Apocalipsis 5:1-14
5 Gobernar täkunachö jamarëkaqpa derëcha makinchömi,+ ishkan lädupa* qellqashqa rölluta rikarqä. Tsë rölluqa qanchis sëlluwanmi alli sellashqa këkarqan.
2 Tsënam fuertipa, “¿pitan rölluta kichanampaqnö y sëllunkunata pakinampaqnö?” nikaq puëdeq angelta rikarqä.
3 Peru manam ciëluchö, patsachö ni patsa rurinchö këkaqkunapita mëqampis tsë rölluta kichëta puëdirqantsu ni tsëchö qellqarëkanqanta rikëta puëdirqantsu.
4 Tsë rölluta kichanampaqnö y tsëchö qellqarëkanqanta rikänampaqnö mana ni pï kanqanta rikarmi, alläpa llakikur waqar qallëkurqä.
5 Peru gobernaqkunapita juknin kaqmi kënö nimarqan: “Ama waqënatsu. Rikë, Davidpa+ watsin o matsun*+ Judä kastapita+ Leonmi vencishqa.+ Tsëmi rölluta y qanchis sëllunkunata kichëta puëdin”.
6 Gobernar täkunapa y chuskun querubinkunapa chowpinkunachö,* y gobernaqkunapa chowpinchömi,+ wanutsishqanö këkaq+ orqu* üshata shëkaqta* rikarqä.+ Tsë üshaqa qanchis waqrayoq y qanchis nawiyoqmi karqan. Nawikunaqa, entëru patsaman mandayanqan Teyta Diospa qanchis espïritunkunatam rikätsikun.+
7 Tsë Orqu* Üshaqa jinan höra ëwarmi, gobernar täkunachö tëkaqpa derëcha makimpita rölluta aptarkurqan.+
8 Rölluta aptarkuptinnam, chuskun querubinkuna y veinticuatru gobernaqkunaqa,+ Orqu* Üshapa puntanman qonqurikuyarqan. Cada ünum arpata y inciensuwan junta örupita tazonkunata katsiyarqan. Inciensuqa limpiu nunakuna mañakuyanqantam rikätsikun.+
9 Y kënö neq mushoq canciontam cantayan:+ “Qammi derëchuyoq kanki rölluta aptarkur sëllunkunata kichanëkipaq. Qamqa wanutsishqam karqëki y yawarnikiwanmi llapan kastapita,+ idiömapita, markapita y nacionpita Teyta Diospaq nunakunata rantirqëki.+
10 Y Teyta Diosnintsikpaq gobernaqkuna+ y sacerdötikuna kayänampaqmi yanaparqunki,+ y pëkunaqa patsatam gobernayanqa”.+
11 Rikëkurmi gobernar täkunapa, querubinkunapa y gobernaqkunapa entëru lädunchö mëtsika angelkunata parlaqta wiyarqä. Pëkunaqa diez mil kuti diez mil* y atska mil kuti atska milmi kayarqan,+
12 y fuertipam kënö niyaq: “Wanutsiyanqan Orqu* Üsham derëchuyoq,+ poderta, imëka väleqkunata, yachëta, kallpata, respetashqa këta, puntaman churashqa këta y bendicionta chaskinampaq”.+
13 Tsëpitanam ciëluchö, patsachö, patsa rurinchö+ y lamarchö këkaqkunata, awmi, tsëkunachö llapan kaqkunata kënö neqta wiyarqä: “Gobernar täkunachö tëkaq+ y Orqu* Üsha,+ imëyaqpis bendicishqa, respetashqa,+ puntaman churashqa y poderyoq kayätsun”.+
14 Chuskun querubinkunanam, “¡tsënö kallätsun!”* niyarqan. Tsënam gobernaqkunaqa qonqurikuykur Teyta Diosta adorayarqan.
Nötakuna
^ Griëgu idiömachöqa “janapa y ruripa” ninmi.
^ Kënöpis niyanmi: jawan; chapan; sipin.
^ Kënöpis niyanmi: pullanninkunachö.
^ Kënöpis niyanmi: mächu.
^ Kënöpis niyanmi: ichirëkaqta.
^ Kënöpis niyanmi: Mächu.
^ Kënöpis niyanmi: Mächu.
^ O “cien millon cien millon”.
^ Kënöpis niyanmi: Mächu.
^ Kënöpis niyanmi: Mächu.
^ O “amen”.
