Luslahng audepe kan

luslahng audepe kan

“E Kin Ketin Kakehlahda me Luwet oh me Pwangadahr kan”

“E Kin Ketin Kakehlahda me Luwet oh me Pwangadahr kan”

Atail iren pahr en 2018: ‘Irail kan me kin koapworopworki Siohwa, pahn onehda sapahl ar kehl.’​—AIS. 40:31.

KOUL KAN: 3, 47

1. Soangen kahpwal dah kei me kitail anahne dadaur pah? Dahme kahrehda Siohwa kin ketin kupwurperenkihda sapwellime ladu lelepek kan? (Menlau kilang tepin kilel kan.)

MOUR nan koasoandi wet sohte mengei. Karasepe, me tohto rehmwail kin ahneki soumwahu laud. Meteikan, me pil mahlahr, anahne apwalih kisehrail kan me mahlahr. Ekei pil kin nannanti en apwalihala anahn en arail peneinei. Oh se pil ese me kaidehn ehute rehn kahpwal pwukat me me tohto rehmwail kin ahneki. Kumwail ahneki me tohtohsang. Kehl oh mwohni oh ahnsou laud kin anahn pwehn wia met. Ahpw ke uhdahn kamehlele me Siohwa pahn ketin sewese iuk. Ke ese me soahng kan pahn mwahula pwehki ih met me e ketin inoukihda. Omw pwoson kin uhdahn kaperenda Siohwa!

2. Ia duwen Aiseia 40:29 eh kangoange kitail, ahpw sapwung laud dahieu me kitail kakete wiahda?

2 Ia duwe, ekei pak ke kin pehm me omw kahpwal kan me nohn apwal en dadaur pah? Ma ke ahneki soangen pepehm wet, kaidehn kowe kelehpw. Ekei sapwellimen Koht ladu lelepek kan mahso pil pehm me re sohte kak pousehlahte dadaur. (1 Nan. 19:4; Sohp 7:7) Dahme sewese irail en dadaurete? Re koapworopworki sapwellimen Siohwa kehl. Paipel mahsanih me Koht “kin ketin kakehlahda me  luwet oh me pwangadahr kan.” (Ais. 40:29) Ahpw e kansensuwed me ekei rehn sapwellimen Koht ladu kan rahnwet medewe me ahl me keieu mwahu en dadaur pahn arail kahpwal kan iei en uhdihsang papah Siohwa erein ahnsou kis. Re medewe me papah Siohwa kin wia katoutou ehu, ahpw kaidehn kapai ehu. Eri, re kin uhdihsang wadek Paipel, kohla iang mihting kan, oh kalohk. Ih met me Sehdan men irail en wia.

3. (a) Ia duwen atail kak kauhdi Sehdan sang eh pahn kaluweteikitailla? (b) Dahme kitail pahn koasoiapene nan iren onop wet?

3 Tepilo sohte men kitail en kehlail. Oh e ese me kitail kin kehlailda ni atail kin uhdahn kedirepwkihla atail papah Siohwa. Eri, ni omw pehm me ke uhdahn pwangadahr, dehr kadohwaneweiukasang Siohwa. Karanihala ih. Paipel mahsanih: “E pahn ketin kaunsengkumwailla, kakehlaikumwailda.” (1 Pit. 5:10; Seims 4:8) Nan iren onop wet, kitail pahn sukuhlkihsang Aiseia 40:26-31 duwen Siohwa eh kak ketin kakehlakakitailda. Kitail pil pahn koasoiapene irair riau me kakete kahrehiong kitail en katikala atail doadoahk ong Siohwa, oh sukuhlki ia duwen atail pahn doadoahngki kaweid kan en Paipel me kak sewese kitail en dadaurete.

