1-2. Kahrepe mwahu dah kan me kitail ahneki pwehn kasalehda limpoak loalopwoat nanpwungatail?

MIE kahrepe mwahu tohto me kitail en kasalehda limpoak loalopwoat nanpwungatail. Ia ekei kahrepe pwukat? Lepin padahk pwukat sewese kitail en sapengala peidek wet: “Ke dehr kadohwanewei mehlel oh loalopwoat. . . . Ma ke pahn wia met, Koht oh aramas akan pahn kupwurperenkin uhk.” “Ke kin pein wiahiong uhk mehkot mwahu ni omw kin kadek.” “Kadek oh lelepek ke ahpw pahn mour werei.”​—Lep. Pad. 3:3, 4; 11:17; 21:21. *

² Lepin padahk pwukat koasoia kahrepe siluh me kahrehda kitail anahne kasalehda limpoak loalopwoat. Keieu, ni atail kin kasalehda limpoak loalopwoat, kitail kin kesempwalla rehn Koht. Keriau, ni atail kin kasalehda limpoak loalopwoat, kitail kin alehdi soahng mwahu kan ahnsou wet. Karasepe, kitail kak wiahda nanpwungmwahu rehn meteikan me pahn mihmi kohkohlahte. Kesiluh, ni atail kin kasalehda limpoak loalopwoat, kitail pahn alehdi soahng mwahu kan ni ahnsou kohkohdo, iangahki mour soutik. Ei, kitail ahneki kahrepe mwahu kan en peikiong mahsen en Siohwa: “Kumwail pahn kasalehda amwail kadek [limpoak loalopwoat, NW] oh mahk.”​—Sek. 7:9.

3. Peidek dah kan me kitail pahn koasoiapene nan iren onop wet?

³ Nan iren onop wet, kitail pahn koasoiapene pasapengpen peidek pahieu. Ihs me kitail anahne kasalehiong limpoak loalopwoat?  Dahme kitail kak sukuhlkihsang pwuhken Rud duwen limpoak loalopwoat? Ia duwen atail kak kasalehda limpoak loalopwoat rahnwet? Kamwahu dah kan me kitail pahn alehdi ni atail kasalehda limpoak loalopwoat?

4. Ia duwen atail kak kahlemengih Siohwa ni atail kasalehda limpoak loalopwoat? (Mark 10:29, 30)

⁴ Iren onop en mwoweo sewese kitail en wehwehki me Siohwa kin ketin kasalehda limpoak loalopwoat ongete irail kan me kin poakohng oh papah ih. (Dan. 9:4) Kitail men “kahlemengih Koht, nin duwen seri kompoak kei.” (Ep. 5:1) Eri, kitail men kasalehda limpoak loalopwoat ong riatail Kristian kan.​—Wadek Mark 10:29, 30.

5-6. Ia wehwehn “loalopwoat” me aramas kin kalapw doadoahngki?

⁵ Ke pahn pwungki me ni atail esehla mwahu wehwehn limpoak loalopwoat, met pahn sewese kamwahwihala atail kasalehda irair wet ong riatail Kristian kan. Pwehn wehwehki mwahu dahkot limpoak loalopwoat, kitail pahn kilang ia duwen eh weksang soangen loalopwoat me aramas kin wehwehki. Tehk karasaras ehu.

 ⁶ Rahnwet kitail kak nda me emen me kin doadoahk ong kompani ehu erein sounpar tohto wia tohndoadoahk loalopwoat men. Ahpw erein sounpar ko me e wie doadoahk ong kompanio, e saikinte tuhwong kaun kan en kompanio. Ele e sohte kin pwungki koasoandi kan me kompanio wiahda. E sohte poakohng kompoanio, ahpw e perenki pwehki e kak ale pweine. E pahn pousehlahte doadoahk wasao lao lel e kommoaldi de lao e diarada ehu doadoahk me mwahusang ni ehu wasa tohrohr.

7-8. (a) Dahme kin kamwakid emen en kasalehda limpoak loalopwoat? (b) Dahme kahrehda kitail pahn koasoiapene ekei ire kan sang pwuhken Rud?

