¿Imanirtaq musyëpaqnötsu imapaqpis kawanqantsik?

KAWË mana kaqllachö, raslla ushakärinqanta, y “llantuynö o wäninö” nuna pasareqlla kanqantam rey Salomonqa nirqan (Eclesiastés 6:12). Tsënö kaptimpis Diosqa Palabranchö awnimantsik ichikllachöna kawënintsik alli kanampaq kaqtam. Biblia ninqan imëpis cumplikashqa kaptinmi, kë awnikunqan cumplikänampaq kaqmanqa markäkuntsik o yärakuntsik (2 Timoteu 3:16, 17).

Bibliam willamantsik Diosnintsik kë Patsata imapaq kamanqanta. Hinamampis willamantsikmi kë mundo mana alli rurëkunawan y nakakïkunawan imanir hunta këkanqanta. Pero ¿imanirtaq këkunapita musyëta tïrashwan? Kawëninkuna mana imapaq kanqantaqa nunakuna pensayan Diosnintsik kë Patsata o nunata imapaq kamanqanta mana musyarmi o musyëta mana munarmi.

¿Imapaqtaq kë Patsata Diosnintsik kamarqan?

Jehová Diosqa * kë Patsata kamarqan nunakunapaq huk shumaq wayinnö kanampaq y hutsannaq ollqupis warmipis kushishqa y mana wanushpa tsë shumaq huertachö kawayänampaqmi. Bibliaqa manam nunakuna  pensayanqannötsu yachatsikun. Atskaq nunakunam pensayan alli kawakïta espïritukuna kawayanqan sitiollachö tarina kanqanta, y kë Patsaqa huk prueba cuenta tsë sitioman pï chänampaq kaqta musyanallapaq kanqanta (rikäri 6 kaq päginachö  “¿Espïritukuna kawayanqanllachötsuraq alli kawakïta tarishwan?” ninqan recuadrota).

Nunataqa Dios kamarqan kikin niraqtam, tsëmi nunakunaqa pënölla këta puëdeyan (Génesis 1:26, 27). Punta ollquwan warmiqa hutsannaqmi kayarqan. Mana wanushpa kawayänampaq kaqta y imanir kawayanqantam musyayaq. Mirayänanmi karqan y Patsatam cuidayänan karqan, hina llapan Patsatam Edén huertatanö tikratsiyänan karqan (Génesis 1:28-31; 2:8, 9).

¿Imanirtaq Dios munanqannöqa kashqatsu?

Rikanqantsiknöpis, Diospa munëninqa manam rurakashqatsu. Nunakunaqa manam Dios imanö kanqanta rikätsikïta puëdeyannatsu y Patsaqa manam shumaq huertatsu. ¿Imanirtaq pasakurqan? Adanwan Eva mana alli kaqta akrayashqa kayaptinmi. Y “alli kaqta y mana alli kaqta” kikinkuna akrayänampaqmi “Diosnö” këta munayarqan, tsënöpam Satanasta qatiyarqan y munëninkunata rurakuyarqan (Génesis 3:1-6).

Rikanqantsiknöpis mana alli rurëkunaqa manam Diospa munënintsu. Tsëqa yurimurqan Satanás y Adanwan Eva Diospa autoridadnimpa contran churakäriyaptinmi. Tsëmi punta teytantsikta y mamantsiktaqa shumaq huertapita Diosnintsik qarqurirqan y hutsayoqnam tikrariyarqan. Tsëpita patsëmi hutsapa y wanïpa makinchö kayarqan y tsënöllanam llapan tsurinkunapis yuriyarqan (Génesis 3:17-19; Romanos 5:12). Tsënöpam kawë mana imapaq kanqantanö kanan witsankunaqa rikantsik.

¿Imanirtaq mana alli kaqkunata Diosnintsik hinan höra ushakäratsirqantsu?

Satanastawan wakin contran churakaqkunata ushakäratsir huk nunakunata Diosnintsik imanir mana kamanqantam wakinkuna tapukuyan. ¿Allitsuraq kanman karqan tsënö rurariptinqa? Këman pensakurki, ¿imaraq pasakunman huk gobiernopa contran churakaqkunata hinan hora tsë gobernakoq ushakäratsiptinqa? Tsë nacionchö alli rurëkunata kuyaq nunakunaqa, ¿respetëkayanmanllatsuraq y allillatsuraq rikëkäyanman? Rasuntachi Diosnintsikqa mana alli ruraqkunata hinan hora ushakäratsirqantsu. Tsëpa rantinqa, Satanás tumpanqan ardëlla kanqanta rikätsikunampaqmi tiempota qorqan.

Mana allikunapa ushakënin

Këta alleq yarpäshun: Diosqa ichik tiempollapam mana allikuna kananta haqishqa. Jehovälla mandakïta yachanqanta llapankuna musyariyaptinqa, llapan mana allitam ushakäratsinqa.

Unënöllam Patsapaq y nunakunapaq Diosnintsikpa munëninqa këkan. Profeta Isaïaswanmi Jehová willakurqan pëlla kë Patsata kamanqanta, y envänolla mana ruranqanta, sinöqa tsëchö nunakuna kawayänampaq kamanqanta (Isaías 45:18). Ichikllachönam Diospa munënin kë Patsachö rurakanqa. Y pëpa mandakïninlla alli kanqanta llapampis musyariyaptinqa, manam imapis michanqatsu kallpanwan llapan mana alli ruraqkunata  ushakätsinampaq y munanqanta rurarinampaq (Isaías 55:10, 11). Tsëtam Jesus Teytanman mañakur kënö nirqan: “Muneyniki rurakätsun syeluchownow, tseynowlla patsachowpis” (Mateo 6:9, 10, QKW). Pero ¿imataq tsë munëninqa?

