1, 2. Ia duwen Siohwa eh kin ketin kadek ong kitail?

SIOHWA iei Koht kadek men. Soahng koaros me kitail ahneki kohsang reh. E ketin sapwellimanki soahng kesempwal kan koaros nin sampah, oh e kin ketin doadoahngki mepwukat ong sawaspen mour. (Mel. 104:13-15; Ak. 2:8) Nan Paipel, kitail kin sukuhlki duwen Siohwa eh kin ketin doadoahngki soahng kesempwal pwukat ni manaman ekei pak pwehn apwalihki sapwellime aramas akan.

² Karasepe, Siohwa ketikihda manna oh pihl ong wehin Israel ni arail wie koukousoan nan sapwtehn erein sounpar 40. (Eks. 16:35) Imwilahn met, re ahneki soahng koaros me re anahne. (Neh. 9:20, 21) Mwuhr, Siohwa ketikihong soukohp Elisa manaman pwehn kalaudehla kisin luhwen leh me liohdi lelepek men ahneki. Kisakis wet me kohsang rehn Koht sewesehda liho en pwainla eh pweipwand ko oh naineki mwohni me itar ong ih oh nah pwutak ko en momour. (2 Nan. 4:1-7) Oh pwehki sapwellimen Siohwa sawas, Sises kin ni manaman ketikihda mwenge oh pil mwohni ni ahnsou me anahn.​—Mad. 15:35-38; 17:27.

3. Dahme kitail pahn koasoiapene nan iren onop wet?

 ³ Siohwa kak ketin doadoahngki sohte lipilipil dahme e ketin pilada pwehn utung sapwellime kepikipik kan. Ahpw e ketin luke sapwellime ladu kan en kihda dahme irail kak pwehn utung doadoahk en sapwellime pwihn. (Eks. 36:3-7; wadek Lepin Padahk 3:9.) Dahme kahrehda Siohwa ketin kasik kitail en patohwanohng ih soahng kesempwal kan me kitail ahneki? Ia duwen sapwellimen Siohwa ladu kan mahso ar kin utung sapwellime doadoahko? Ia duwen sapwellimen Siohwa pwihn ar kin doadoahngki mwohni me aramas kin toukihda rahnwet? Iren onop wet pahn sapengala peidek pwukat.

4. Dahme kitail kin kasalehiong Siohwa ni ahnsou me kitail kin utung sapwellime doadoahko?

⁴ Kitail kin patohwanohng Siohwa soahng kan me kitail ahneki pwehki kitail poakohng oh kalahnganki ih. Kitail kin uhdahn mwekidki ni atail medewehla soahng koaros me Siohwa ketin wiahiong kitail. Kitail pwungki pepehm me Nanmwarki Depit kasalehda ni eh kawehwehda duwen dahme anahn ong kauwada tehnpas sarawio. Depit koasoia me soahng koaros me kitail alehdi kin kohsang rehn Siohwa oh sohte lipilipil dahme kitail patohwanohng Siohwa kin kohsang dahme e ketikihongehr kitail.​—Wadek 1 Kronikel 29:11-14.

5. Ia duwen Paipel eh kin padahkihong kitail me en kihkihwei ni soh roporop wia kisehn atail kaudok mehlel me kesempwal?

⁵ Kitail pil kin patohwanohng Siohwa soahng kan me kitail ahneki pwehki met iei ehu ahl en kaudokiong ih. Nan kaudiahl ehu, wahnpoaron Sohn rong sapwellimen Siohwa ladu kan nanleng koasoia: “Maing at Kaun oh at Koht! Komwi me uhdahn warohng sapwellimanki lingan, wahu, oh roson. Pwe komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.” (Kaud. 4:11) Ei, Siohwa uhdahn warohng sapwellimanki lingan oh wahu, eri kitail men patohwanohng ih dahme keieu mwahu rehtail. Siohwa ketin doadoahngki Moses pwehn kehkehlikihong wehin Israel en wia kasarawi siluh nan pahr ehu. Kisehn arail kaudok ni kasarawi pwukat kin pidada arail en patohwanohng Siohwa soahng kan me re ahneki. Aramas ako en dehr patohdo mwohn silangin Siohwa ahpw sohte wa mehkot. (Deud. 16:16) Pil rahnwet, soahng kesempwal ehu me kisehn atail kaudok iei en kihkihwei ni soh roporop. Ni ahl wet, kitail kin kasalehda me kitail kin kesempwalki oh utung doadoahk en sapwellimen Siohwa pwihn.

