Kay revistata leeqkunaq tapukusqan

Huk warmiq wiksanpi wawa wañunman chayri, ¿kawsarimpunmanchu chay wawa?

Manan llapa tayta mamakunaq wawanchu wañunku, paykunaqa manapaschá entiendenkumanchu wawanku wañusqanmanta llakipi tarikuq tayta mamakunata. Wakin tayta mamakunaqa sinchitapunin llakikunku wawankuq wañupusqanmanta. Chaypaq yachasunchis huk cristianamanta. Chay cristianan phisqa kutipi wañusqa wawata onqokusqa. Chay qhepaman iskay wawakunayoqña karan chaypas, payqa yuyarishallaranmi wañusqa wawankunata. Wañunankaman payqa yuyashallaran sapanka wawanpas hayk’a watayoqchus kanman karan chayta. ¿Kawsarimunkumanchu wañusqa naceq wawakuna?

Chayqa manan yachakunchu, Bibliapiqa manan willanchu chay wawakuna kawsarimunqakuchus icha manachus chayta. Ichaqa rimanmi wawakunamanta, chaykunaqa yaqapaschá yanapawasunman.

Chaypaq ñawpaqta yachasunchis hayk’aqmantapachachus Jehová Diospaq huk runaq kawsaynin qallarisqanmanta, nacesqan qhepamantachu icha wiksapi chayraq wiñayta qallarisqanmantachu chayta. Chaymantataq yachasunchis Jehová Dios kawsaq runata hinañachus manaraq naceq wawata qhawarin icha manachus chaytawan. Chaykunataqa Bibliawanpunin yachasunchis.

Moisespa chaskisqan kamachikuypa nisqanman hinaqa, kawsayqa manan wawaq nacesqan qhepamantachu qallarin, aswanpas ñawpaqmantapachan. Chayraykun pipas wiksapi kaq wawata wañuchiqqa wañunallantaq karan. Arí, “kawsaymanta[n] kawsayta” qonan karan (Éxo. 21:22, 23). * Chaypi rikusqanchis hina, wiksallapiraq kaq wawaqa kawsaq runa hinañan. Chaymi yuyaypipuni wiksallapiraq kaq wawata wañuchiyqa Diospa contranpi huchallikuy. Chayraykun cristianokunaqa wiksallapiraq kaq wawataqa mana wañuchinkuchu.

Rikusqanchis hina, wawaq kawsayninqa qallarin mamanpa wiksanpi rikhurisqanmantapachan. Chhaynaqa, ¿imaynatataq Jehová Diosri qhawarin wiksallapiraq kaq wawakunata? Payqa kawsaq runakunata hinan chay wawakunataqa qhawarin, chaychá kamachikuranpas pipas manaraq naceq wawata wañuchiqqa wañuchisqallataq kananpaq. Bibliapi huk textokunapas rikuchillantaqmi wiksallapiraq kaq wawakuna Jehová Diospaq ancha valorniyoq kasqanta. Chaymanta rimashaspan rey Davidpas Diospa yuyaychasqan kaspa khaynata niran: “Qanmi mamaypa wiksanpi hank’ukunawan minichawarqanki [...]. Cuerpoypa wiñasqantapas qanqa rikurqankin pakallapi kamasqa kashaqtiypas”, nispa (Sal. 139:13-16; Job 31:14, 15).

Chaymantapas Jehová Diosqa yachanmi sapanka wawa imaynachus kasqanta. Chaypaq yachasun Isaacpa señoran Rebecamanta. Pay Jacobmanta Esaumantawan onqoq kashaqtinmi chay wawakunaqa wiksanpi maqanakusqaku, chaymi Jehová Diosqa chay wawakunamanta huk profeciata willasqa. ¿Imaynapin chayta yachanman karan? Payqa rikusharanyá wawakuna imaynatachus mamanpa wiksanpi wiñashasqankuta (Gén. 25:22, 23; Rom. 9:10-13).

Yachallasuntaq bautizaq Juanmanta. Biblian nin: “Mariaq napaykusqanta Elisabet uyariqtin hinataq, wiksanpi wawaqa ‘wat’ak’ nirqan. Hinan Santo Espirituqa Elisabetman hunt’aykurqan”, nispa (Luc. 1:41). Chay textopin Lucasqa “wawa” nispalla nin wiksallapiraq kaq wawata. Jesús uywa qaranapi kashaqtinpas “wawa” nispallataqmi nin (Luc. 2:12, 16; 18:15). Chaypi rikusqanchis hina, griego rimaypiqa nacesqatapas mana nacesqatapas “wawa” nispallan nikun.

