Luslahng audepe kan

luslahng audepe kan

Kilang Wekpeseng en Aramas

Kilang Wekpeseng en Aramas

“Kumwail eri pahn . . . kilang wekpeseng en aramas pwung kan oh aramas suwed kan.”​—MAL. 3:18.

KOUL KAN: 127, 101

1, 2. Soangen kahpwal dah kan me sapwellimen Koht aramas akan kin lellong rahnwet? (Menlau kilang tepin kilel.)

TOAHKTE oh nurse tohto kin doadoahk rehn aramas akan me ahneki soumwahu me kin douseli. Re kin apwalih me soumwahu kan pwehki re kin nsenohkin irail. Ahpw re pil anahne pere irail pwe ren dehr soumwahukihda soumwahu ko me irail kin nantihong en kamwahwihala. Nin duwen sapwellimen Siohwa ladu kan, atail irair kin duwehte arail. Me tohto rehtail kin kousoan oh iang doadoahk rehn aramas akan me kin ahneki madamadau oh irair kan me uhdahn weksang sapwellimen Koht irair kan. Met kak apwal ong kitail.

2 Ni imwin rahn pwukat, aramas akan me sohte kin poakohng Koht kin pohnsehsehla sapwellime koasoandi kan me pid dahme pwung oh dahme sapwung. Wahnpoaron Pohl kawehwehda arail irair suwed kan ni eh ntinglahng rehn Timoty. Pohl nda me irair suwed pwukat pahn lalaudla ni atail kerenlahngehr ni imwin koasoandi wet. (Wadek 2 Timoty 3:1-5, 13, NW.) * Mendahki atail kin pwuriamweikihla irair  suwed pwukat, mwomwen ahn aramas akan arail madamadau, koasoi, oh wiewia kak kamwakid kitail. (Lep. Pad. 13:20) Nan iren onop wet, kitail pahn kilang uwen irair pwukat ar weksang irair kan en sapwellimen Koht aramas akan. Kitail pil pahn kilang dahme kitail kak wia pwehn pere kitail sang irair suwed kan ni atail kin sewese aramas akan en esehla Siohwa.

3. Soangen aramas dah me 2 Timoty 3:2-5 koasoia?

3 Pohl nda me e pahn “mie ahnsou apwal oh keper” ni imwin rahn akan. Ih eri kasalehda irair suwed 19 me kin kalapw wiawi nan atail ahnsou. Irair pwukat duwehte irair suwed ko me Pohl koasoia nan Rom 1:29-31, ahpw dahme e kasalehda nan nah kisinlikou ong Timoty kin doadoahngki lepin lokaia kan me kitail sohte kak diar ehu wasa tohrohr nan Palien Paipel ni Lokaiahn Krihk. Pohl tepikihda lepin lokaia kan “aramas pahn.” Met wehwehki me “aramas,” ohl oh lih, kak ahneki irair suwed kan. Ahpw kaidehn aramas koaros kin ahneki irair suwed kan me Pohl kawehwehda. Kristian kan ahneki irair kan me uhdahn weksang.​—Wadek Malakai 3:18.

MWOMWEN ATAIL KIN KILANG PEIN KITAIL

4. Ia duwen omw kak kawehwehda duwen irail kan me kin aklapalap?

4 Mwurin Pohl nda me aramas akan pahn roporop ong pein irail, e pil nda me aramas akan pahn aksuwei, pohnmwahso, oh aklapalap. Aramas me kin ahneki soangen irair suwed pwukat kin kalapw medewe me re mwahusang meteikan pwehki mwomwarail, dahme re kak wia, dahme re ahneki, oh ma re lapalap de soh. Laudsang soahng koaros, soangen aramas pwukat kin mwahuki aramas en tehk de wauneki irail. Emen ohl saman koasoia duwen soangen aramas me duwehte met: “Nan eh mohngiong mie kisin mwoahl ehu me pein ih kin poaridi mwowe.” Ekei kin nda me aklapalap uhdahn suwed, pil pein aramas aklapalap kan sohte perenki ni arail kilang meteikan ar kin aklapalap.

