Yachachikuypa kasqanman rinapaq

Yachachikuyman rinapaq

Paykunaqa ‘kuyanakunkum’

Paykunaqa ‘kuyanakunkum’

 Paykunaqa ‘kuyanakunkum’

“Mosoq kamachikuytam qoykichik, kuyanakuychikyá. Imaynam ñoqa kuyaykichik chaynayá qamkunapas kuyanakuychik. Kuyanakuptikichikqa llapallan runakunam yachanqa discipuloykuna kasqaykichikta.” (JUAN 13:34, 35)

¿Imatam Jesusqa chaywan niyta munarqa? Jesucristom qatiqninkunata nirqa paypa kuyasqanman hina kuyanakunankupaq. ¿Imaynatam paykunata kuyarqa? Payqa lliw runatam allinpaq hapirqa, warmikunatapas respetarqam (Juan 4:7-10). Samarinan kachkaptinpas runakunata yanapananpaqmi tiempochakurqa (Marcos 6:30-34). Runakunarayku wañusqanwanmi kuyakuyninta astawan qawachirqa. Chaymi nirqa: “Ñoqaqa kani allin michiqmi. Allin michiqqa vidantam qon ovejankunarayku”, nispan (Juan 10:11).

Ñawpa cristianokunapa ejemplon. Ñawpa cristianokunaqa wawqe-panintin kasqankutam reqsichikurqaku (Filemon 1, 2). Maylaw nacionmanta kaptinkupas kusikuywanmi chaskiqku. Paykunaqa ‘mana judio kaqkunawanmi igualla karqaku. Señorninchik lliwchanchikpaq chullalla’ kasqanrayku (Romanos 10:11, 12). 33 kaq watapi Pentecostes fiesta tukuruptinmi Jerusalenpi cristianokuna ‘chakrankutawan imapas kapuqninkuta rantikurqaku hinaspam qollqenkuta rakirqaku necesitasqankuman hina’. ¿Imapaqtaq chayta rurarqaku? Chayraq bautizasqakuna Jerusalenpi qepaspanku apostolkunapa yachachisqankuta hinalla uyarinankupaqmi (Hechos 2:41-45). ¿Imataq kallpancharqa yanapanakunankupaq? Apostolkuna wañusqankumanta 200 wata qepatam Tertuliano sutiyoq runa cristianokunamanta hukkunapa nisqaman hina qellqarqa: ‘Qawaychik kuyanakusqankuta chaynataq mayqenninkupa rantinpi wañuy munasqankutapas’, nispa.

¿Pikunataq chaynata ruranku? Cristianom kaniku niqkuna unay wataña ñakarichinakusqankumantam huk libro nirqa: “Mana iñiqkunapa ñakarichisqanmantapas astawanraqmi ñakarichinakurqaku”, nispa. (Historia de la decadencia y ruina del Imperio romano.) Kay tiempopipas Estados Unidos nacionpim yachaysapa runakuna cuentata qokurqaku religionniyoq kaspankupas huk castayoq runakunata cheqnipakusqankuta, paykunamantaqa yaqa llapankum cristiano tukuq kanku. Tukuy nacionmanta kaqkuna hina religionllamanta kaspankupas manam kuyanakunkuchu. Chaymi ima desgraciapas pasaptinqa mana yanapanakunkuchu.

Florida (EE.UU.) llaqtapim 2004 kaq watapi iskay killallapi tawa kutita sinchi wayrakunawan hatun desgraciakuna karqa. Tiempo pasaytam chay llaqtapi yanapakuykuna chaskisqankumanta cuentallikuq runa yachayta munarqa yanapakuykuna imayna aypusqankumanta. Chaymi Jehová Diospa testigonkunalla imatapas allinta aypusqankumanta cuentata qokuspan ima necesitasqankutapas qonanpaq nirqa. 1997 kaq watapipas guerra kachkaptinmi República Democrática del Congo nisqa nacionninta yaykurqaku hampita, mikuyta hinaspa pachata iñiqmasinkuman apaspanku. Chay apasqankuqa huk millon dolarpa chaninmi karqa.