‘[Gobernantekuna gobiernachkaptinmi] hanaq pacha Dios hatarichinqa mana tuñichiy atina gobiernota, chay gobiernoqa huk runamanqa manam qosqachu kanqa wiñaypaqpas. Aswanqa chay gobiernom llapallan wakin gobiernokunata ñutupaspan chinkachinqa hinaptinmi chay puchuruq gobiernollaña takyanqa wiñaypaq’ (Daniel 2:44).

Diospa Gobiernonqa hanaq pachapim. Chay gobiernopi kamachinanpaqmi Jesucristo nombrasqa kachkan. Paymi gobernantekunapa rantinpi kamachispan kay Pachapi Jehova Diospa munayninta cumplichinqa hanaq pachapi ruwasqanman hina (Mateo 6:9, 10). Runakunaqa manañam gobernanqakuñachu ‘salvawaqninchik Señor Jesucristoñam’ kamachimunqa, chaymi hawkayaypiña kawsakusun (2 Pedro 1:11).

‘Diablopas tikrakunmi achkirichkaq angelman. Chaynam diablopa serviqninkunapas tikrakun allin serviqmanraq, ichaqa huk punchawmi sentenciasqa kanqaku ruwasqankuman hina’ (2 Corintios 11:14, 15).

Pantay religionpi kaqkunaqa qawachisqam kanqaku Diablopa tanteasqanman hina rikurichisqa kasqankuta. Chayna religionkuna Allpantinpi manaña kaptinqa manañam kanqachu religionpi hapipakuspa cheqninakuyqa nitaq wañuchinakuyqa. Chaynapim Diosman sonqo runakunaqa “cheqap Diostaña” servinqaku huk ‘iñiyllapi’ otaq ‘cheqap espirituwan yupaychanqaku’. Hinaptinmi hawkayaypi huk sonqolla kawsakunqaku (1 Tesalonicenses 1:9; Efesios 4:5; Juan 4:23).

“Diosqa runakunawanñam yachachkan. Paykunam kanqa runankuna, Diosñataqmi kanqa paykunapa Diosnin. Diosmi pichanqa paykunapa weqenta, manañam kanqachu wañuypas, lutokuypas, waqaypas nitaq nanaypas. Ñawpaq kaqkunaqa pasarunñam” (Apocalipsis 21:3, 4).

 Jehova Diosmi chayta ruwanqa Churin Jesucristo runakunata librananpaq wañusqanwan (Juan 3:16). Jesucristo gobiernaptinmi runakunapa pantaq otaq huchallikuq kayninku chinkanqa. Chaywanmi ñakariykunaqa manaña kanqachu, ‘Diosmi runakunawan kanqa, paykunapa weqentam pichanqa’. Chaymantapas ‘allin ruwaq runakunallam allpataqa dueñoyanqaku. Paykunaqa chaypimiki wiñaypaqraq kawsakunqaku’ (Salmo 37:29).

‘[Jesucristom] Dragonta hapiruspan waranqa watapaq watarunqa, chay Dragonqariki ñawpaq culebram hinaspa Satanaswan sutichasqa diablom. Payta uku pozoman wischuykuspanmi punkunta wichqarunqa hinaspam segurananpaq sellarunqa, chaynapi nacionkunatapas manaña engañananpaq’ (Apocalipsis 20:2, 3).

Satanaswan demoniokunaqa watasqam “uku pozoman” wischusqa kanqaku, chaymi ima ruwaytapas manaña atinqakuñachu. Manataqmi runakunapiqa munaychakunqakuñachu. Paykuna manaña kaptinqa, ¡mayna kusikuypichá kawsakusun!

Jesucristopa nisqanman hinam ‘tukupay tiempoqa’ tukunqa ‘llumpa-llumpay ñakariywan’. Paymi nirqa: “Llumpa-llumpay ñakariy punchawkunam kanqa, manam chaynaqa Dios kay pachata unanchasqanmantapunipas kunankama karqachu, manataqmi chaynaqa kanqachu qepa punchawkunapipas”, nispa (Mateo 24:21).

Chay llumpa-llumpay ñakariyqa enteron Pachapim mana haykapipas kasqanman hina kanqa, chaywanmi qallarinqa ‘Tukuy atiyniyoq Diospa punchawninpi guerran’, chaytam sutichanku “Armagedonwan” (Apocalipsis 16:14, 16).

Allinlla kawsakuy munaqkunaqa ancha kusikuywanmi chay punchawta suyachkanku. Jehova Dios Gobiernamuptin ima bendicionkuna kananmantayá qatiqninpi yachasun.

“Achkallaña” runakunam kay pachapi hawka kawsanqaku: Diospa Palabranmi willawanchik mana yupay atina “achkallaña” runakuna ‘llumpa-llumpay ñakariymanta’ librakusqankuta, paykunam mosoq pachapi hawkaña kawsakunqaku (Apocalipsis 7:9, 10, 14; 2 Pedro 3:13). Paykunaqa reqsikunqakum ‘Diosmanta hamuq Carnero [otaq Jesucristopa] wañusqanwan huchanchikmanta pampachawaspanchik librawasqanchikmanta’ (Juan 1:29).

Diospa yachachikuyninkunawanmi runakunaqa hawkalla kawsanqaku: Mosoq allpapiqa llapallan runakunam Jehova Diosmanta allintapuni yachanqaku (Isaias 11:9). Tukuy Unanchaq Diosmi runakunaman yachachinqa Allpa pachapi unanchasqankunata respetanankupaq. Jehova Diosmi nin: “Yupaychasqayki Tayta Diosmi ñoqaqa kani. Allinnikipaq yachachiqnikim kani. Imaynam kawsanaykipaq yachachiqnikim kani”, nispa (Isaias 48:17).

Kuyasqa ayllunchikkunam kawsarimunqaku: Jesucristo kay Pachapi kaspanmi amistadnin Lazarota kawsarichirqa (Juan 11:1, 5, 38-44). Diospa Gobiernonpi kamachispanmi wañusqakunata kawsarichimunqa Lazarota hina (Juan 5:28, 29).

Wiñaypaqmi kanqa hawkayay chaynataq justicia: Jesucristo kamachiptinqa kanqam justicia. Payqa atiyniyoqmi runakunapa imayna sonqoyoq kasqankuta yachananpaq, payqa yachanqam pitaq allin otaq mana allin runa kasqankuta. Mana allin kaqkunata hinalla ruwaqkunaqa manam kawsanqakuchu Diospa Gobiernonpiqa (Salmo 37:9, 10; Isaias 11:3, 4; 65:20; Mateo 9:4).

Hamuq tiempopi wakin bendicionkunallamantam yacharunchik. Diospa gobiernonpiqa wiñaypaqmi ‘hawkayay’ kanqa enteron Allpa pachapi (Salmo 37:11, 29). Tukuy ñakarichiwaqninchikkunam chinkachisqa kanqa. Jehova Diosmi prometewanchik: ‘Ñoqam mosoqyachisaq tukuy imata. Kay nisqaykunaqa confiakunapaqmi hinaspa cheqapmi’, nispa (Apocalipsis 21:5).