 Bibliaq yachachisqan hina, yaqachus hina kaqlla kankuman nacesqapas manaraq nacesqapas. Kay tiempopi allin yachaq runakunapas chhaynallatataqmi wawakunamantaqa yachachishanku. Chay runakunaq yachachisqankuman hinaqa, wiksallapiraq kaq wawakunaqa reparankus hawapi imachus pasasqanta, chaykunata reparaspataqsi kuyukachanku. Chaychá mamakunaqa onqoq kashaspaqa wiksanpi kaq wawankuta anchata munakunku.

Chaymantapas wawakunaqa manan kaq tiempollamantachu nacenku. Yaqapaschá huk warmi onqokunman onqokunan tiempomanta ñawpaqtaraq, hinaspa chay wawa iskay kinsa p’unchayllamanta wañukapunman. Huk onqoq warmiq wawantaq wañurapunman nacenanpaq pisillaña kashaqtin. Chhaynaqa, ¿allinchu kanman: “Kawsashasqalla naceq wawallan kawsarimpunqa”, nispa niy? Manachus hina riki.

Kunan yachasqanchis hina, wawaq kawsayninqa qallarin mamanpa wiksanpi rikhurisqanmantapachan. Bibliapunin yachachin chhayna kasqanta, chaychá Jehová Diospas chay wawakunataqa huk runata hinaña qhawarin; arí, paypaqqa ancha valorniyoqmi chay wawakunaqa. Chaykunata Bibliaq yachachisqanta yachaspaqa yaqapaschá wakin cristianokunaqa ninkuman: “Manachus hina allinchu kanman ‘wiksallapiraq wañupuq wawakunaqa manan kawsarinqakuñachu’, nispa niyqa”, nispa. Chaymantapas yaqapaschá ninkuman: “Manachus kawsarimpunkuman chayqa, manachá wiksapi wawachata wañuchiyqa huchachu kanman”, nispa.

Ñawpaqpin kay revista khaynata yachachiran: ‘Manachus hina wiksallapiraq wañuq wawakunaqa kawsarimpunkumanchu. ¿Churanmanchu Dios wañusqa naceq wawata mamitanpa wiksanman chhaynapi kawsashaq nacemunanpaq?’ nispa. Chhaynataña yachachiran chaypas manachus hina allinchu chayqa kasharan, chaymi Umalliq T’aqaqa allinta estudiaspa, yuyaymanaspa hinallataq Diosmanta mañakuspa ima repararanku Diospaqqa mana sasachu manaraq naceq wawatapas kawsarichiy kasqanta. Jesuspunin niran: “Diosqa tukuy imatapas atinmi”, nispa (Mar. 10:27). Diosqa Jesuspa kawsaynintapas hanaq pachamantapachan huk warmiq wiksanman astamuran. Chay ruwayqa mana atikuqmi runapaqqa, Diospaqmi ichaqa mana sasachu karan.

Chhaynaqa, ¿kawsarimunqakuchu wiksallapiraq wañupuq wawakuna? Manan yachanchischu, Bibliaqa manan imaninpaschu chaymantaqa. Chayraykun mana nisunmanchu: “Kawsarinqakun” otaq “manan kawsarinqakuchu”, nispaqa. Chay wawakunawan imachus kananmanta imaymanata tapukushanamantaqa Jehová Diospa makinman chaytaqa saqesun, payqa ancha munakuq Diosmi khuyapayakuqtaq kanpas (Sal. 86:15). Yachasqanchis hina, payqa maytapunin munashan munakusqanchis runakunata kawsarichispa llakikuyninchis tukuchiyta (Job 14:14, 15). Arí, payqa allin kaqllatapunin ruwanqa, tukuy imaymana mana allinkunatan llapanta chinkachipunqa, chaypaqmi Jesusta akllaran, paymi ‘saqraq ruwasqankunata thuninqa’ (1 Juan 3:8).

[Uranpi willakuy]

[13 paginapi foto]

Jehová Diosqa tukuchinqan tukuy imaymana llakikuyninchista