IMATAM BIBLIA NIN
Espiritismo
¿Allinchu kanman wañusqa ayllunchikmanta espiritistata tapuyqa?
“Amam rinkichikchu espiritistakunamanqa nitaq qayaqkunamanpas. Chaykuna ruraqta maskaspaqa millakuypaqmi kawaqchik.” (Levitico 19:31)
¿IMATAM RUNAKUNA NINKU?
Kuyasqa ayllunku wañuruptinqa yachaytam munanku imayna tarikusqanmanta. Chaymi piensanku: “Espiritistapa yanapayninwan yacharamusaq kuyasqa aylluy imayna tarikusqanmanta. Chaywanqa ichapas hawkayayta tariyman”.
¿IMATAM BIBLIA NIN?
Chay ruwaytaqa Jehova Diosqa manam allinpaqchu qawan. Wañusqakunawan rimayqa ñawpa runakunapa costumbrenmi karqa. Chaymi israelitakunaman leeyta qospan nirqa: ‘Amam qamkuna ukupiqa kanqachu [. . .] wañuqta qayaqkunapas nitaq espiritistakunapas. Chaykuna ruwaqtaqa Tayta Diosmi millakun’ (Deuteronomio 18:10-12, Chuya Qellqa revisión 2012). Espiritistaqa otaq chaykunata tapukuqkunaqa ‘manam yaykunqakuchu Diospa munaychakusqanmanqa’ (Galatas 5:19-21).
¿Yanapanmanchu wañusqakunaqa kawsaqkunata?
“Wañunanmantam yachanku kawsaqkunaqa. Manam imatapas yachanchu wañuqkunaqa.” (Eclesiastes 9:5)
¿IMATAM RUNAKUNA NINKU?
Wakinqa piensankum wañusqakunaqa huk vidapi hinalla kawsasqankuta. Chaymi paykunawan parlayta munanku ima munasqankumanta yachanankupaq chayman hina ruwaspa mana manchachisqa kanankupaq.
¿IMATAM BIBLIA NIN?
“Wañunanmantam yachanku kawsaqkunaqa. Manam imatapas yachanchu wañuqkunaqa. Ima pagotapas manam chaskinchu wañuqkunaqa [. . .]. Tukurunñam kuyakuyninqa. Tukurunñam cheqnikuyninqa. Tukurunñam sientekuyninpas.” (Eclesiastes 9:5, 6.) Wañusqakunaqa manañam ima ruwaytapas atinkuchu Diostapas manañam yupaychankuñachu. Chaymi Biblia nin: “Wañusqakunaqa manañam Tayta Diostaqa alabankuñachu. Upallaruqkunapa kasqanman uraykuqkunaqa manam alabankuñachu” (Salmo 115:17).
¿Manachu espiritistakunapa willawasqanchikqa yanapawachwan?
‘¿Kawsaqkunaqa wañusqakunatachu consultananku?’ (Isaias 8:19)
¿IMATAM RUNAKUNA NINKU?
Wakinmi ninku espiritistakunaqa willawachwanmi wañuqpa yachasqanmanta, familianchik otaq amistadninchik ima yachasqankumantapas.
¿IMATAM BIBLIA NIN?
Diospa kamachisqanta mana kasukuspan rey Saulqa espiritistaman risqanmantam willakun. Saulqa Diosta serviq Samuelwanmi parlayta munarqa ichaqa payqa wañusqañam tarikurqa. Saulwanqa manam Samuelchu rimarqa, chaynaqa ¿pitaq rimarqa paypa rantinpi? (1 Samuel cap. 28.)
Chay rimaqqa karqa Satanasta yanapaq demoniom, Satanasmantam Biblia nin: ‘Llullakuqkunapa taytan’, nispa (Juan 8:44). ¿Imanasqataq demoniokunaqa runakunaman creechin wañusqakunaqa huk vidapi hinalla kawsasqankuta? Diospa nisqankunata yanqachanankuraykum (2 Timoteo 3:16).
¿Manañachu ima suyakuypas kan wañusqakunapaqqa? Paykunaqa kawsarimunqakum. Bibliam willakun wañusqakunaqa sepulturapi ‘puñusqankumanta’ rikcharichkaq hina kawsarimunankumanta (Juan 11:11-13; Hechos 24:15). * Chaymantapas willawanchikmi paykunaqa imawanpas mana ñakarisqankumanta.
^ par. 16 ¿Imatapunim Bibliaqa yachachin? niq libropim 7 kaq yachachikuyninpi nichkan “Kuyasqanchik wañukuqkunapaq cheqap suyakuy”. Chaytaqa leewaqmi Internetpi www.jw.org/quy nisqanpi.
