YACHACHINA 09
Resayta Tata Yayát ckemichisun
¿Ckaanqui ckam ima huaquin cutis precisanqui encaminascka cayta causayniyquipi? ¿Apinqui tapunas importantes aun maa contestasckas? ¿Precisanqui ánimu o consuelu? ¿Gustasunman tiayta astaan ckaylla Jehovamanta? Resayta, atin yanapasuyta túcuy cá imastispi ima precisanqui. Pero, ¿imaina debenqui resayta? ¿Tata Yaya uyarin túcuy resus? ¿Imaina atinqui seguru tiayta ima Tata Yaya uyarin resus ima ckam ʼruapunqui? Ckaasúysh.
1. ¿Pít debeycu resapuyta? ¿Imatmanta resusniyshpi ʼrimapunáysh tían?
Jishu yachachera ima solo debeycu resapuyta Tata Yayayshta ima cielupi tían. Sin duda pay Jehovata resápoj cara. Suj ocasiunpi nera: «Ckamcuna debenquísh resayta cá layamanta: ‹Tatáysh ima cieluspi tianqui...›» (Mateo 6:9). Resaptíysh Jehovata amistarníysh payuan sinchi ʼruacun.
Resusniyshpi atiycu tucuymanta ʼrimapuyta. Pero, si munaycu Tata Yaya contestaanayshta, mana mañapunáysh tían ni imapas tiachun contranpi pay munasckanmanta. Biblia nin: «Atiycu mañapuyta imajcachun imastis ima tiachun de acuerdu pay munasckanuan y pay uyariáysh» (1 Juan 5:14). Jishu ckora huaquin ejemplus ima atiycu nipuyta resaptíysh (léey Mateo 6:9-13cama). Nátaj ʼrimas nockayshpa afliciunesniyshmanta, maa debeycu ckonckayta Tata Yayát agradecepuyta ʼruasckanta nockayshraycu y mañapuyta yanapananta sujcuna persunasta.
2. ¿Imaina debeycu resayta?
Biblia ʼruaaycu cá invitaciún: «Sonckoyquishta quichariychis paypa ñauckenpi [Tata Yaya]» (Salmo 62:8). Chayraycu resusníysh sinceras canancu tían, deben llojsiyta sonckomanta. Atiycu resayta sinchít ʼrimas o upallas tias, y imaina cachun churacusckayshta respetu ckaachis Jehovaraycu. Nátaj atiycu resayta mayckanpas momentuspi y máypij cachun lugarpi.
3. ¿Imina contestan Tata Yaya resusniyshta?
Ashca layasmanta ʼruan. Palabranpi Bibliapi, ashca cutis contestan yachayta munasckayshta. Tata Yáyap palabran atin ʼruayta «yachayníyoj pít maa esperiencia apin» (Salmo 19: 7; léey Santiago 1:5). Y, afliciunes apiptíysh, Jehová atin ckoayshta pas umaycupi. Nátaj atin tanckayta picunasta siruipuncu y yanapaayshta áicap precisáysh.
ASTAAN ESTUDIANÁYSH TÍAN YACHÁYPAJ
Ckaasúysh imaina resapuyta atiycu sonckoyshmantapacha gustapuchun Tata Yayát, imaina resus atincu yanapaayshta.
4. Tían condiciunes Tata Yayát resapúypaj
¿Imamanta dependen ima Tata Yaya uyarichun resapuptíysh? Ckaaychis VIDIU.
Jehova munan payllát resapunayshta. Leeychis Salmo 65:2 y ʼrimaychis cá tapunasmanta:
-
¿Creenquichu ima Tata Yaya ima « resusta uyarin » munan ckam resapunayquita? ¿Imajchus chayna pensanqui?
Si munaycu Tata Yaya uyarinanta resapuptíysh, afanacunaycu tían causanaas de acuerdo imaina pay munan. Leeychis Miqueas 3:4 y 1 Pedro 3:12 y ʼrimaychis cá tapunasmanta:
-
¿Imaina atiycu yachayta si Tata Yaya uyarin resapuptíysh?
Nacha íshcay ejércitus Tata Yayát mañapuchuncu guerrát ganayta. ¿Pero dejuro atíysh pensayta ima Tata Yaya chá resus contéstaj ʼrin?
5. Resusníysh sonckoyshmanta llojsinancu tían
Ashcasta yachacherancu niyta siempre quiquinta resaptincu. ¿Pero cancu chá resus ima Tata Yayát gustapun? Leeychis Mateo 6:7 y ʼrimaychis cá tapunasmanta:
-
¿Imát ʼruayta atiycu maa níypaj «quiquinta cutis cutis» resaptiycu?
¿Ímaj maa sapa punchau yuyanqui imastas ancha súmaj sucedesora causayniyquipi, y graciasta Jehovata ckopunqui chayraycu? Si chayta ʼruanqui suj semanapi, ckáaj ʼrinqui ima ʼrimaranqui siete imastismanta resasckayquipi maa quiquinta nis cutis cutis.
Suj alli tata munan ckari huaan sincero cananta y sonckonmantapacha ʼrimapuchun. Jehová munanpas resapuptíysh sonckoyshmantapacha llojsichun.
6. Resayta can suj regalu Tata Yayamanta
¿Imaina resayta fuersas ckoayshta atin, afliciunes causaymanta llalliptíysh? Ckaaychis VIDIU.
Biblia niaycu resayta atin ckoayshta pas ucuyshpi. Leeychis Filipenses 4:6, 7 y ʼrimaychis cá tapunasmanta:
-
Amapas resayta maa allichan túcuy afliciunes, ¿imaina yanapaaycu?
-
¿Ima imastisraycu gustasunman resayta?
¿Yacharanquichu?
Niyta amén ninaan «chayna cachun» o «dejuro». Ñaupamantapacha nicun «amén» resas puchucas (1 Crónicas 16:36).
7. Tiempút sórckoy resáypaj
Ashca cutis tiaycu ancha ocupasckas y ckonckaycu resayta. ¿Aica importancia ckopora Jishu resayta? Leeychis Mateo 14:23 y Marcos 1:35 y ʼrimaychis cá tapunasmanta:
-
¿Imaina lógraj cara Jishu tiempút sorckoyta resáypaj?
-
Y ckam, ¿maymanta tiempút sorckonquiman resáypaj?
HUAQUINCUNA NINCU: «Resayta can suj remediu umaycúpaj».
-
¿Ckam imát ninquiman?
BIBLÍAP YACHACHINASNIN
Resaptiycu sonckomanta Tata Yayaman ckemiaycu. Astaanpas ckoaycu pas umaycupi y fuersas ima precisaycu ʼruáypaj Jehová nockayshmanta suyasckanta.
Yuyáypaj
-
¿Pít debeycu resapuyta?
-
¿Imaina debeycu resayta?
-
¿Ima layasmanta yanapaáysh resayta?
ASTAAN YÁCHAY
Yáchay contestaciún tapunasmanta ima persunas ʼruacuncu resaymanta.
«Siete tapunas resaymanta» (La Atalaya, 1 octubremanta 2010 huatamanta)
Leey imajchus importante can resanayquita, y imaina atinqui mejorayta resusniyquita.
«¿Imajchus importante can resayta?» (Artículo sitiuycumanta jw.org)
Ckáay Biblia yachachisckanta pít resapunaycu tían.
¿Allít tían santusta oranayshta? (Artículo sitiuycumanta jw.org)
Ckáay cá vidiu musicalpi si resanáysh tían suj lugarpi o ratu apartanayqui tian.
