1 Samuel 16:1-23
16 Chaymanta qipa punchawkunatam Jehova Diosqa Samuelta nirqa: “¿Haykapikamataq Saulmanta llakisqa kanki?+ Payqa manañam Israel runakunata kamachiqñachu kanqa.+ Chayraykuyá waqraman aceiteta huntachispayki+ Belen llaqtayuq Jeseypa wasinman riy.+ Paypa huknin churintam akllaruni kamachiq kananpaq”, nispa.+
2 Samuelñataqmi nirqa: “¿Imaynamá risaqqa? Saul yacharuspanqa wañurachiwanqam”, nispa.+ Hinaptinmi Jehova Dios nirqa: “Vaquillata pusaspaykim ninki: ‘Jehova Diospaq kay animalta nakaqmi hamuchkani’, nispa.
3 Hinaspam vaquillata nakasqaykiman hamunanpaq Jeseyta ninki. Chaypim nisqayki aceitewan pita tallinaykipaq”, nispa.+
4 Samuelqa Jehova Diospa kamachisqanta kasukuspanmi Belen llaqtaman rirqa.+ Llaqtaman chayaruptinmi llaqtapi punta apaqkuna manchakuymanta katkatataspanku nirqaku: “¿Imataq karun?”, nispa.
5 Samuelñataqmi nirqa: “Manam imapas. Jehova Diospaq kay animalta nakaqmi hamuchkani. Chaynaqa, chuyanchakuspayá Diospaq animalta nakasqayman hamuychik”, nispa. Chaymantam Samuelqa Jeseytawan churinkunata chuyancharqa, hinaspam animalta nakasqanman qayachirqa.
6 Jeseypa churin Eliabta qawaykuspanmi+ Samuelqa nirqa: “Paytachá Jehova Diosqa akllarun”, nispa.
7 Jehova Diosmi ichaqa nirqa: “Amayá sumaq rikchaynintawan sayaynillantachu qawayqa.+ Paytaqa manam akllanichu. Ñuqaqa manam runapa qawasqanman hinachu imatapas qawani. Runaqa hawallantam qawan, ñuqa Jehova Diosmi ichaqa sunqunta qawani”, nispa.+
8 Chaymantam Jeseyqa churin Abinadabta qayarqa+ Samuelpa kasqanman. Samuelñataqmi nirqa: “Jehova Diosqa manam paytapas akllanchu”, nispa.
9 Chaymi Jeseyqa churin Samatapas qayarqa.+ Samuelñataqmi nirqa: “Jehova Diosqa manam paytapas akllanchu”, nispa.
10 Jeseyqa qanchis churinkunatamá Samuelpa kasqanman qayarqa. Samuelmi ichaqa Jeseyta nirqa: “Jehova Diosqa manam mayqintapas akllanchu”, nispa.
11 Chaymantam Samuelqa Jeseyta nirqa: “¿Kayllachu llapan churikikuna?”, nispa. Jeseyñataqmi nirqa: “Kachkanraqmi sullka kaq,+ payqa ovejakunatam michichkan”, nispa.+ Chaymi Samuelqa Jeseyta nirqa: “Payta qayachimuy. Pay hamuptinñam mikusun”, nispa.
12 Jesey qayachiptinmi pusamurqaku. Hinaptinmi Jehova Dios nirqa: “¡Paymi akllasqayqa! Paymanyá aceitetaqa talliy”, nispa.+ Davidqa paqu chukchayuq, sumaq ñawiyuq hinaspa sumaq rikchayniyuqmi karqa.+
13 Hinaptinmi Samuelqa waqrapi aceiteta hapiykuspan+ wawqinkunapa qayllanpi Davidman talliykurqa. Chay punchawmantam Jehova Diospa atiynin Davidman huntaykurqa.+ Samuelñataqmi Rama llaqtaman kutikurqa.+
14 Jehova Diosqa manañam atiyninwanqa Saultaqa yanaparqañachu.+ Chaymi Saulqa manchakuypaq piñakuqllaña rikurirurqa Jehova Dios saqirusqanrayku.+
15 Chaymi Saultaqa runankuna nirqaku: “Dios saqirusuptikim chayna manchakuypaq piñasqallaña kachkanki.
16 Taytallayku, mayqanniykutapas niykuwaykuyá arpata allinta tocaq runata maskamunaykupaq.+ Chay maskamusqayku runam sapa kuti chayna tarikuptiki arpata tocapusunki, chaynapi sunquyki tiyaykunanpaq”, nispa.
17 Saulñataqmi nirqa: “Allinmi, ama hina kaspayá arpata allinta tocaq runata maskarapamuwaychik”, nispa.
18 Hukkaqninmi nirqa: “Riqsinim arpata allinta tocaq runata. Payqa Belen llaqtayuq Jeseypa huknin churinmi. Hinaspapas allin peleaq kallpasapa runam.+ Chaymantapas allin rimakuq hinaspa sumaq rikchayniyuq musum.+ Jehova Diospas paytaqa yanapanmi”, nispa.+
19 Chaymi Saulqa willakuqkunata kacharqa Jeseyta nimunankupaq: “Oveja michiq churiki Davidtayá kachamuway”, nispa.+
20 Chaymi Jeseyqa churin Davidta kacharqa Saulman, paywantaqmi apachirqa tantata, odrepi vinota hinaspa nakasqa cabrachatapas asnoman churkuykuspan.
21 Chaynapimá Davidqa Saulpata rispan arpata tocapurqa.+ Saulqa Davidtam anchata kuyarqa, hinaptinmi Davidqa Saulpa espadantawan lanzanta apaysiq.
22 Chaymantam Saulqa Jeseyman willachimurqa: “Churiki Davidqa hinallayá ñuqapaq llamkachun. Kaypi llamkasqanwanmi ancha kusisqa tarikuni”, nispa.
23 Saulta Dios saqiruptin manchakuypaq piñasqallaña kaptinmi Davidqa arpata tocapuq. Tocapuptinmi Saulpaqa sunqunpas tiyaykuq, manañam llumpay piñasqañachu tarikuq.+