IRAIL KAN ME KIN KOAPWOROPWORKI SIOHWA PAHN ONEHDA SAPAHL ARAIL KEHL

4. Mehn kasukuhl dah me kitail kak sukuhlkihsang Aiseia 40:26?

4 Wadek Aiseia 40:26. Sohte me kak wadekedi usu kan koaros pahnlahng. Saintis kan kamehlele me ele mie mpen usu lik pak 400 nan ehute mwutumwut en usu me adaneki Milky Way. Ahpw Siohwa ketikihong eden ehuehu usu kan. Dahme met padahkihong kitail duwen Siohwa? Ma e ketin nsenohki ketikihong eden usu kan, medewehla ia sapwellime pepehm ong uhk! Ke kin papah ih, kaidehn pwehki ke anahne wia met, ahpw pwehki ke poakohng ih. (Mel. 19:1, 3, 14) Samatailo ketin mwahngih soahng koaros duwen kowe. Paipel mahsanih me “pil pitenmoangamwail koaros iangehr wadawadedi.” (Mad. 10:30) Siohwa ketin kupwurki kitail en ese me e “ketin mwahngih dahme aramas mwahu kan kin lelohng.” (Mel. 37:18NW) E sansal me Siohwa ketin mwahngih kahpwal koaros me ke ahneki, oh e kak ketikihong uhk kehl me ke anahne pwehn dadaur pahn ehuehu kahpwal pwukat.

5. Ia duwen atail kak kamehlele me Siohwa kak ketin kakehleikitailda?

5 Wadek Aiseia 40:28. Siohwa iei utupen kehl koaros. Karasepe, medewehla uwen kehl me e ketikihong ketipin. Sounnting en palien sains me adaneki David Bodanis nda me uwen kehl me ketipino kin kihda nan seken koaros rasehng pospeseng en pakudang kehlail (atomic bomb) lik lik kei. Pil emen sounroporop kapatahda me ketipino kin kihda nan seken ehute kehl me itar en kaitarala anahn en aramas koaros nan sampah pwon ong erein sounpar 200,000! Eri Siohwa, me ketikihong ketipino kehl, kak ketikihong kitail kehl me kitail anahne pwehn dadaur pahn atail kahpwal kan.

6. Ni ahl dah me sapwellimen Sises mehn wisik kin kansenamwahu, oh dahme met kin wiahiong kitail?

6 Wadek Aiseia 40:29. Papah Siohwa kin wadohng kitail peren laud. Sises mahsanihong sapwellime tohnpadahk kan: “Ale ei mehn wisik.” E pil mahsanih: “Kumwail ahpw pahn diar nsenamwahu. Pwe ei mehn wisik me kansenamwahu oh dahme I peki kumwail en wahda me marahra.” (Mad. 11:28-30NW) Met uhdahn mehlel! Ekei pak, ele kitail kin uhdahn pwangada ni atail kin kohkohsang ni imwatail pwehn iang towehda mihting kan de kohla kalohk. Ahpw ia atail pepehm ni ahnsou me kitail kin pwurala ni imwatail kan? Kitail kin nsenamwahula oh kakehr apwalih atail kahpwal kan. Mehlel, sapwellimen Sises mehn wisik me kansenamwahu.

7. Menlau kihda ehu karasaras me kasalehda mehlelpen Madiu 11:28-30.

7 Medewehla mehn kahlemeng en emen riatail sister. E kohwahki soumwahu en nsensuwed  laud, moangmedek oh kin pwang ahnsou koaros. Eri ekei pak e uhdahn apwal ong ih en iang towehda mihting kan. Ahpw ehu rahn, mwurin eh nantihong laud en kohla iang mihting, e ntingihedi: “Padahko pidada duwen nsensuwed laud. Brother me wia padahko kasalehda pepehm en poakehla oh nsenoh me kahrehda pilen mesei kan kohda. Met katamankihong ie me I anahne towehda mihting kan.” Sistero uhdahn perenki eh nantihong laud en towehda mihtingo!

8, 9. Ia wehwehn Pohl eh ntingihedi: “Ni ei kin luwet, iei ahnsou me I kin kehlail”?

8 Wadek Aiseia 40:30. Mwein mie soangen koahiek tohto me kitail ahneki, ahpw mie irepen dahme kitail kak wia sang ni pein atail kehl. Met wia mehn kasukuhl ehu ong kitail koaros. Wahnpoaron Pohl kak wia soahng tohto, ahpw e sohte kak wia soahng koaros me e men wia. Ni eh patohwanohng Siohwa duwen eh pepehm, Siohwa ketin mahsanihong ih: “Ei manaman kin sansalda mehlel rehn me luwet akan.” Pohl wehwehki dahme Siohwa ketin mahsanihong ih. Ihme kahrehda e nda: “Ni ei kin luwet, iei ahnsou me I kin kehlail.” (2 Kor. 12:7-10) Ia wehwehn met?