6. Dahme kahrehda e mwahu ong kitail en kihda soahng kan me kitail ahneki? (Menlau kilang tepin kilel.)

⁶ E mwahu ong kitail en kihkihwei ni kadek ahpw kaidehn ihte pwehn ale soahng kan. (Wadek Wiewia 20:35.) Medewehla kisin seri men me alehdi kisin mwohni sang eh pahpa nohno oh eri doadoahngki ekis pwehn pwainda kisakis ehu ong eh pahpa nohno. Ia ahn eh pahpa nohno pepehm ong kisakiso? De medewehla pioneer pwulopwul men me kin kousoan rehn eh pahpa nohno oh kin kihong ira kisin mwohni pwehn sewese pwain arail rent de pwainda kanarail mwenge. Eh pahpa nohno ele sohte kasik me en wia met, ahpw ira ale eh kisakiso. Dahme kahrehda? Pwehki met iei ehu ahl en kasalehda eh kalahngan ong soahng koaros me ira wiahiong ih. Ni ahlohte, Siohwa mwahngih me e mwahu ong kitail en kihda soahng kan me kitail kesempwalki.

7, 8. Ia duwen sapwellimen Siohwa aramas akan mahso ar wia mehn kahlemeng mwahu ni arail kin toukihda soahng kan me re ahneki (a) ong doadoahk tohrohr kan? (b) pwehn sewese sapwellimen Koht doadoahko?

⁷ Nan Paipel, kitail sukuhlki me sapwellimen Siohwa aramas akan kin toukihda sawas kan  pwehn utung sapwellime doadoahko. Ekei pak re kin kihda soahng kan ong doadoahk tohrohr kan. Karasepe, Moses kangoange mehn Israel ko en toukihda sawas ong kokoudahn impwal sarawio. Mwuhr, Nanmwarki Depit wia soahngohte ong kokoudahn tehnpas sarawio. (Eks. 35:5; 1 Kron. 29:5-9) Erein kaundahn Nanmwarki Sohas, samworo ko kin doadoahngki mwohni me aramas akan kihda ong onohnsapahl en tehnpas sarawio. (2 Nan. 12:4, 5) Ni ahnsou me brother kan nan mwomwohdiso en tepin Kristian ko esehda me mie duhpek laud ehu nan Sudia oh me riarail Kristian ko anahne sawas, emenemen irail koasoanehdi uwen me re kak kihda pwehn kadarala rehn riarail ko wasao.​—Wiewia 11:27-30.

⁸ Sapwellimen Siohwa aramas akan pil toukihda neirail mwohni pwehn sewese irail kan me kin tiengla mwowe nan sapwellime doadoahk. Karasepe, pahn Kosonned en Moses, mehn Lipai kan sohte ahneki sohso kan me kadaudok teikan ahneki. Eri mehn Israel ko kin kihong mehn Lipai ko eisek kis ehun dahme re ahneki. Met sewese mehn Lipai ko en doulahte wia arail doadoahk nan impwal sarawio. (Nemp. 18:21) Ni ahlohte, lih kan me kadek kin doadoahngki dahme re ahneki pwehn sewese Sises oh sapwellime wahnpoaron ko.​—Luk 8:1-3.

9. Mahso, ia wasa sawaspen mwohni kan kin kohsang?

⁹ Sawas pwukat kohsang wasa tohto. Mehn Israel ko me kihda sawas kan ong kokoudahn impwal sarawio ele kihda soahng kesempwal kan me re wahsang Isip. (Eks. 3:21, 22; 35:22-24) Ni mwehin tepin Kristian kan, ekei netikihla soahng kan me re ahneki, duwehte arail mwaht de imwarail kan, oh wahdo neirail mwohni ko rehn wahnpoaron ko. Wahnpoaron ko eri doadoahngki mwohni ko ong riarail Kristian kan me anahne sawas. (Wiewia 4:34, 35) Kristian teikan kin kaukaule katohrehla ekis mwohni pwe ren kak kihda pwehn utung doadoahko. (1 Kor. 16:2) Eri me keieu kepwehpwe lella me keieu semwehmwe kin kak kihda mehkot.​—Luk 21:1-4.

10, 11. (a) Ia duwen atail kak alasang sapwellimen Siohwa ladu kadek kan mahso? (b) Ia omw pepehm duwen kihda sawas en mwohni ong doadoahk en Wehio?

¹⁰ Rahnwet, kitail kin pil rong duwen en kihda sawas en mwohni ong irair tohrohr ehu. Ele omw mwomwohdiso wiahda pilahn en onohnsapahlihada omw Wasahn Kaudok de kauwada me kapw ehu. Mwein ohpis en Sounkadehdehn Siohwa kan nan omw wasa anahne onohnsapahlda. Kitail ele kak kihda sawas en mwohni ong atail mihting tohrohr. De kitail pil kak sewese riatail kan nan ehu sahpw tohrohr me lelohng kahpwal kan sang melimel de rerrer en sahpw ape oh anahne atail sawas. Atail sawas kan pil kin sewese misineri kan, pioneer tohrohr kan, sounapwalih me kin seiloak, oh irail kan me kin doadoahk ni poasen kaun oh ohpis en Sounkadehdehn Siohwa kan nan sampah pwon. Omw mwomwohdiso ele pil kin kaukaule kadarala sawas en mwohni pwehn sewese kauwada Wasahn Mihting Tohrohr laud kan oh Wasahn Kaudok kan ong riatail Kristian kan nan sahpw teikan.