⁷ Wekpeseng en loalopwoat me  parakrap 6 kasalehda oh limpoak loalopwoat iei dahme kin kamwakid aramaso. Nan Paipel, dahme kin kamwakid sapwellimen Koht aramas kan en kasalehda limpoak loalopwoat? Irail kan me kin kasalehda limpoak loalopwoat sohte kin wia met pwehki re anahne, ahpw pwehki irail men wia. Medewehla mehn kahlemeng en Depit. Eh mohngiong kamwakid ih en kasalehda limpoak loalopwoat ong kompoakepaho Sonadan mendahki en Sonadan pahpao men kemehla Depit. Sounpar kei mwurin Sonadan mehla, Depit pousehlahte kasalehda limpoak loalopwoat ong nein Sonadan pwutako Mepiposed.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Kitail kak sukuhlki soahng tohto duwen limpoak loalopwoat sang ni atail sukuhlki ekei ire kan nan pwuhken Rud. Mehn kasukuhl dah kan duwen limpoak loalopwoat me kitail kak sukuhlkihsang irail kan nan pwuhk wet? Ia duwen atail kak doadoahngki mehn kasukuhl pwukat nan mwomwohdiso? *

9. Dahme kahrehda Naomi medewe me Siohwa ketin uhwong ih?

⁹ Nan pwuhken Rud, kitail wadek koasoipen Naomi, en nah pwutako eh pwoud Rud, oh ohl emen me adaneki Pohas. Pohas kin poakohng Koht oh e peneineiki en Naomi pwoudo. Pwehki duhpek me wiawi nan Israel, Naomi, eh pwoudo, oh neira pwutangko keseula Mohap. Ni arail mi mwo, en Naomi pwoudo mehla. Nah pwutak riemeno pwopwoudla,  ahpw e kansensuwed me ira pil mehla. (Rud 1:3-5; 2:1) Kahpwal pwukat kalaudehla en Naomi nsensuwed. E uhdahn mworusala me kahrehda e medewe me Siohwa kin ketin uhwong ih. Tehk dahme e ndahki duwen Koht: “KAUN-O solahr ketin kupwure ie.” “Pwehki Koht Wasa Lapalap, ketikihong ie apwal laud.” E pil koasoia: “KAUN-O Wasa Lapalap, eh ketin keriaielahr oh wiakauweielahr?”​—Rud 1:13, 20, 21.

10. Ia duwen Siohwa eh ketin mwekidki dahme Naomi koasoia?

¹⁰ Ia duwen Siohwa eh ketin mwekidki dahme Naomi koasoia? E sohte ketin uhdihsang sewese Naomi. E ketin mwahngih ahn Naomi pepehm. Siohwa ketin mwahngih me “kahpwal kak kahrehiong me erpit men en sahliella.” (Ekl. 7:7, NW) Ahpw, Naomi anahnehte sawas pwehn kak kilang me Siohwa kin ketin ieiangete. Sawas dah me Koht ketikihda? (1 Sam. 2:8) E ketin kamwakid Rud en sewese oh kasalehda limpoak loalopwoat ong Naomi. Rud men kasalehiong Naomi limpoak oh sewese ih en dehr nohn mworusala oh en ese me Siohwa ketin poakohngete ih. Dahme kitail sukuhlkihsang en Rud mehn kahlemeng?

11. Dahme kahrehda riatail Kristian kadek tohto kin song en sewese irail kan me nsensuwed laud?

¹¹ Limpoak loalopwoat kin kamwakid kitail en sewese irail kan me lelohng nsensuwed laud. Duwehte Rud eh mihmihte rehn Naomi, riatail Kristian kan rahnwet kin men mihmihte rehn irail kan nan mwomwohdiso me nsensuwedla laud. Irail poakohng riarail Kristian kan, oh re men wia dahme re kak wia pwehn sewese irail. (Lep. Pad. 12:25; 24:10) Met pahrekiong dahme wahnpoaron Pohl kaweidki: “Kaloalamwahwih irail me pahtoula, sewese me luwet akan, oh kanengamahiong koaros.”​—1 Des. 5:14.

12. Ia ahl me keieu mwahu me ke kak wia pwehn sewese riomw Kristian men me nsensuwedla laud?

¹² Ahl me keieu mwahu me ke kak doadoahngki pwehn sewese riomw Kristian men me nsensuwedla iei sang ni omw rong irail oh kamehlelehiong me ke poakohng irail. Siohwa kin ketin kalahnganki omw kin men sewese sapwellime ladu kesempwal kan. (Mel. 41:1) Lepin Padahk 19:17 mahsanih: “Ni omw kin kisekise me semwehmwe kan, duwehte omw patohwanohng KAUN-O, oh KAUN-O ahpw pahn ketin kasapahldohng uhk.”

13. Ia duwen Rud eh weksang Orpa, oh ia duwen Rud eh kasalehda limpoak loalopwoat? (Menlau kilang kilel ni kilin Kahn Iroir wet.)