5. Ia duwen ekei sapwellimen Siohwa ladu lelepek kan ar aklapalapala?

5 Siohwa ketin kalahdeki pohnmwahso, me Paipel mahsanih me iei aramas “aklapalap.” (Lep. Pad. 6:16, 17) Ni mehlel, aklapalap kin kahrehiong aramas men en dohsang Koht. (Mel. 10:4) Aklapalap iei ehu irair en Tepilo. (1 Tim. 3:6) E kansensuwed me ekei sapwellimen Koht ladu kan pil kin aklapalapala. Karasepe, Nanmwarki en Suda, Usaia, kin lelepek erein sounpar tohto. Ahpw Paipel mahsanih: “Ahnsou me Usaia kehlaillahr, e ahpw aklapalapala, oh met kahrehiong eh pwupwudi. E mwamwahlkihla KAUN-O eh Koht.” Usaia kohla ni tehnpas sarawio oh isik warpwohmwahu, ahpw e sohte ahneki pwuhng en wia met. Mwuhr, Nanmwarki lelepeko Esekaia pil aklapalapala, ahpw met sohte werei.​—2 Kron. 26:16; 32:25, 26.

6. Dahme ele kak kahrehiong Depit en aklapalapala? Ahpw dahme kahrehda e kolokolete eh aktikitik?

6 Ekei aramas kin aklapalapala pwehki re masamwahu, ndand, samanih koul oh keseng, kehlail, oh meteikan kin wauneki irail. Depit kin ahneki soangen koahiek pwukat koaros, ahpw e kin wia aramas aktikitik men erein eh mour. Karasepe, ni ahnsou me Depit kemehla Kolaiad, Nanmwarki Sohl nda me Depit kak pwoudikihda nah serepeino. Ahpw Depit nda: “Ihs ngehi oh ei peneinei pwe I en pwoudiki sapwellimen nanmwarki serepein?” (1 Sam. 18:18) Dahme sewese Depit en kolokolete eh aktikitik? E ese me soangen irair kaselel, koahiek, oh pwais kan me e ahneki kin kohsang en Koht eh ketin aktikitik oh ketin tehk ih. (Mel. 113:5-8) Depit wehwehki me soahng mwahu koaros me e ahneki kohsang rehn Siohwa.​—Pil kilang 1 Korint 4:7.

7. Dahme pahn sewese kitail en kasalehda me kitail aktikitik?

7 Duwehte Depit, sapwellimen Siohwa aramas akan rahnwet kin song en aktikitik. E kin sair mohngiongitail ni atail ese me pein Siohwa, Wasa Lapalahpie, kin ketin aktikitik. (Mel. 18:35) Kitail kin song en doadoahngki mahsen pwukat:  “Kumwail en limpoak ong me mi nan apwal akan, kadek, mpahi oh karakarahk, aktikitik oh kanengamah.” (Kol. 3:12) Kitail pil ese me limpoak sohte kin “aklapalap de pohnmwahso.” (1 Kor. 13:4) Ni meteikan ar kin kilang me kitail kin aktikitik, irail pil kakete men esehla Siohwa. Duwehte ohl pwopwoud men kak karanihala Siohwa pwehki wiewia mwahu en eh pwoud Kristiano, aramas akan kak pil karanihala Koht pwehki ar kilang sapwellimen Koht ladu kan ar kin kasalehda aktikitik.​—1 Pit. 3:1.

ATAIL WIEWIA ONG METEIKAN

8. (a) Ia ahn ekei madamadau ong irail kan me kin sapeikiong arail pahpa nohno? (b) Dahme Paipel mahsanihong seri kan en wia?

8 Pohl kawehwehda ia pahn ahn aramas akan ar wiewia ong emenemen ni imwin rahn akan. E nda me ni imwin rahn akan, seri kan sohte pahn kin peikiong arail pahpa nohno kan. Rahnwet, pwuhk tohto, kasdo kan, oh prokram kan nan TV kin mwomwen wiahda me e sohte suwed oh e konehng seri kan en sapeikiong arail pahpa nohno kan. Ahpw ni mehlel, sapeik kin kaluwetehla peneinei kan, me wia poahsoanpen koasoandi kesempwal en aramas akan. Aramas kin ese duwen ire mehlel wet sangete mahs. Karasepe, mahso nan Krihs, ma ohl emen peiong eh pahpa nohno, e pahn katihasang eh pwuhng koaros nin duwen towe mehlel en wasao. Nin duwen kosonned en mehn Rom, mehmen me peiong eh pahpao kin duwehte sounkamaramas. Palien Paipel ni Lokaiahn Ipru oh pil Palien Paipel ni Lokaiahn Krihk padahkihong seri kan en wauneki arail pahpa nohno kan.​—Eks. 20:12; Ep. 6:1-3.