Patsapaq Diospa munënin

“Manshukunapaqmi patsaqa kanqa” nirmi Diosnintsik awnikun (Salmo 37:9-11, 29; Proverbios 2:21, 22). Hinamampis Bibliachöqa, Jesucristuqa “waktsata [y] llakinashqata”, hina “allqutsashqa y hipatsishqa [ñakatsisha]” kaqkunatapis salvanampaqmi willakun (Salmo 72:12-14). Mananam kanqanatsu guërrakuna, wanï, waqakïkuna, nanatsikïkuna ni hipakïkunapis (Salmo 46:9; Apocalipsis 21:1-4). Y, ¿imaraq pasanqa mana alli rurëkunata Dios manaraq ushakätsiptin wanukoqkunataqa? Kë Patsallachömi kawariyämunqa kë bendicionkunata  y más bendicionkunatapis chaskiyänampaq (Juan 5:28, 29).

Awmi, Diospa contran churakarnin Satanás tukï mana allikunata ruranqantam Diosnintsikqa altsanqa. Isaías 65:16-19 textom kënö nin: “Unë nakakïkunam [kanan waqatsimaqnintsik y llakitsimaqnintsik] qonqashqa kanqa”. Diosqa manam ulikuntsu o llullakuntsu. Llapan awnikunqankunam cumplikan y këpis cumplikanqam. Tsë hunaqkunaqa mananam ni pï, “mana kaqllapaq y vientota tsarinapaq qatikachaq cuenta[m]” kawä ninqanatsu (Eclesiastés 2:17). Kushishqallam llapantsikpis kawakushun.

Pero tsë hunaq chämunqanyaqqa, ¿kushishqa kawanapaq yanapamäshuntsuraq Bibliapita yachakunqantsik y Patsapaq Diospa munënin ima kanqanta musyanqantsik? Qateqnin kaq yachatsikïmi kë tapukïpa respuestanta rikätsimäshun.

[Päginapa ura kuchunchö willakï]

[6 kaq päginachö recuadru]

¿Espïritukuna kawayanqanllachötsuraq alli kawakïta tarishwan?

  Patsapaq Diosnintsik imata ruramunampaq kaqta mana musyarmi, atskaq nunakuna atska pachak watakuna yachatsikuyashqa espïritukuna kawayanqanllachö alli kawakï kanqanta.

Wakinkunaqa niyaq “manaraq nunaman yëkurnin almakuna huk sitiochö más alli kawashqa kayanqantam” (Nuevo Diccionario de Teología). Wakinkunanam niyaq “unë kawëninkunachö tsë almakuna pasëpa mana allita rurayanqampita nunakunapa cuerponkunachö castïgonö carcelashqa kayanqanta” (La razón filosófica y la razón católica).

Socrateswan Platón y wakin unë griego nunakunam niyaq cuerpopita alma yarqurirlla “hutsapita, upa cuenta rurëkunapita, mantsakëkunapita, melanëpaq mana alli rurëkunapita y nunakunapa wakin mana alli rurëninkunapita libre kawayanqanta, y tsëpita dioskunapa lädonkunachö kawakuyänampaq kaqta” (Fedón, Platón, 81a).

Tsëpita wallka tiempo pasarishqanllachömi cristiänotukoq yachatsikoqkunaqa griego nunakunanö “alma mana wanunqanta yachatsikur” qallëkuyarqan (Christianity—A Global History).

Pero këkunaqa manam Bibliapa kima yachatsikïninkunawan igualantsu:

1. Diosqa Patsata kamarqan imëyaqpis nunakuna tsëchö kawayänampaqmi, y manam ciëlochö kawayänampaq o mana kawayänampaq kaqtapis musyayänanllapaqtsu. Dios mandakunqankunata Adanwan Eva wiyakuyashqa karqa, kanan höram huk shumaq Patsachö kawëkäyanman karqan (Génesis 1:27, 28; Salmo 115:16).

2. Atskaq religionkunam yachatsikuyan nunapa cuerponchö huk alman kanqanta, pero Bibliaqa clärom yachatsikun ‘nuna kawëkaq alma’ kanqanta, y ‘allpapita’ rurashqa kanqantapis (Génesis 2:7). Manam alma mana ushakäkoq kanqantatsu yachatsikun, tsëpa rantinqa wanïta puëdenqanta y chipyëpa ushakärïta puëdenqantam yachatsikun (Salmo 146:4; Eclesiastés 9:5, 10; Ezequiel 18:4, 20). Punta kaq Adan almaqa wanurqanmi y allpamanmi kutirqan, tsë ninanqa pasëpam ushakärirqan (Génesis 2:17; 3:19).

3. Wanushqa kaqkunaqa yapëmi kawariyämunqa, pero manam cuerponchö mana wanoq alman kayäpuptintsu, sinöqa kawariyämunampaq Dios awnikushqa kaptinmi. Hinamampis manam espïritukuna täräyanqan sitiochötsu täräyanqa, sinöqa huk shumaq Patsachömi (Daniel 12:13; Juan 11:24-26; Hechos 24:15).