Ñawpaq tiempopi wakin judiokunaqa leprawan unquqkunatam puramintita manchakuqku. Chay unquywanqa runapa entero cuerponmi isuyaruspan puramintita aychan wichiriruq. Chay unquypaq hampi mana kasqanraykum, unquq runaqa sapaqchasqa karqa, hinaspapas kamachisqam karqa unquyninmanta hukkunaman willakunanpaq (Levitico 13:45, 46).

Judiokunapa religionninpi punta apaqkunaqa bibliapa kamachisqanmantapas achka sasa kamachikuykunataraqmi yaparurqaku leprawan unquqkunapaqqa, chaywanmi leprawan unquqkunataqa astawanraq sasacharqaku. Kamachirqakum pipas lepra unquyniyuqmanqa mana llumpayta asuykunankupaq. Wayramuptinqa aswanmi yaqa 45 metro karullanta purinanku karqa. Judiokunapa costumbrenkumanta yachaqkunaqa nirqakuraqmi, leprawan unquqkunaqa llaqtamanta hawapi yachanankupaq. Chayraykum judiokunata yachachiq runapas leprawan unquq runata llaqta ukupi rikuruspanqa rumiwan chuqaspan nirqa: “Maymi yachanaykiman pasay, runakunamanmi unquyniki rataykunqa”, nispa.

Jesusqa manam judiokunapa yachachiqninkuna hinachu leprawan unquqkunataqa chiqniq, aswanmi payqa llapchaykuspan allinyaykachiq (Mateo 8:3).

Jesuspa tiemponpiqa judiokunam imanasqa rakinakuy allin utaq mana allin kasqanmanta atipanakuqku. Chaymi huk kutipi fariseokuna Jesusta tapurqaku: “¿Imaraykullapas qariqa warminmanta divorciakunmanchu?”, nispa (Mateo 19:3).

Moisespa chaskisqan kamachikuykunapiqa nirqam, qusaqa warminpa ‘millakuypaq imapas ruwasqanta’ yacharuspan warminmanta rakikuy atisqanta (Deuteronomio 24:1). Jesuspa tiemponpi leykunamanta yachaq runakunaqa manam chaynallatachu rakinakuymantaqa entienderqaku. Wakinmi niqku, warmin utaq qusan hukwan pierdekuruptillan rakinakunankumanta. Wakinñataqmi niqku, imallamantapas qusaqa warminmanta rakikuy atisqanta, nirqakum mikuyta mana allinta warmin ruwaruptin utaq huk warmitaña kuyaruspanqa rakikuyta atisqanmanta.

¿Imatam Jesusqa fariseokunata nirqa? Nirqam: “Mana huchapakuchkaptin pipas warminmanta divorciakuspan hukwan casarakuqqa pierdekuy huchamanmi wichiykun”, nispa (Mateo 19:6, 9).