¹¹ Kitail koaros kak kihda mehkot pwehn sewese doadoahk me sapwellimen Siohwa pwihn kin wia erein imwin rahn akan. Sohte kin kileldi eden ihs me kin kihda sawaspen mwohni pwukat. Kitail sohte kin ndaiong meteikan ia uwen mwohni me kitail kin kihda ni atail kin kihong mwohni nan koakon en sawas ni Wasahn Kaudok de kihong mwohni nan internet nan jw.org. Ahpw ia duwen ma ke pehm me mwohni me ke toukihda nohn tikitikla oh sohte katepe? E mehlel me pali laud en mwohni me sapwellimen Siohwa pwihn alehdi kin kohsang tohtohn kisakis tikitik kan sang me laud kan. Pil riatail Kristian kan me naineki mwohni tikitik kin alasang tepin Kristian kan nan Masedonia. Re uhdahn “semwehmwe,” ahpw re peki mweimwei en iang kihda mwohni oh irail eri kihda sawas laud.​—2 Kor. 8:1-4.

12. Ia duwen sapwellimen Siohwa pwihn ar kin song en doadoahngki sawaspen mwohni kan ni ahl me keieu mwahu?

 ¹² Pwihn me Kin Apwalih Mwomwohdiso nan Sampah Pwon kin lelepek oh loalokong ong kadoadoahkpen sawaspen mwohni pwukat. (Mad. 24:45) Re kin kapakap pwehn wiahda pilipil mwahu kan, oh ni keneinei re kin pilahnehda ia duwen arail en doadoahngki mwohni ko. (Luk 14:28) Mahso, ohl lelepek kan me kin apwalih palien mwohni kin tehk kanahieng me re kin doadoahngki mwohni ko ongete arail kaudok ong Siohwa. Karasepe, Esra pwurala Serusalem wa soahng kesempwal kan me nanmwarkien Persia toukihda, iangahki kohl, silper, oh soahng kesempwal teikan me ele pahn daulih $100,000,000 (U.S.) rahnwet. Esra kilangwohng sawas pwukat nin duwen kisakis kei ong Siohwa. Eri e kihda kaweid oaritik kan duwen arail en pere mepwukat ni arail wa kotehla sahpw keper kan. (Esra 8:24-34) Sounpar tohto mwuri, wahnpoaron Pohl kihpene mwohni pwehn sewese rie Kristian semwehmwe kan nan Sudia. E tehk kanahieng me irail ko me wahla mwohni ko en apwalih mwohni ko “pwe soahng koaros en pwung, kaidehkinte mwohn silangin Kaun-o, ahpw pil mwohn mesen aramas akan.” (Wadek 2 Korint 8:18-21.) Rahnwet, atail pwihn kin alasang Esra oh Pohl oh doadoahngki sawaspen mwohni pwukat ni keneinei.

13. Dahme kahrehda me keren sapwellimen Siohwa pwihn wiahda soangen wekidekla kan?

¹³ Peneinei ehu ele kin wiahda wekidekla kan ong mwomwen arail kin doadoahngki neirail mwohni pwe ren dehr doadoahngkihla uwen mwohni laud sang dahme re kin alehdi. De re kin rapahki ahl akan en kihsang soahng kan me sohte nohn kesempwal nan arail mour pwe ren kak kalaudehla arail papah Siohwa. Sapwellimen Siohwa pwihn pil kin wia duwehte. Me keren, mie doadoahk kapw tohto me wiawi, oh ekei pak, mwohni me re doadoahngkihla laudsang uwen mwohni me alahldi. Eri sapwellimen Siohwa pwihn, nin duwen peneinei ehu, kin rapahki ahl akan en dehr nohn doadoahngki mwohni laud oh pil kamengeila doadoahko, pwe mwohni me ke toukihda en kak kadoadoahk ni ahl me keieu mwahu.

14-16. (a) Dahme sawaspen mwohni kan me ke toukihda kin kadoadoahk ong? (b) Ia duwen doadoahk pwukat ar seweseiuk?

¹⁴ Me tohto me mi nan padahk mehlel erein sounpar tohto nda me ahnsou wet kitail kin alehdi kisakis tohto sang sapwellimen Siohwa pwihn laudsang mahso. Met mie neitail website jw.org oh JW Broadcasting. Mie neitail Paipel New World Translation of the Holy Scriptures ni lokaia tohto. Nan pahr 2014/2015, mihting tohrohro  (International Convention) “Rapahki Mahs Wehin Koht!” wiawi nan ekei wasahn mwadong laud kan nan kahnimw 14 nan sampah pwon. Koaros me towehda mihting tohrohro uhdahn perenki!