¹³ Kitail wehwehkihla mwahu duwen limpoak loalopwoat ni atail medewe duwen dahme wiawihong Naomi mwurin eh pwoudo oh nah pwutak riemeno mehla. Ni ahnsou me Naomi esehda me Siohwa “ketin kupwuramwahwihalahr sapwellime aramas akan ni eh ketikihong irail pweidahn wahn sapwarail kan,” e pwurala uhdahn sapweo. (Rud 1:6) En nah pwutangko pwoud ko tepida iangih nan eh seiloako. Ahpw, ni arail alialu kohla, pak siluh Naomi kangoangehki  lih riemeno ira en pwurala Mohap. Dahme wiawi? Kitail wadek: “Orpa ahpw metik Naomi oh kamwurimwuriong, e ahpw pwuralahng rehn kiseh kan, ahpw Rud sohte men mweselsang Naomi.” (Rud 1:7-14) Orpa wia dahme Naomi ndaiong en wia oh pwurala Mohap. Ahpw, Rud wia laudsang dahme Naomi ndaiong en wia. E pil kak pwurala Mohap, ahpw pwehki limpoak loalopwoat, e pilada en mihmihte rehn Naomi. (Rud 1:16, 17) Rud pilada en mihmihte rehn Naomi, kaidehn pwehki e anahne wia met, ahpw pwehki e men. Rud kasalehda limpoak loalopwoat. Dahme kitail sukuhlkihsang dahme Rud wia?

14. (a) Rahnwet, pilipil dah me riatail Kristian kan kin wiahda? (b) Nin duwen me Ipru 13:16 mahsanih, tounmetei dah kan me kin kaperenda Koht?

¹⁴ Limpoak loalopwoat kin kamwakid kitail en wia laudsang dahme anahn. Duwehte mahso, rahnwet riatail Kristian tohto kin pilada en kasalehda limpoak loalopwoat ong riarail kan, pil ong irail kan me re sohte nohn ese. Karasepe, ni arail kin esehda me kahpwal kan duwehte melimel de rerrer en sahpw wiawi, irail kin men esehda ia duwen arail kak sawas. Ni emen nan mwomwohdiso eh kin lelohng kahpwal laud, irail kin mwadangete diarada dahme aramaso anahne oh sewese ih. Duwehte mehn Masedonia kan ni mwehin tepin Kristian ko, irail kin wia laudsang dahme anahn. Irail kihda arail ahnsou oh kepwe kan “pil laudsang dahme re kakohng” pwehn sewese riarail kan me lelohng kahpwal. (2 Kor. 8:3) Ia uwen Siohwa eh ketin kupwurperenkihda arail kasalehda limpoak loalopwoat!​—Wadek Ipru 13:16.

15-16. Ia duwen Rud eh nantihongete en sawas?

¹⁵ Kitail kak sukuhlki mehn kasukuhl mwahu tohto sang ni atail tehk ia duwen Rud eh sewese Naomi. Kitail pahn koasoiapene ekei.

¹⁶ Nantihongete en sawas. Naomi song en kauhdi Rud en iang ih kohla Suda. Ahpw Rud nantihongete en sewese ih. Ia imwilahn met? “Eri, ni Naomi eh esedahr me Rud ngoangki mehlel en iangih, e ahpw sohla koasoia mehkot.”​—Rud 1:15-18.

17. Dahme pahn sewese kitail en nantihongete sawas?

¹⁷ Dahme kitail sukuhlki: Kitail anahne kanengamah pwehn sewese irail kan me nsensuwed laud, ahpw kitail sohte kin uhdi sewese irail. Sister men me lelohng kahpwal ele nin tapio sohte men ale sawas. * Ahpw limpoak loalopwoat pahn kamwakid kitail en wia uwen atail kak en mihmihte reh. (Kal. 6:2) Kitail koapworopworki me mwuhr e pahn mweidohng kitail en sewese oh kansenamwahwih.

18. Dahme ele kamedekihala Rud?

¹⁸ Dehr nsensuwedla. Ni Naomi oh Rud lella Pedleem, Naomi tuhwongdi mehn mpe ko mahs. E ndaiong irail: “Ni ei mweselsang wasaht, I ahneki soahng tohto; a KAUN-O ahpw ketin kapwureiehdo kahiep.” (Rud 1:21) Medewehla ia ahn Rud pepehm ni eh rong dahme Naomi ndao! Rud wia uwen eh kak koaros pwehn sewese Naomi. Rud iangih sengiseng, kansenamwahwih, oh iangih sapalki rahn tohto. Mendahki dahme Rud wia, Naomi koasoia: “KAUN-O ahpw ketin kapwureiehdo kahiep.” Mendahte Rud kesikesihnen limwah, ahn Naomi koasoi ko kasalehda me e sohte kalahnganki en Rud eh sewese ih. Ia uwen met eh kamedek ong Rud! Ahpw e mihmihte rehn Naomi.

