¿Yuyachkankichu warmachallaraq kachkaspayki urmarusqaykita? Ichapas makikita utaq muquykita takakuruptiki mamayki heridaykita sumaqllata pichaykuspan hampiykusurqanki. Waqaptikipas sumaqllata rimapayasuspaykim kuyaykusurqanki. Warmacha kaptinchikqa pipas yanapaykuwaptinchikmi chaylla hawkayaruq kanchik.

Wiñasqanchikman hinam ichaqa sasachakuykunaqa aswan sasa hinaspapas hukmanyachiwanchikmi. Chaymi yanapakuyta tariyqa sasallaña. Ichaqa manam yuyayniyuqkunapa sasachakuynintaqa rimamusqanchik warmachapa sasachakuyninta hinallaqa allicharuchwanchu. Wakillantapas qawaykusunyá.

  • ¿Hukmanyasqachu tarikunki llamkaynikimanta qarqurusuptiki? Julianmi nin: “Llamkayniymanta qarquruwaptinkum llumpayta llakikurqani. Tapukurqanim: ‘¿Imaynataraq aylluyta uywasaq? Unay watakunaña llamkachkaptiyqa, ¿imanasqataq wischuruwanku?’”, nispay.

  • ¿Warmikiwan utaq qusaykiwanchu rakinakurunki? Raquelmi nin: “Yaqa iskay watañam pasarun qunqayllamanta qusaypa saqiruwasqan. Puraminti llakisqam qiparurqani, wañuruytañam munarqanipas. Manam allinchu tarikurqani. Mancharisqallañam karqanipas”, nispa.

  • ¿Sasa hampina unquywanchu ñakarichkanki? Yaqapaschá Diosta serviq Job hina llakisqa tarikunki, paymi nirqa: “Ñuqaqa kawsakuytapas amiruniñam, kawsaytapas manañam munaniñachu”, nispa (Job 7:16, Chuya Qellqa 2012). Utaqchu 80 watanpiña kaq Luis hina ninki: “Wakinpiqa wañuyllatañam suyani”, nispa.

  • Kuyasqa aylluyki wañukuptinqa ancha llakisqam tarikunki. Robermi nin: “Avion wichiykuptin churiy wañukusqanta yacharuspaymi musquyniypi hina rikurirurqani. Llakikuymi inturuwarqa, espadapas tuksiwachkanman hinam llakikuymanta sunquy nanawarqa”, nispa (Lucas 2:35).

Chayna sasachakuykunapi kachkaptinkupas Julianta, Raquelta, Luista hinaspa Robertam tukuy atiyniyuq Diosqa yanapaykurqa. ¿Imaynatam Diosqa yanapawanchik? ¿Qamtapas Diosqa yanapasunkimanchu?