9. Dahme pahn sewese seri kan en peikiong arail pahpa nohno?

9 Dahme kak sewese seri kan en peikiong arail pahpa nohno kan mendahki re mi nanpwungen irail kan me kin sapeik? Ni seri kan ar kin medemedewe duwen soahng mwahu kan me arail pahpa nohno kan wiahiong irail, re anahne kasalehda kalahngan oh men peikiong irail. Me pwulopwul kan pil anahne wehwehki me Koht, Semen aramas koaros, kin ketin kasik me ren peikiong arail pahpa nohno kan. Ni me pwulopwul kan ar kin nda soahng mwahu kan duwen arail pahpa nohno kan, met pahn sewese kompoakparail kan en kalaudehla arail wauneki arail pahpa nohno kan. Ma pahpa nohno kan sohte kin poakohng neirail seri kan, e pahn uhdahn apwal ong seri kan en peikiong irail. Ahpw, ni me pwulopwul men eh kin kehn me eh pahpa nohno uhdahn poakohng ih, met kak sewese ih en peikiong ira mendahki ma apwal. Emen brother pwulopwul me adaneki Austin nda: “Mendahki I kin kalapw men wia me sapwung, ei pahpa nohno kin koasoanehdi soangen mehn kaweid mwahu kan, kawehwehda kahrepen kosonned kan, oh wiahda pwe ahnsou koaros I en kak koasoiong ira. Met kin sewese ie en kin peik. I kak kilang me ira nsenohkin ie, oh met kin kahrehiong ie en men kaperenda ira.

10, 11. (a) Irair suwed dah kan me kin kasalehda aramas akan ar sohte kin poakohng emenemen? (b) Ia uwen laud en Kristian mehlel kan ar kin poakohng aramas teikan?

10 Pohl pil kawehwehda ekei irair me kasalehda me aramas akan sohte kin kasalehda limpoak ong emenemen. Mwurin eh koasoia duwen “sohte pahn kin peikiong pahpa nohno kan,” e koasoia duwen sohte pahn kin kasapahlkalahngan. Kitail kak wehwehki met pwehki aramas me sohte kin kasalehda kalahngan sohte kin kesempwalki soahng mwahu kan me meteikan wiahiong irail. Pohl pil nda me aramas akan pahn soaloalopwoat. Re sohte men pwungki meteikan, me wehwehki re sohte pahn men wiahda popohl rehn meteikan. Mie irail kan me pahn lahlahwe oh pangala meteikan, ndinda soahng lemei kan me kak kauwehkihla aramas oh pil Koht. Oh irail pahn kin karaunlikamw. Soangen aramas pwukat kin kinehda likamw pwehn kahdsuwedihala meteikan. *

11 Sapwellimen Koht ladu kan uhdahn weksang  pali laud en aramas akan nin sampah pwehki irail kin kasalehda limpoak mehlel ong meteikan. Met kin ahnsou koaros mehlel. Sises mahsanih me kehkehlik ehute nan Kosonned en Moseso me kesempwal sang kehkehlik en poakohng meteikan (a·gaʹpe) iei kehkehlik en poakohng Koht. (Mad. 22:37-39) Sises pil ketin mahsanih me aramas akan pahn esehki Kristian mehlel kan pwehki arail kin kasalehda limpoak mehlel ong emenemen. (Wadek Sohn 13:34, 35.) Kristian mehlel kan pil kin poakohng arail imwintihti kan.​—Mad. 5:43, 44.