9 Pohl wehwehki me mie irepen dahme e kak wia sang ni pein eh kehl. E anahne sawas sang rehn emen me uhdahn kehlail sang ih. Sapwellimen Koht manaman kak kihong Pohl kehl ni ahnsou me e kin luwet. Oh manamano pil kak wia laudsang. E kak kihong Pohl kehl pwe Pohl en kak kapwaiada soahng kan me e sohte kak wiahda sang ni pein eh kehl. Met pil kak wiawihong kitail. Ni Siohwa eh kin ketikihong kitail sapwellime manaman, kitail pahn uhdahn kehlailda!

10. Ia duwen Siohwa eh ketin sewese Depit en dadaur pahn eh kahpwal kan?

10 Sounmelkahkao Depit kin kalapw kilang duwen sapwellimen Koht manaman eh kakehlakahda ih. E koulki: “Komw ketin kakehleiehda pwe I en mahweniong ei imwintihti kan oh ketikihong ie manaman pwe I en kak powehdi arail kelen mahwen kan.” (Mel. 18:29) Duwehte kehl ileile ehu me kitail sohte kak daur, ekei pak atail kahpwal kan inenen laud me kahrehda kitail sohte kak pein apwalihala. Kitail anahne sapwellimen Siohwa sawas.

11. Ia duwen sapwellimen Koht manaman eh kin sewese kitail en dadaur pahn atail kahpwal kan?

11 Wadek Aiseia 40:31. Ikel kan sohte kin doadoahngkihte pein ar kehl ni ar kin wie pipihr. Kehl en ahng karakar me kin kohda pahnlahng iei me kin sewese ikel men en pihr kohdahla nan wehwe. Met kahrehda ikelo en kak pihrla wasa doh ahpw sohte doadoahngki kehl laud. Eri ni omw kin ahneki kahpwal laud ehu, medewehla duwen ikelo. Peki rehn Siohwa en ketin kalaudehla omw kehl sang “sounsawaso, sapwellimen Koht manaman.” (Sohn 14:26NW) Kitail kak peki Siohwa en ketikihong kitail sapwellime manaman ahnsou koaros. Ele kitail kin keieu anahne sapwellime sawas ni ahnsou me sawehwe kin wiawi nanpwungen kitail oh emen riatail Kristian nan mwomwohdiso. Ahpw dahme kahrehda soangen sawehwe pwukat kin pwarada?

12, 13. (a) Dahme kahrehda ekei pak sawehwe kin pwarada nanpwungen Kristian kan? (b) Dahme mour en Sosep padahkihong kitail duwen Siohwa?

12 Sawehwe kin wiawi pwehki kitail koaros sohte unsek. Ekei pak, ele kitail kin lingeringerkihda dahme meteikan kin nda de wia, de mwein meteikan lingeringerda pahtail. Met kak wia kasongosong laud ehu. Ahpw e kin kihong kitail ahnsou mwahu en kasalehda atail loalopwoatohng Siohwa. Ia duwen? Sang ni atail kin sukuhlki en doadoahkpene ni minimin rehn riatail Kristian kan. Siohwa kin ketin poakohng irail mendahki arail soh unsek kan, eri kitail en pil wia duwehte.

Siohwa sohte ketin likidmeliehla Sosep, oh e sohte pahn ketin likidmelieiukala (Menlau kilang parakrap 13)

13 Siohwa sohte kin ketin kauhdi kasongosong kan en dehr lelohng sapwellime ladu kan. Kitail sukuhlki met sang mour en Sosep. Ni Sosep eh wia mwahnakapw men, rie pwutak ko kin peirinki ih. Re netikihla ih nin duwen lidu men oh me  pwainda ih ko walahng ih Isip. (Sen. 37:28) Siohwa ketin mwahngih soahng koaros me wiewiawi oh e uhdahn kupwursuwedkihla soahng suwed kan me wiawihong sapwellime ladu lelepek oh kompoakepaho, Sosep. Ahpw Siohwa sohte ketin kauhdi dahme wiawi. Mwuhr, ni aramas akan ar nda me dene Sosep song en angkehlailiong ahn Podipar eh pwoudo oh eri lekdekla nan imweteng, Siohwa sohte pil ketin kapitala Sosep. Ia duwe, Koht ketin likidmeliehla Sosep? Soh. Paipel mahsanih me Siohwa kin “ketin ieiang Sosep pwe mehkoaros me e kin wia en pweida mwahu.”​—Sen. 39:21-23.

