Ri Jesús xubʼij che rajawaxik kojux utzalaj taq winaq. Are kʼu jumul xubʼij wariʼ chke ri utijoxelabʼ: «Michomaj chi in petinaq che uyaʼik jamaril chkixoʼl ri winaq cho ri uwach ulew, man in petinaq taj che uyaʼik jamaril, xaneʼ chʼichʼ re chʼoj. In petinaq kʼut che utasik ri achi chrij ri utat, ri ali chrij ri unan, ri alibʼatz chrij ri ralibʼ» (Mat. 10:34, 35). ¿Jas xraj xubʼij ri Jesús?

Ri Jesús kraj taj che kkijach kibʼ ri familias, are kʼu retaʼm che rukʼ ri xukʼutu kubʼano che jujun familias kkijach kibʼ. Ri kkaj keʼux utijoxelabʼ ri Jesús y kkibʼan kiqasanjaʼ rajawaxik kketaʼmaj che weneʼ ri kifamilia utz ta kkil ri kkichaʼ ubʼanik. Y we kʼo jun che kqʼatex rumal ri ukʼulaj o jun chi ufamiliar che upatanixik ri Dios, más kʼax kubʼan riʼ che uterenexik ri Jesús.

Ri Biblia kubʼij chke ri cristianos che rajawaxik «kkʼojiʼ jamaril chixoʼl kukʼ konojel ri winaq» (Rom. 12:18). Are kʼu ri xuya ubʼixik ri Jesús kux jetaneʼ «jun chʼichʼ re chʼoj» chke ri familia. Wariʼ kkʼulmatajik are chiʼ jun chke ri familia kunimaj ri xtaqan wi kan ri Jesús are kʼu e jujun kekixutuj o kekaj ta chik. Ri «aj uwo rachoch» keʼux ukʼulel rumal che tajin kretaʼmaj ri qastzij (Mat. 10:36).

Ri cristianos che e kʼo kifamilia pa jun chi kojonem kuriq kʼax ri kiloqʼoqʼebʼal che ri Jehová y ri Jesús. Weneʼ ri kifamiliares kekitaqchij che ubʼanik jujun taq nimaqʼij che kʼo ubʼanik rukʼ ri kikojonem. Ri cristianos riʼ rajawaxik kkichaʼo jachin ri kkinimaj. Ri Jesús xubʼij: «Apachin ri are loqʼ na ri utat o ri unan chnuwach in, man in taqal ta che» (Mat. 10:37). Are kʼu ri Jesús xraj taj xubʼij che keqaloqʼoqʼej ta ri e qatat qanan. Ri xraj xubʼij are che rajawaxik kqetaʼmaj jas riʼ ri más nim ubʼanik pa ri qakʼaslemal. Rumal che paneʼ jun qafamiliar kojuqʼatej che upatanixik ri Dios, wariʼ kubʼan taj che kqaya kan uloqʼoqʼexik, are kʼu qas qetaʼm che ri uloqʼoqʼexik ri Dios are más nim ubʼanik chqawach.

Qastzij che sibʼalaj kuya bʼis chqe are chiʼ jun chke ri qafamilia kraj taj kqapatanij ri Dios. Are kʼu ri oj utijoxelabʼ ri Jesús qas qetaʼm ri kraj kubʼij ri e tzij riʼ: «Ri man kteriʼ ta chwij, are riʼ man in taqal ta che» (Mat. 10:38). Rumal laʼ, ri oj cristianos qetaʼm che kqariq na kʼi kʼax y che weneʼ ri qafamilia utz ta kkilo are chiʼ kqachaʼ upatanixik ri Jehová y kqaterenej ri Jesús. Are kʼu kqaj che ri utz qabʼantajik ktobʼan chke ri qafamilia rech kkikʼex ri kichomanik y kkaj kketaʼmaj chrij ri Biblia (1 Ped. 3:1, 2).