12. Ia duwen Sises eh kin ketin kasalehda limpoak ong meteikan?

12 Sises ketin kasalehda me e kin uhdahn ketin poakohng aramas. E ketin wia met ni eh kin ketiketseli nan kahnimw kan pwehn ketin padahkihong aramas akan rongamwahu duwen Wehin Koht. E kin ketin kamwahwihala me maskun kan, me nehtuk kan, me tokutok kan, oh me salengepon kan. E pil ketin kaiasada me melahr akan. (Luk 7:22) E pil ketikihda sapwellime mour pwehn doarehla aramas akan, mendahki me tohto kailongki ih. Ni unsek, Sises kin ketin kahlemengih limpoak en Semeo. Nin sampah pwon, Sounkadehdehn Siohwa kan kin kahlemengih Sises oh kasalehda limpoak ong meteikan.

13. Ia duwen limpoak me kitail kasalehiong meteikan eh kin sewese irail en men esehla Siohwa?

13 Ni atail kin kasalehiong aramas akan me kitail poakohng irail, met kak kahrehiong irail en men esehla Samatailo nanleng. Karasepe, emen ohl nan Thailand kohla ni mihting tohrohr ehu oh uhdahn pwuriamweikihla eh kilang duwen riatail Kristian kan ar kin kasalehda limpoak ong emenemen. Mwurin eh lella ni imweo, e peki Sounkadehdehn Siohwa kan en onop Paipel reh pak riau nan wihk ehu. Ih eri kalohk ong kiseh kan. Sounpwongte weneu mwuri, ohl menet wia tepin eh wadawad en Paipel ni Wasahn Kaudok. Ia duwe, kitail kin kasalehda limpoak ong meteikan? Pein idek rehmw: ‘I kin wia uwen ei kak koaros en sewese tohn ei peneinei, tohn mwomwohdiso, oh aramas akan nan kalohk? Ia duwe, ei madamadau duwen meteikan duwehte sapwellimen Siohwa madamadau ong meteikan?’

KIDIEN WEL KAN OH SIHPW KAN

14, 15. Soangen irair suwed dah kan me aramas tohto kin kasalehda? Ia duwen ekei ar wekidala arail mour?

14 Ni imwin rahn akan, aramas pil pahn kasalehda  irair suwed teikan me kitail anahne soikala. Karasepe, aramas tohto sohte pahn kin poakohng me mwahu. Re kailongki dahme mwahu oh pil kin uhwong. Soangen aramas pwukat sohte kak kaunda pein irail oh re kin lemei. Ekei kin keptakai. Irail sohte kin medewe mwahu mwohn arail pahn wia mehkot oh sohte katapanki dahme arail wiewia pahn wiahiong meteikan.

15 Me tohto mahso me kin wia aramas lemei kei me rasehng mahn lawalo solahr kin wia met oh wekidalahr arail wiewia kan. Paipel kin kohpada soangen wekidekla laud wet. (Wadek Aiseia 11:6, 7.) Kitail wadek nan ireo duwen mahn lawalo kan me duwehte kidien wel kan oh laion kan, ar kin kousoanpene ni popohl rehn mahn teikan duwehte sihpw oh koupwul kan. Dahme kahrehda re ahneki popohl? Paipel mahsanih: “Pwe sampah pahn direkihla kupwurokong en KAUN-O.” (Ais. 11:9) Mahn akan sohte kak sukuhlki duwen Siohwa, eri ni karasaras, kokohp wet kin dokedoke wekidekla kan me aramas akan kin wiahda nan arail mour.

Kaweid kan en Paipel kak wekidala mouren aramas! (Menlau kilang parakrap 16)

16. Ia duwen Paipel eh kin sewese aramas akan en wekidala arail mour?

16 Riatail Kristian tohto mahso kin lemei rasehng kidi en wel ahpw ahnsouwet re meleilei. Ke kak wadek koasoipen arail mour nan oaralap “Paipel Kin Wekidala Mouren Aramas” me mi nan jw.org. Irail kan me sukuhlki oh papah Siohwa sohte duwehte irail kan me kin mwomwehda aramas me kin poadidiong Koht, ahpw arail mour sohte kin pahrekiong arail kaudok. Soangen aramas pwukat kin mwomwehda me re kin papah Koht, ahpw arail wiewia kan sohte kin kasalehda met. Ahpw nanpwungen sapwellimen Siohwa aramas akan, mie me tohto me mahso wia aramas lemei kei, ahpw met re ‘onehda sapahl pein irail ong ni aramas kapw me wiawihda rasehng Koht.’ (Ep. 4:23, 24) Ni aramas akan ar kin sukuhlki duwen Koht, re wehwehkihda me re anahne idawehn sapwellime koasoandi kan. Met kin sewese irail en wiahda wekidekla kan me pid dahme re kamehlele, dahme re kin medemedewe, oh dahme re kin wia. E sohte mengei en wiahda wekidekla pwukat, ahpw sapwellimen Koht manaman pahn sewese irail kan me kin uhdahn men kaperenda ih.

