JUJ ancha sumaq regalota chaskikuspaqa agradecekuqmi kananchis. Jesusmi rimaran agradecido kay allinpuni kasqanmanta. Chunka runakunatan jampiran, onqoyninkupaqqa manan jampi karanchu. Jujnin runan “alto kunkawan Diosta jatunchaspa kutimuran”, chaymi Jesús niran: “¿Manachu chunka runakuna qhaliyachisqa karanku? Chhaynaqa, ¿maytaq wakin isqon runakunari?”, nispa (Lucas 17:12-17). Chay willakuymi yuyarichiwanchis, mayninpiqa ratullan qonqapusunman jujkunaq imapas ruwapuwasqanchista.

Rikusqanchis jina, kacharichiy regalo jinaqa manan imapas kanchu. Chhaynaqa, ¿imatan ruwasunman noqanchispaq Diospa tukuy ruwasqanmanta?

• Regalo qoqniykita reqsiy. Kacharichiy regaloqa manan jinallamantachu lliu runaman wiñay kausayta qon. Aswanpas Jesusmi taytanman oracionta ruwaspa niran: “Paykuna wiñay kausayta  chaskinankupaqqa qan sapallan cheqaq Diostan reqsinanku, reqsinallankutaqmi kachamusqayki Jesucristotapas”, nispa (Juan 17:3). Sichus willasunkikuman wawallaraq kashaqtiyki juj runa vidayki salvasqasuykita chayqa, reqsiytachá munawaq. Kacharichiy regalo qowaqninchis Jehová Diospas munanmi reqsinanchista, amigon kananchistapas. Chaymi Biblia niwanchis: “Diosman achhuykuychis, jinan paypas qankunaman achhuykamusunkichis”, nispa (Santiago 4:8).

• Kacharichiypi iñiy. “Pipas Churipi iñiqqa wiñay kausayniyoqmi kanqa” (Juan 3:36). ¿Imaynatan ‘iñisunman’? Kacharichiypi iñiyninchistaqa ruwaywanmi rikuchinanchis (Santiago 2:17). Juj regalo qanpa kapunanpaqqa makiykita jaywarispan chaskikunayki. Chay jinatan kacharichiy regalotapas chaskikunayki. ¿Imaynata? Yachanaykin imayna kausanaykitan Dios munan chayta, jinaspa chayman jina ruwanayki. * Diosmanta mañakuy juchaykita perdonanasuykipaq, allin concienciatapas qonasuykipaq. Sichus kacharichiypi iñinki chayqa, suyakuwaqmi jamuq tiempopi wiñay kausay chaskiyta (Hebreos 11:1).

• Jesuspa wañupusqanta yuyarinapaq juñunakuyman riy. Kacharichiyta mana qonqanapaqmi Jesús watapi juj kutita yuyarinapaq juñunakuyta qallarichiran. Niranmi: “Kaytaqa ruwallankichispunin noqata yuyariwanaykichispaq”, nispa (Lucas 22:19). Kay watapin Jehová Diospa testigonkuna martes 11 abril p’unchayta yuyarisaqku, inti jaykuy qhepata. Chay juñunakuyqa yaqa hora jinan duran, chaypin explicakunqa Jesuspa wañupusqanmanta, jinallataq imaynata kay tiempopi jamuq tiempopipas yanapawananchismanta. Qayna wataqa 20 millones runakunan pachantinpi riranku. Invitasqan kashanki chay juñunakuyman rinaykipaq, chhaynapi Diospa ancha sumaq regalonmanta agradecekunaykipaq.