rimapayaqchu (Mateo 11:28). Chaymi qosakunaqa Jesús hina sumaqta umallinanku.

Esposakunapas Jesustan qatikunanku. Biblian nin: ‘Diosqa Cristoq umanmi, qharitaq esposanpa uman’, nispa (1 Corintios 11:3). Jesusqa manan pisichasqa hinachu sientekurqan Dios uman kasqanrayku, aswanmi Yayanta anchata respetarqan. Chaymi nirqan: “Ñoqaqa paypa sonqonman chayaqtapunin ruwani”, nispa (Juan 8:29). Dios sonqo esposaqa qosanpa umallisqantan kasukun.

Allin ejemplo tayta-mamakunapaq

Jesusqa sumaqtan wawakunata qhawarirqan, interesakurqantaq yuyaykusqankupipas sientesqankupipas. Huk kutinmi qatikuqninkuna mana munarqankuchu wawakunaq Jesusman asuykunankuta. Chaymi Jesusqa paykunata nirqan: “Wawakunaqa hinalla ñoqaman hamuchunku”, nispa (Lucas 18:15, 16). Manan wawakunallatachu munakurqan, wayna-sipaschakunatapas munakurqanmi. Paykunan huk kuti Jesusta alabasharqanku, chayta rikuspan wakin runakuna phiñakurqanku, paytaq chay runakunata anyaspa nirqan: “¿Manachu Diospa Simin Qelqata leerqankichis? Chaypin nin: ‘Qanqa huch’uy wawakunatan ñuñuq wawakunatan yachachirqanki allintapuni [alabanasuykikupaq]’”, nispa (Mateo 21:15, 16).

Wawakunapaq allin ejemplo

Jesusqa yachashallarqanpunin Diosmanta. Huk kutinmi 12 watallayoq kashaqtin tayta-mamanqa, “Dios yupaychana wasipi tarirqanku kamachikuy simita yachachiqkuna chawpipi tiyashaqta, Jesusqa paykunatan uyarisharqan tapusharqan ima”. Yachachiqkunataq payta uyarispa admirakurqanku “yachayninmanta, kutichisqankunamantawan” (Lucas 2:42, 46, 47). Chhayna yachayniyoq kaspapas manan hayk’aqpas umantaqa hoqarirqanchu nitaq tayta-mamanwan churanakurqanchu, aswanmi “paykunata kasukuspa tiyarqan” (Lucas 2:51).

Chaykunamanta astawan yachayta munanki chayqa qhawariy ¿Imatapunin Biblia yachachin? * nisqa librota 14 capitulota.

[Uranpi willakuy]