Diosqa runapa sonqontam qawan
Diosman asuykuychik
Diosqa runapa sonqontam qawan
RUNAPA rikchayninqa pantarachiwachwanmi. Manamá llapanpiqa qawachinchu imayna kasqantaqa. Arí, runakunaqa imatapas ninku qawasqankuman hinallam, Jehová Diosmi ichaqa mana chaynachu. Chaytam qawachin 1 Samuel 16:1-12.
Piensariy kaypi. Diosqa Israel nacionpa mosoq reynintam akllananpaqña kachkan. Chaymi willakuq Samuelta nin: “Ñoqam munachkani Belen llaqtayoq Isai sutiyoq runapa wasin rinaykita. Paypa huknin churintam akllaruniña rey kananpaq”, nispa (1 versiculo). Jehová Diosqa manamá ninchu pim kasqantaqa, aswanqa ninmi Isaipa huknin churin kasqallanta. Yaqapaschá Samuelqa Belen llaqtaman risqanpi kaynata tapukun: “¿Imaynatam yachasaq Isaipa churinmanta mayqanta Jehová Dios akllarusqanta?”, nispa.
Chayaruspanmi Samuelqa alistakun Jehová Diospaq ofrendata rurananpaq hinaspam Isaita nin churinkunapiwan chaypi kanankupaq. Isaipa piwi churin Eliabta qawaykuspanmi, Samuelqa admirakurqa rey hina rikchayniyoq kasqanmanta. Hinaspanmi piensarqa paytapuni rey kananpaq Jehová Dios akllarusqanta (6 versiculo).
Diosmi ichaqa mana chaynatachu qawan. Samueltam nin: “Amayá allin rikchaynillantachu qawayqa nitaq sayaynillantachu. Paytaqa manam munanichu”, nispa (7 versiculo). Diosqa manamá admirakunchu Eliabpa rikchayninwanqa. Diospaqqa runapa sumaq kasqanqa manam qawakunchu rikchaynillanpiqa.
¿Imaynatam yachanchik? Diosmi Samuelta nin: “Runapa qawasqanqa manam ñoqapa qawasqay hinachu. Runaqa qawan hawallantam, ñoqam ichaqa qawani sonqonta”, nispa (7 versiculo). Arí, Diosqa runapa sonqontam qawan, chaypim kachkan ima piensasqanchik, imayna kayninchik hinaspa imayna sientekusqanchikpas. Chaymi Bibliaqa nin, ‘runapa sonqonta’ Dios qawasqanta (Proverbios 17:3). Chayraykum Jehová Diosqa Eliabtawan soqta wawqenkunatapas mana akllarqachu.
Isaipaqa kachkanraqmi sullka kaq churinpas, Davidmi sutin, ‘payqa ovejakunatam michichkan’ (11 versiculo). Hinaptinmi qayachimun, chayaramuptillanmi Samuelta Jehová Dios nin: “Paymi, chaynaqa aceitewan tallispayá nombray rey kananpaq”, nispa (12 versiculo). David ‘allin rikchayniyoq buen-mozo’ kaptinpas, Diosmi akllan sumaq sonqoyoq kasqanrayku (1 Samuel 13:14).
Kunan tiempopi runakunaqa allin rikchaynillantam qawanku. ¡Mayna allinmi Jehová Diospa mana chayna kasqanqa! Payqa manam reparanchu hatun otaq taksa, sumaq otaq mana sumaq kasqanchikpiqa, aswanmi qawan sonqonchikpi imayna kasqanchikta. Kay yachasqanchikkuna, ¿manachu kallpanchawanchik Diospa agradonpaq hina sumaq kayniyoqkuna kananchikpaq?