¹⁵ Me tohto kasalehda ia uwen arail kalahnganki kisakis pwukat sang rehn sapwellimen Siohwa pwihn. Karasepe, pwopwoud ehu me kin papah nan Eisia koasoia: “Wasa me se pekederla ie mi nan kahnimw tikitik ehu. Pwehki met, se kin pehm me se kelekelehpw, oh e kin mengei en manokehla ia uwen laud en sapwellimen Siohwa doadoahk. Ahpw ni ahnsou me se kilang soangsoangen prokram kan nan JW Broadcasting, se kin tamanda me se iang kisehn pirien en Kristian ehu nan sampah pwon. Riat Kristian kan wasaht uhdahn kin perenki JW Broadcasting. Se kin kalapw rong arail kin nda me mwurin arail kilang prokram pwukat me kin wiawi sounpwong koaros, re kin pehm me re karanihala Pwihn me Kin Apwalih Mwomwohdiso nan Sampah Pwon. Met laudla arail pohlki ar iang kisehn sapwellimen Koht pwihn.”

¹⁶ Nan sampah pwon, kereniong Wasahn Kaudok 2,500 me kokouda de onohnsapahlda ni ahnsou wet. Ekei nan ehu mwomwohdiso nan Honduras nda me re kin ouramanki en mie pein arail Wasahn Kaudok, ahpw met ouramano pweidahr. Re nda: “Se uhdahn perenki at iang kisehn sapwellimen Siohwa peneinei oh perenki wia kisehn pirien en Kristian ehu nan sampah pwon.” Me tohto pil kasalehda soangen pepehmohte ni arail ale Paipel oh sawaspen Paipel teikan ni pein arail lokaia, ni riarail Kristian kan ar sewese irail mwurin kahpwal laud en melimel de rerrer en sahpw ape, de ni arail kin kilang imwila mwahu en arail kin wia soangen wiepen kalohk nan wehipokon nan arail wasahn kalohk.

17. Ia duwen atail ese me Siohwa kin ketin sewese sapwellime pwihn rahnwet?

¹⁷ Me tohto me kaidehn Sounkadehdehn Siohwa kei sohte kak wehwehki ia duwen atail kin wia soahng koaros ni atail doadoahngkihte mwohni me aramas toukihda. Emen kaun en pesines laud ehu mwemweitla ni ehu atail wasahn wiahda sawaspen Paipel kan. E pwuriamweikihla me doadoahk koaros kin pweida pwehki sawas sang irail kan me toukihda pein arail ahnsou, mwohni me aramas toukihda, oh pil sohte koasoandi kan pwehn wiahda mwohni. E nda me dahme kitail wiewia sohte kin kak wiawi. Kitail pwungki! Kitail ese me met kak wiawi ihte pwehki sapwellimen Siohwa sawas ong doadoahk wet.​—Sohp 42:2.

18. (a) Kapai dah kan me kitail kin alehdi ni atail kin kihda sawas ong Wehio? (b) Ia duwen atail kak padahkihong neitail seri kan oh me kapw kan en pil wia duwehte?

¹⁸ Siohwa ketikihong kitail pwais oh ahnsou mwahu en utung doadoahk en Wehio. E ketin kamehlelehiong kitail me ma kitail wia met, e pahn ketin kapaikitailda. (Mal. 3:10) Siohwa ketin inoukihda me ma kitail kin kihkihwei ni kadek, soahng mwahu kan pahn wiawihong kitail. (Wadek Lepin Padahk 11:24, 25.) E pil mahsanihong kitail me kitail pahn peren ma kitail kin kihkihwei, pwe “kihwei kaperen sang ale.” (Wiewia 20:35) Sang dahme kitail kin nda oh wia, kitail kak padahkihong neitail seri kan oh me kapw kan ia duwen arail pil kak kihda sawas ong doadoahk wet oh perenki kapai tohto.

19. Ia duwen iren onop wet eh kangoange iuk?

¹⁹ Soahng koaros me kitail ahneki kin kohsang rehn Siohwa. Ni atail kin patohwanohng ih soahng kan me kitail ahneki, kitail kin kasalehda me kitail poakohng ih oh kesempwalki soahng koaros me e ketin wiahda kitail. (1 Kron. 29:17) Ni mehn Israel ko ar kihda sawas ong kokoudahn tehnpas sarawio, re “patohwanda dipwisou kan sang ni pein nsenarail ong KAUN-O, oh re perenkihda ar patohwanda uwe ieu me inenen laud.” (1 Kron. 29:9) Kitail pil kin pousehlahte peren ni atail kin patohwanohng Siohwa soahng kan me e ketikihongehr kitail.