Yachachikuypa kasqanman rinapaq

Yachachikuyman rinapaq

¿Ima nintaq Bibliaqa sinkanapaq kaqkunamanta?

¿Ima nintaq Bibliaqa sinkanapaq kaqkunamanta?

 ¿Ima nintaq Bibliaqa sinkanapaq kaqkunamanta?

BIBLIAQA sinkanapaq kaqkunata pisillapi tomaytaqa manam harkanchu. * Diosqa vinotam qowanchik ‘sonqonchikta kusichinapaq. Aceitetam qowanchik uyanchikta llusikunapaq. Tantatañataqmi qowanchik kallpanchakunapaq’ (Salmo 104:15). Jesuspas runakuna kusikunankupaqmi casamientopi yakuta ‘allin vinoman’ tikrarqa (Juan 2:3-10).

Arí, Unanchawaqninchik Diosqa yachanmi sinkanapaq kaqkunaqa cuerponchiktawan yuyayninchikta hukmanyachisqanta. Payqa allinninchikta munaspanmi, Palabranpi qawachiwanchik llumpayta tomayqa mana allin kasqanta (Isaias 48:17).

Niwanchikmi: “Amayá vinowanqa sinkakuychikchu, chayqa viciokunamanmi apakun”, nispa (Efesios 5:18). Niwanchiktaqmi: “Diospa munaychakusqanmanqa manam yaykunqachu [. . .] sinkakuqkunapas”, nispa (1 Corintios 6:9-11). Chaymantapas cheqninmi ‘tomakuyllapi, fiestakunallapi puriytawan [. . .] chayman rikchakuq huchakunatapas’ (Galatas 5:19-21).

Ichaqa ¿cheqaptachu mana allinninchikpaq kanman llumpayta tomayqa?

Llumpayta tomayqa sasachakuykunatam apamun

Sinkanapaq kaqkunata pisillata tomayqa allinninchikpaqmi kanman, achka tomaymi ichaqa yuyayninchiktawan cuerponchikta hukmanyachin. Qawasunchikyá imakuna pasasqanmanta.

Runapa yuyayninta hukmanyachispanmi ‘mana allinkunata rimachin’ (Proverbios 23:33). Qallariyninpi rimasqanchik Albertom kaynata nin: “Sapa kuti sinkakuyqa cuerponchikta dañaq onqoymi, dañantaqmi piensayninchiktawan rurayninchiktapas. Manataqmi musyakunchikchu hukkunata sasachasqanchiktapas”, nispa.

 Mana controlakuqtam rikurichin. Bibliam nin: “Vinolla aqalla upyakuq runaqa mana entiendeqñam rikurirun”, nispa (Oseas 4:11). Arí, sinkasqa kaptinchikqa mana allin ruraykunam allin hinaña rikchakuwachwan. Hinaptinmi allin kaqkunataqa mana kaqpaqpas hapichwanñachu, huchapakuymanta cuidakusqanchiktapas saqeruspam Diospa contranpi huchallikuruchwan.

Kaypaq qawasunchik Johnta ima pasasqanmanta. Huk kutipim señoranwan qaqchanakuruspan piñasqallaña trago tomaq pasakurqa. Achka copataña tomachkaptinmi huk warmi asuykurqa. Hinaptinmi iskay-kimsa copatawan tomaruspan chay warmiwan pasakuspan huchapakururqa. Anchallataña wanakuspanmi Johnqa chaymantaña nirqa: “Mana sinkaspayqa manam chaytaqa haykapipas ruraymanchu karqa”, nispa.