19. Dahme pahn sewese kitail en mihmihte rehn emen me nsensuwed laud?

¹⁹ Dahme kitail sukuhlki: Rahnwet, sister  men me kin nsensuwed laud ele nin tapio kin nda mehkot me kansensuwedihala kitail, mendahki atail sewese ih. Ahpw kitail kin song en dehr mworuskihla met. Kitail kin mihmihte rehn sistero, oh peki rehn Siohwa en ketin sewese kitail en ese ia duwen atail kak kansenamwahwihala ih.​—Lep. Pad. 17:17.

20. Dahme kakehlakahda Rud en doulahte?

²⁰ Kihda kangoang ni ahnsou me anahn. Rud kasalehiong Naomi limpoak loalopwoat, ahpw met, pein Rud me anahne kangoang. Oh Siohwa ketin doadoahngki Pohas en kangoange. Pohas ndaiong Rud: “KAUN-O, Koht en Israel, me pein kowe piladahr me wiahla perehpomw, en ketikihong uhk keting laud ehu!” Eh lokaia ko kansenamwahwihala Rud. Oh Rud ndaiong Pohas: “Komw ketikihong ie kakehlepei sang ni omwi kadek ong ie, mendahte ei sohte pahrekiong emente sapwellimomwi ladu kan.” (Rud 2:12, 13) Pohas kangoange Rud ni ahnsou me e anahne oh met kakehlakahda Rud en doulahte.

21. Nin duwen me Aiseia 32:1, 2 mahsanih, sawas dah me elder kan pahn kihda?

²¹ Dahme kitail sukuhlki: Irail kan me kin kasalehiong meteikan limpoak loalopwoat ekei pak anahne mehn kangoang. Duwehte Pohas eh kangoange Rud pwehki eh kadek ong Naomi, elder kan rahnwet kin kalahnganki sawas me riatail Kristian limpoak kan kin wiahiong meteikan. Lokaiahn kangoang pwukat me anahn pahn kakehlaka riatail Kristian kan en doulahte.​—Wadek Aiseia 32:1, 2.

22-23. Ia duwen ahn Naomi pepehm eh wekila, oh dahme kahrehda? (Melkahka 136:23, 26)

²² Mwurin mwo, Pohas kin kisekisehki Rud oh Naomi mwenge. (Rud 2:14-18) Dahme Naomi wia mwurin Pohas kisekise ira? E koasoia: “Ohl menet en alehdi kapai sang rehn Siohwa, me sohte ketin uhdihsang kasalehda limpoak loalopwoat ong me momour oh melahr.” (Rud 2:20a, NW) En Naomi pepehm  wekila. Mwoweo, e sengiseng oh koasoia: “KAUN-O Wasa Lapalap, eh ketin keriaielahr,” ahpw met e peren oh koasoia: “Siohwa, me sohte ketin uhdihsang kasalehda limpoak loalopwoat.” Dahme kahrehda Naomi wekidala eh pepehm?

²³ Naomi tepida wehwehkihda me Siohwa sohte ketin meliehla ih. Ahpw Siohwa ketin doadoahngki Rud en kihda sawas me anahn ni ara seiloakla Suda. (Rud 1:16) Naomi pil kilang Siohwa eh ketin doadoahngki Pohas en ni kadek apwalih ira. Pohas wia emen me ahneki pwung en pwainirahda sapahl. * (Rud 2:19, 20b) Mwein Naomi medewe ‘Met I wehwehkidahr, Siohwa sohte ketin melieiehla. Ahnsowo pwon e kin ketin ieiangete!’ (Wadek Melkahka 136:23, 26.) Naomi uhdahn kalahnganki Rud oh Pohas ara sohte uhdihsang sewese ih. Irail koaros uhdahn perenkihda me Naomi pwurehng ahnekihda peren oh kehl en papah Siohwa.

24. Dahme kahrehda kitail men nantihongete kasalehda limpoak loalopwoat ong riatail Kristian kan?

²⁴ Dahme kitail sukuhlkihsang pwuhken Rud duwen limpoak loalopwoat? Limpoak loalopwoat kin kamwakid kitail en nantihongete sewese riatail Kristian kan me kin nsensuwed laud. E pil kamwakid kitail en wia laudsang dahme anahn pwehn sewese irail. Elder kan anahne kangoange ni ahnsou me anahn irail kan me kin kasalehda limpoak loalopwoat ong meteikan. Ni atail kilang duwen irail kan me anahne sawas ar pwurehng ahneki peren oh kehl en papah Siohwa, kitail kin uhdahn peren. (Wiewia 20:35) Ia kahrepe keieu kesempwal me kitail en pousehlahte kasalehda limpoak loalopwoat? Pwehki kitail men kahlemengih oh pil kaperenda Siohwa me ketin “diren limpoak lapalap oh loalopwoat.”​—Eks. 34:6; Mel. 33:22.