Genesis 1:1-31
-
Ciëluta y patsata Dios kaman (1, 2)
-
Patsachö kaqkunata joqta junaqchö Dios kaman (3-31)
-
Punta kaq junaq: aktsita; junaqta y paqasta kaman (3-5)
-
Ishkë kaq junaq: chowpichö kicharëkar quedanampaq mëtsika yakuta rakin (6-8)
-
Kima kaq junaq: tsaki patsata y tukuyläya plantakunata kaman (9-13)
-
Chusku kaq junaq: ciëluchö llapan aktsikunata kaman (14-19)
-
Pitsqa kaq junaq: lamarchö animalkunata y tukuyläya pishqukunata kaman (20-23)
-
Joqta kaq junaq: patsachö imëka rikoq animalkunata y nunata kaman (24-31)
-
1 Qallananchöqa, Teyta Diosqa ciëluta y patsatam kamarqan.+
2 Tsënö kaptimpis, patsachöqa yakullam junta karqan, y manam ni imapis masqa karqantsu. Y tsë yaku* janampaqa+ pasëpa* yanapürum këkarqan. Teyta Diospa poderninmi*+ yaku jananchö wakpa këpa kuyukuykarqan.+
3 Tsënam Teyta Diosqa, “atsikyätsun” nirqan. Y ninqannömi atsikyar qallëkurqan.+
4 Aktsikyanqan alli kanqantam Teyta Diosqa rikarqan, y atsikyaqtawan mana atsikyaqtam rakirqan.
5 Atsikyaqtaqa Junaq nirmi jutin churarqan, y mana atsikyaqtaqa Paqas nirmi jutin churarqan.+ Y paqasyarqanmi y wararqanmi. Tsë llapanmi pasakurqan punta kaq junaqchö.
6 Tsënam Teyta Diosqa nirqan: “Mëtsika yaku këkaq rakikätsun. Wakin yakuqa janaman ëwatsun, y wakin yakuqa jawachö quedatsun,+ y chowpiqa* kicharëkar quedatsun”.+
7 Tsënömi Teyta Diosqa rurarqan. Chowpichö* kicharëkar quedanampaqmi janaman y jawaman yakuta rakirqan.+ Y tsënömi karqan.
8 Kicharëkar quedaq kaqtaqa, Ciëlu nirmi Teyta Diosqa jutin churarqan. Y paqasyarqanmi y wararqanmi. Tsë llapanmi pasakurqan ishkë kaq junaqchö.
9 Tsënam Teyta Diosqa nirqan: “Ciëlu jawanchö llapan yaku këkaq jukllëllaman juntakätsun, y tsaki patsa yuritsun”.+ Y tsënömi karqan.
10 Tsaki patsataqa, Patsa nirmi Teyta Diosqa jutin churarqan,+ y llapan juntaraq yakutanam Lamar nir jutin churarqan.+ Llapan ruranqan alli kanqantam Teyta Diosqa rikarqan.+
11 Tsënam Teyta Diosqa nirqan: “Patsachö tukuyläya qewakuna, muruyoq plantakuna y früta wayoq jatusaq plantakuna, y frütankuna y murunkuna jeqamutsun”. Y tsënömi karqan.
12 Patsachömi tukuyläya qewakuna, muruyoq plantakuna+ y früta wayoq jatusaq plantakuna jeqamur qallëkurqan. Llapan ruranqan alli kanqantam Teyta Diosqa rikarqan.
13 Y paqasyarqanmi y wararqanmi. Tsë llapanmi pasakurqan kima kaq junaqchö.
14 Tsënam Teyta Diosqa nirqan: “Kicharëkaq ciëluchö aktsikuna katsun+ paqaspita junaqta rakinampaq.+ Tsëkunam musyatsikunqa ima tiempu,* ima wata y ima junaq kanqanta.+
15 Tsë aktsikunaqa, patsachö aktsi kanampaqmi ciëluchö atsikyar kayanqa”. Y tsënömi karqan.
16 Teyta Diosqa ishkë jatusaq aktsikunatam rurarqan. Jatun kaq aktsitaqa rurarqan junaqpa aktsinampaqmi,+ y taksha kaq aktsitanam rurarqan paqaspa aktsinampaq. Tsënöllam estrëllakunatapis rurarqan.+
17 Y tsë llapan aktsikunatam Teyta Diosqa ciëluchö rurarqan patsata aktsiyänampaq,
18 paqaspa y junaqpa aktsi kanampaq, y ampitawan o tsakëtawan* junaqta rakinampaq.+ Llapan ruranqan alli kanqantam Teyta Diosqa rikarqan.