Mana musyakuspam imatapas rimachin hinaspa rurachin. Bibliam tapun: “¿Pitaq: ‘Ay, ay’ nispa nin? ¿Pitaq: ‘Nanawanmi’ nispa nin? ¿Pitaq atipanakuypi purin? ¿Pitaq quejanakuypi purin?”, nispa. Hinaspam kutichin: “Vino maskaqkunam”, nispa (Proverbios 23:29, 30). Chayna runaqa ‘lamar qochapa chawpinpi puñuchkaq hinam rikurirun. Buquepa hatun kaspinpa puntanpi puñuchkaq hinam rikurirun’ (Proverbios 23:34). Mallaqyaruspanñataqmi ninqa: ‘Maqawarqakum ichaqa manam nanawarqachu nispa. Takawarqakum ichaqa manam musyarqanichu nispa’. (Proverbios 23:35.)

Onqoytam tarichiwanchik. Proverbios 23:32 nisqanman hinam tragoqa ‘kachukuq culebra hina kachukun. Venenosapa culebra hina nanachikun’. Kay textopa nisqanman hinam doctorkunapas ninku, llumpay trago tomayqa veneno hina kasqanta. Hapiwanchikmanmi cancer, hepatitis, cirrosis, pancreatitis onqoykuna, wawachakunapas nacenkum imaymana onqoykunawan, umapi venapas toqyarunmanmi hinaspa huk onqoykunapas hapiwachwanmi. Wakinpiqa huk kutillapi llumpayta tomaruspapas wañuy patapim tarikuchwan otaq wañuruchwanpas. Arí, llumpay tomaymanta lliw onqoykunataqa manamá doctorkunapa libronkunaqa willakunchu.

Aswan peligropim tarichiwachwan. Mana sinkachkaspapas, llumpayta tomaruspaqa Dioswan amistadninchiktam chinkarachichwan. Bibliapim willakuq Isaias kaynata nin:  “¡Ay, imaynaraq kankichik, tutapayta hatarispa upyakuqkuna! ¡Ay, imaynaraq kankichik, sinchi tutakama machakuqkuna!”, nispa. ¿Imanasqataq llakikun? Payqa yachanmi chay rurasqanku imapi tukunanta: “Manam qawarinkuchu Tayta Diospa rurasqanta. Manam cuentata qokunkuchu paypa unanchasqankunamanta” (Isaias 5:11, 12).

Diosqa niwanchikmi llumpay ‘tomaq runakuna’ mana kananchikpaq (Proverbios 23:20). Yuyaqña warmikunatapas ninmi mana ‘tomayman qokurunankupaq’ (Tito 2:3). Ichaqa, ¿imanasqataq allinta cuidakunanchik? Yaqa llapallanpim runakunaqa mana musyakuspalla pisi-pisimanta llumpayta tomayta qallaykunku. Puñuykunkupas kaynata piensastinñam: “Mallaqyaruspayqa yapatawanmi vinota upyamusaq”, nispa (Proverbios 23:35). Pipas tutapi sinkaruspan achikyaqpi imatapas allinta rurananpaq tragochata necesitaspanqa, ñam chay viciomanqa wichiykunña.

Bibliaqa nintaqmi, tomakuykunapi hinaspa fiesta ruraykunapi kaqkunaqa wañuqkunatawan kawsaqkunata juzgananpaq listo kaqman cuentata qonankumanta (1 Pedro 4:3, 5). Kay tiemponchikpaq Jehová Diospa piñakuyninmanta willakusqanpim Jesusqa kaynata nirqa: “Allintayá qawakuychik, yanqañataqmi viciokunapi, machakuykunapi hinaspa kay pachapi imapas kaqkunapi afanakuchkaqta qonqayllamanta chay punchawkuna tariramusunkichikman”, nispa (Lucas 21:34, 35).

Hinaptinqa imatataq sinkakuqkunaqa ruranmanku kay sasachakuyta saqenankupaq.

[Willakuy]

^ par. 2 Kaypiqa manam chaylla sinkanapaq kaqkunallamantachu rimachkan, rimachkantaqmi cerveza hinaspa vino hina mana chaylla sinkachiqkunamantapas.

[4 hinaspa 5 kaq paginakunapi dibujokuna]

Sinkakuyqa achka sasachakuykunatam apamun