14. Ia duwen atail en dehr lingeringer eh kin wia kamwahu ong kitail?

14 Pil ehu mehn kahlemeng iei Depit. Pali laud en aramas akan sohte kin lelohng soangen wiewia suwed kan me lelohng Depit. Ahpw kompoakepahn Koht menet sohte mweidohng lingeringer en powehdi ih. E ntingihedi: “Ke dehr pwunod de lingeringer; pwe met pahn kahrehiong uhk nan apwal.” (Mel. 37:8) Kahrepe keieu kesempwal me kitail en “dehr” lingeringer iei kitail men kahlemengih Siohwa. E “sohte kin ketin kalokei kitail nin duwen me konehng kitail” ahpw e ketin mahkohng kitail. (Mel. 103:10) Pil mie kahrepe mwahu teikan me kitail en dehr lingeringer. Karasepe, lingeringer kak kahrehda nta laud oh kahpwal en esingek. E kak kauwehla eh oh keisar en aramas oh e pil kak kahpwalihala omw pahn kin mwenge. Pil ehu, ni atail kin lingeringerda, kitail sohte kin ahnsou koaros medewe soahng kan ni pwung. Kitail kak nda de wia soahng kan me kin kamedekihala meteikan, oh met kak kahrehiong kitail en nsensuwedla laud erein ahnsou werei. E pahn mwahu ma kitail kin meleilei. Paipel mahsanih: “Nan kapehd meleilei kin karosonehda paliwar.” (Lep. Pad. 14:30) Eri, dahme kitail kak wia ni meteikan ar kansensuwedihada kitail, oh ia duwen atail kak rapahki popohl rehn riatail Kristian men? Kitail kak doadoahngki kaweid erpit kan en Paipel.

NI ATAIL KIN NSENSUWEDLA PAHN RIATAIL KAN

15, 16. Dahme kitail en wia ni emen eh kamedekihala kitail?

15 Wadek Episos 4:26. Kitail sohte kin pwuriamweikihla ni aramas akan me sohte kin papah Siohwa ar wia kauwe kitail. Ahpw ni riatail Kristian men de emen atail peneinei ar kin nda de wia mehkot me kamedekihala kitail, ele kitail kin uhdahn mworuskihla. Ia duwen ma kitail sohte kak manokehla dahme wiawi? Kitail pahn kolokolte atail lingeringer, mwein erein sounpar tohto? De kitail pahn idawehn kaweid erpit kan en Paipel pwehn mwadang apwalihala kahpwalo? Ma kitail sohte mwadang en koasoiong aramaso, e pahn pil apwalla ong kitail en wiahda popohl reh.

16 Ia duwen ma riomw Kristian men kansensuwediukala oh ke sohte kak uhdihsang omw  medemedewe met? Dahme ke kak wia pwehn wiahda popohl? Keieu, ke kak kapakap ong Siohwa. Peki reh en ketin seweseiuk en kapehse mwahu rehn riomwo. Tamataman me riomwo pil wia emen kompoakepahn Siohwa. (Mel. 25:14) Koht ketin poakohng ih. Siohwa kin ketin kadek ong kompoakepah kan, oh e kin ketin kasik me kitail en pil wia duwehte. (Lep. Pad. 15:23; Mad. 7:12; Kol. 4:6) Keriau, medewe kanahieng dahme ke pahn ndaiong riomwo. Dehr lemeleme me e men kamedekeiukala. Mwein sapwungala ieu met de ke sohte uhdahn wehwehki irairo. Dehr suwedki en nda me ele kowe me pil iangete kahrehda kahpwalo. Ke kak tepikihda amwa koasoipeneo ni omw nda, “Mwein I kin nohn keh mwakar, ahpw ni omw koasoiong ie aio, I pehm me . . .” Ma amwa koasoipeneo sohte sewese kumwa en ahneki popohl, dehr uhdi. Kapakapki riomwo. Peki rehn Siohwa en ketin kapaiahda ih oh en ketin seweseiuk en medemedewehte irair mwahu kan en riomwo. Ke kak uhdahn kamehlele me Siohwa pahn ketin kupwurperenkihda omw kin nannanti ni mehlel en wiahda popohl rehn riomwo, me pil wia emen kompoakepah.