“KALEKEIUKASANG ARAMAS PWUKAT”

17. Ia duwen atail kak soikala alasang wiewiahn aramas me kin ahneki irair suwed kan?

17 E mengeilahr en kilang wekpeseng en aramas akan me kin papah Koht oh irail kan me sohte kin. Kitail anahne kanahieng pwe irair suwed en irail kan me sohte kin papah Koht en dehr kamwakid kitail. Kitail men idawehn sapwellimen Siohwa kaweid en kalekeikitailsang soangen aramas me kileldi nan 2 Timoty 3:2-5. Ni mehlel, kitail sohte kak uhdahn soikala koaros me kin ahneki irair suwed kan. Ele kitail anahne iang irail doadoahk, sukuhl, oh kousoan rehrail. Ahpw kitail sohte anahne ahneki madamadau de wiewia me duwehte arail. Dahme kak sewese kitail? Kitail kak kakehlakahda atail nanpwungmwahu rehn Siohwa sang ni atail kin onopki Paipel oh pilada en kompoakepahnki irail kan me kin poakohng ih.

18. Ia duwen soahng kan me kitail nda oh wia eh kak sewese meteikan en men esehla Siohwa?

18 Kitail pil men sewese meteikan en esehla Siohwa. Rapahki ahnsou mwahu kan en kalohk, oh peki rehn Siohwa en ketin seweseiuk en nda dahme konehng ni ahnsou me konehng. Kitail anahne kasalehiong meteikan me kitail Sounkadehdehn Siohwa kei. Eri, atail wiewia mwahu pahn wahdo kaping ong Koht ahpw kaidehn kitail. Siohwa ketin padahkihong kitail ‘en kesehla mouren seupwoson Koht oh ineng suwed en sampah, oh ese kaunda nsenatail, oh momourki mour pwung oh sarawi nin sampah wet.’ (Taitus 2:11-14) Ma kitail kahlemengih Siohwa oh wia dahme e ketin kupwurki kitail en wia, meteikan pahn kilang met. Ele ekei pahn nda: ‘Se pahn ianguhkala nan omw palien lamalam en, pwe se rong me Koht kin ketin ieiang kumwail.’​—Sek. 8:23.

^ par. 2 2 Timoty 3:1-5, 13 (NW): “Ahpw ke en ese me ni imwin rahn akan, e pahn mie ahnsou apwal oh keper. Pwe aramas akan pahn kin roporop ong pein irail, poakohng mwohni, aksuwei, pohnmwahso, lahlahwe, sohte pahn kin peikiong pahpa nohno kan, sohte pahn kin kasapahlkalahngan, soaloalopwoat, sempoak, sohte men pwungki meteikan, karaunlikamw, sohte kak kaunda pein irail, lemei, sohte pahn kin poakohng me mwahu, re pahn kin pangala meteikan, keptakai, aklapalap, re pahn kin nsenkihte wia nsenarail oh sohte kin poakohng Koht, re pahn kin mwomwehda aramas me kin poadidiong Koht, ahpw arail mour sohte kin pahrekiong arail kaudok; kalekeiukasang soangen aramas pwukat. Ahpw aramas me suwed oh mwersuwed kan pahn doulahte sang ni me suwed ong ni me suwedsang, pitipitih meteikan oh pein irail pahn pitida.”

^ par. 10 Lepin lokaiahn Krihk ong “karaunlikamw” iei di·aʹbo·los. Nan Paipel, lepin lokaia wet kin kadoadoahk nin duwen lengileng ehu ong Sehdan, sounkaraun likamw suwedo duwen Koht.