19 Y paqasyarqanmi y wararqanmi. Tsë llapanmi pasakurqan chusku kaq junaqchö.
20 Tsënam Teyta Diosqa nirqan: “Imëka rikoq animalkuna* yaku rurinchö mëtsika yuriyätsun, y imëka rikoq pishqukuna ciëluchö volayätsun”.+
21 Y Teyta Diosqa tsënömi rurarqan. Lamarchö kawaq tukuyläya jatusaq animalkunata, y yakuchö grüpuypa kawaq imëka rikoq taksha animalkunatam kamarqan. Y pishqukunatapis* imëka rikoqtam kamarqan. Llapan ruranqan alli kanqantam Teyta Diosqa rikarqan.
22 Tsëpitanam Teyta Diosqa kënö nir bendicirqan: “Lamar junta mirayë y atska kayë.+ Y llapan pishqukuna patsachö mëtsika mirayë”.
23 Y paqasyarqanmi y wararqanmi. Tsë llapanmi pasakurqan pitsqa kaq junaqchö.
24 Tsënam Teyta Diosqa nirqan: “Patsachö imëka rikoq animalkuna mirayätsun: manshu kaq animalkuna, lätëpa pureq animalkuna* y chukaru animalkuna. Llapankuna kastankunamannö mirayätsun”.+ Y tsënömi karqan.
25 Teyta Diosqa imëka rikoq chukaru animalkunata, manshu animalkunata y lätëpa pureq animalkunatam kamarqan. Llapan ruranqan alli kanqantam Teyta Diosqa rikarqan.
26 Tsënam Teyta Diosqa nirqan: “Noqantsik niraqta+ y kikintsik rikoqta+ nunata rurashun.+ Y pëpa makinchö katsun lamarchö kawaq pescädukuna, ciëluchö volaq* pishqukuna, manshu animalkuna, patsachö lätëpa pureq animalkuna,+ y entëru patsapis”.
27 Y tsënömi rurarqan. Teyta Diosqa kikin niraqtam nunata kamarqan. Awmi, kikin niraqtam kamarqan. Ollquta y warmitam kamarqan.+
28 Teyta Diosqa kënö nirmi pëkunata bendicirqan: “Mëtsika tikrayänëkipaq y patsachö junta kayänëkipaq wamrëkikuna atska katsun.+ Qamkunapa makikikunachömi kanqa+ pescädukuna, volaq* pishqukuna, patsachö llapan kawaq animalkuna, y entëru patsapis”.
29 Tsëpitanam Teyta Diosqa nirqan: “Qamkunapaqmi llapan muruyoq plantakuna y llapan früta wayoq jatusaq plantakuna. Tsëkunam mikuyänëkipaq kanqa.+
30 Y patsachö kawaq chukaru animalkunapaq, ciëluchö volaq* pishqukunapaq y patsachö pureq y kawaq animalkunapaqqa, llapan verdiraq plantakunam mikuyänampaq kanqa”.+ Y tsënömi karqan.
31 Tsëpitanam Teyta Diosqa llapan ruranqanta rikarqan, y llapampis alläpa allim karqan.+ Y paqasyarqanmi y wararqanmi. Tsë llapanmi pasakurqan joqta kaq junaqchö.
Nötakuna
^ O “laqcheqyäkuykaq yaku”.
^ Kënöpis niyanmi: jankat.
^ O “imëka ruraq kallpanmi; santu espïritunmi”. Rikäri “Bibliachö palabrakunata entiendinapaq” neqchö “santu espïritu” neqta.
^ Kënöpis niyanmi: pullanqa.
^ Kënöpis niyanmi: Pullanchö.
^ Tsënö nirqa, watachö tukuy tiempukunapaqmi parlëkan: tamya tiempupaq, usya tiempupaq, muruna y cosëcha tiempupaq.
^ Kënöpis niyanmi: tutapëtawan.
^ O “almakuna”. Rikäri “Bibliachö palabrakunata entiendinapaq” neqta.
^ Hebreu idiömachö “pishqukuna” nirqa, capazchi pishqukunapaq y völaq kurukunapaq parlëkan.
^ Hebreu idiömachö tsënö nirqa, capazchi ichikllan animalkunapaq, ukushkunapaq y kurukunapaq parlëkan.
^ Kënöpis niyanmi: päreq; vuëlaq.
^ Kënöpis niyanmi: päreq; vuëlaq.
^ Kënöpis niyanmi: päreq; vuëlaq.