NI ATAIL KIN NSENSUWEDKIHLA DAHME KITAIL WIAHDA MAHSO

17. Ia duwen Siohwa eh ketin sewese kitail en kamwahwihala atail nanpwungmwahu reh ni atail wiahda dihp, oh dahme kahrehda kitail anahne pohnese oh ale sawas wet?

17 Ekei kin pehm me re sohte warohng en papah Siohwa pwehki dihp laud ehu me re wiahda. Pepehm wet kak kihsang atail meleilei, peren, oh kehl. Nanmwarki Depit ahneki soangen pepehm wet oh e nda: “Ni ei sohte kin wehkada dipei kan, I kin tihwohla wie sengiseng sang nimenseng lel nipwong.” Ahpw Depit ahneki eimah en wia dahme Siohwa ketin kupwurki sapwellime ladu kan en wia. E ntingihedi: “I ahpw wehkadahng komwi dipei kan, . . . komwi ahpw ketin mahkikihong ie dipei kan koaros.” (Mel. 32:3-5) Ma ke wiahda dihp laud ehu, Siohwa pahn ketin mahkohng uhk. E kin kupwurki seweseiuk en kamwahwihala omw nanpwungmwahu reh. Ahpw ke anahne pohnese oh ale sawas kan me e ketikihda rehn elder kan. (Lep. Pad. 24:16; Seims 5:13-15) Eri dehr awih! Met pidada omw pahn ahneki mour soutuk. Ahpw ia duwen ma ahnsou werei mwurin omw ale mahkpen dipomwo, ke kin nsensuwedkihte? Dahme ke pahn wia?

18. Ia duwen mehn kahlemeng en Pohl eh sewese irail kan me pehm me re sohte warohng papah Siohwa?

18 Mie pak me wahnpoaron Pohl kin nsensuwedla pwehki dihp kan me e wiahda mahso. E nda: “Ngehi me keieu tikitik nanpwungen wahnpoaron kan oh I sohte warohng adaneki wahnpoaron, pwehki ei kalokeier mwomwohdisohn Koht.” Ahpw Pohl pil nda: “Ahpw I kak wia doadoahk wet pwehki sapwellimen Koht kadek sapan.” (1 Kor. 15:9, 10NW) Siohwa ketin mwahngih me Pohl sohte unsek. Ahpw e ketin kupwurperenkihte Pohl mendahki ahn Pohl wiewia sapwung kan mahs, oh e ketin kasik me Pohl en pohnese met. Ma ke uhdahn koluhkihla dahme ke wiahdao oh patohwan padahkihong Siohwa duwen met, oh pil ong elder kan ma anahn, Siohwa pahn uhdahn ketin mahkohng uhk. Ken kamehlele oh pil pohnese me Siohwa ketin mahkohngehr dipomw.​—Ais. 55:6, 7.

19. Ia iren pahr en 2018, oh dahme kahrehda ire wet konehng?

19 Ni atail kerenlahngehr imwin koasoandi wet, kitail kak kasik me atail kahpwal kan pahn tohtohla. Ahpw kitail anahne tamataman me Siohwa, me “kin ketin kakehlahda me luwet oh me pwangadahr kan,” kak ketikihong uhk sohte lipilipil dahme ke anahne pwehn pousehlahte papah ih ni lelepek. (Ais. 40:29; Mel. 55:22; 68:19) Erein pahr 2018, kitail pahn tamataman ire kesempwal wet ahnsou koaros kitail kin kohla ni mihting kan ni atail Wasahn Kaudok oh kilang iren pahro koasoia: ‘Irail kan me kin koapworopworki Siohwa, pahn onehda sapahl ar kehl.’​Ais. 40:31.