‘Nisqaykunapi’ takyaychik

‘Nisqaykunata seguispaykichikqa cheqap discipuloykunam kankichik. Cheqap kaqmantam yachankichik, chaymi libreyachisunkichik.’ (JUAN 8:31, 32)

¿Imatam Jesusqa chaywan niyta munarqa? “Nisqaykunata” nispanqa yachachisqanmantam nichkarqa. Ichaqa manam paymantachu karqa chayna yachachisqanqa. Jesusmi nirqa: “Taytaymi kamachiwarqa imam rimarinaytaqa chaynataq imam yachachinaytaqa” nispa (Juan 12:49). Taytanta mañakuspanmi Jesusqa kaynata reqsikurqa: “Palabraykiqariki cheqapmi”, nispa. Chaymi imamantapas yachachispanqa ñawpa tiempopi serviqninkunaman Taytanpa nisqanta qawachirqa (Juan 17:17; Mateo 4:4, 7, 10). Hinaptinqa, ¿imaynatataq cheqap cristianokunaqa Jesuspa nisqanpi takyanmanku? Diospa Palabranta kasukuspam, chaymi cheqapqa imapi creenapaqpas imayna kawsanapaqpas.

Ñawpa cristianokunapa ejemplon. Apostol Pablopas Jesus hinam Diospa Palabranta respetarqa. Chaymi nirqa ‘Bibliapi llapallan qellqasqa kaqkunaqa Diospa espiritunpa qosqanmi, allinmi yachachiwananchikpaq’, nispan (2 Timoteo 3:16). Chaymantapas congregacionpi cuentallikuq qarikunatam nirqa: ‘Chaskisqaykichik cheqap yachachikuykunata yachachiychik’, nispa (Tito 1:7, 9). Wakin iñiqmasinkunatapas nirqam: ‘Amayá engañachikuychikchu yachayninkumanta rimaqkunawanqa hinaspa yanqakunalla rimaqkunawanqa, paykunaqa manam Cristomanchu hapipakunku aswanqa runakunapa costumbrenkunallamanmi’, nispa (Colosenses 2:8).

¿Pikunataq kunanpas Diospa Palabranta respetanku? 1965 kaq watapim Iglesia Catolicapi umalliq obispokuna huk qellqankupi kaynata nirqaku: ‘Iglesiaqa manam Bibliapa nisqanmantapunichu lliwta yachachin. Ichaqa tukuy sonqowanmi kasukuna costumbrenchikkunatawan yachachisqanchikkunata chaynataq Bibliapa yachachisqantapas’, nispa. (Constitución dogmática sobre la divina revelación.) Canadá nacionpi lloqsiq huk revistapim religionninpi umalliq huk warmi nirqa: ‘¿Imanasqataq kasukunanchik 2.000 wata masniyoq qellqapa nisqanta? Ñoqanchikpas allinkunata tanteaqmi kanchik ichaqa imapas tanteasqanchikqa yanqachakunmi Jesuspa yachachisqanpi chaynataq Bibliapa nisqanpi hapipakusqaqa’, nispa. (Maclean’s.)

Catolicokunapa huk qellqanñataqmi Jehová Diospa testigonkunamanta nirqa: ‘Paykunaqa Bibliapa nisqanman hinam creenku, chayman hinataqmi kawsankupas’, nispa. (New Catholic Encyclopedia.) Canadá nacionpim huk hermana predicananpaq huk runaman asuykuchkarqa hinaptinmi chay runaqa chaylla nirqa: ‘Yachaniñam pim kasqaykichikta’, nispa. Biblianta tuqpispanmi nirqa: ‘Chay hapisqaykiwanmi reqsichikunki’, nispan.