1-3. (a) Ia duwen Kristian kan ar kasalehda me re kin ngoangki tuhpene ong mihting kan? (Menlau kilang tepin kilel.) (b) Dahme kitail pahn koasoiapene nan iren onop wet?

 NI CORINNA eh sounpar 17, eh nohno selidi oh wisikla nan imweteng ehu me inenen doh. Mwuhr, Corinna pil kalipilipala Siberia me dohki mwail kid kid kei sang imweo. E kin doadoahk nan wasahn apwalih mahn oh aramas ako kin wiahkin ih duwehte lidu men. Ekei pak re kin idingkihong en doadoahk likin ihmw me uhdahn kopou oh eh likou ko sohte itar en karakaramwahwih ih. Mendahki met, Corinna oh emen sister koasoanehdi ira en wia uwen ara kak pwe ira en kohsang wasao oh kohla iang mihting en mwomwohdiso ehu.

² Corinna nda: “Se kin kohkohsang wasahn at doadoahko ni soutik oh sapalki mwail 15 pwehn lella wasahn kisa ehu. Kisao kin mweselsang wasao kuloak 2 ni sohrahn, oh mwurin at dake kisao erein awa 6, se kin doudi oh sapalki mwail 6 pwehn lellahng wasahn mihtingo.” Corinna uhdahn perenki eh wia seiloak wet. E nda: “Ni mihtingo, se kin onopki Kahn Iroir oh koulki koul en kaping kan ong Siohwa. Met kin  wia mehn kangoang ong kiht oh uhdahn kakehlakahda at pwoson.” Sister riemen pwukat eri pwurala wasahn ara doadoahko rahn siluh mwuri, ahpw kaun en wasao sohte mwahn ese me ira kohla ekis wasa.

³ Sapwellimen Siohwa aramas akan kin ahnsou koaros kasikasik en miniminiong riarail kan. Karasepe, tepin Kristian ko kin perenki tuhpene pwehn kaudokiong Siohwa oh sukuhlki duwen ih. (Wiewia 2:42) Ei mehlel, ele ke pil kin kasikasik en kohla iang mihting kan. Ahpw duwehte riomw Kristian koaros, ele ke diarada me e kin apwal en kaukaule towehda mihting kan. Mwein ke anahne doadoahk awa tohto de mie soahng tohto me ke pahn wia de ke kin ahnsou koaros pwang. Eri dahme pahn sewese kitail en wia uwen atail kak en towehda atail mihting kan? ^[1] (Menlau kilang ire kan mwuri.) Ia duwen atail kak kangoange neitail tohnsukuhl en Paipel kan oh pil meteikan ren kaukaule iang towehda atail mihting kan? Iren onop wet pahn kawehwehda dahme kahrehda towehda mihting kan (1) kin mwahu ong kitail, (2) kin sewese meteikan, oh (3) kin kaperenda Siohwa. ^[2]—Menlau kilang ire kan mwuri.

4. Ia duwen atail tuhpenehn mihting eh kin sewese kitail en sukuhlki duwen Siohwa?

⁴ Mihting kan kin kasukuhlih kitail. Mihting koaros kin sewese kitail en kalaudehla atail sukuhlki duwen Siohwa. Ia omw pepehm ni atail kin koasoiapene sapwellimen Siohwa irair kaselel kan oh ni omw kin rong riomw kan kasalehda arail pepehm duwen ih? Ele met kin kalaudehla omw poakohng Siohwa. Ni mihting kan, kitail pil kin kalaudehla atail sukuhlki Paipel sang ni atail rong padahk kan, kamwomwada kan, oh pil rong wadawad en Paipel. (Neh. 8:3, 8) Pil medewehla soahng tohto me kitail esehda nan wihk koaros ni atail kin kaunopada ong wadawad en Paipel oh eri rong dahme meteikan sukuhlki sang arail wadawad.

5. Ia duwen mihting kan ar sewese iuk ken doadoahngki dahme ke sukuhlkihsang Paipel oh pil kamwahwihala mwomwen omw kalohk?

⁵ Mihting kan, duwehte Onop en Kahn Iroir, padahkihong kitail en doadoahngki dahme kitail sukuhlki sang Paipel nan atail mour. (1 Des. 4:9, 10) Mie pak ke iang Onop en Kahn Iroir ehu me kamwakid uhk ken men kalaudehla omw papah Siohwa, kamwahwihala omw kapakap kan de mahkohng riomw Kristian men? Mihting me kitail kin wia nan wihk kak kasukuhliong kitail ia duwen atail en kalohki rongamwahwo oh pil duwen atail en sewese meteikan wehwehki padahk mehlel en Paipel.​—Mad. 28:19, 20.

6. Ia duwen atail mihting kan ar kin kangoange kitail oh sewese kitail en kehkehlailte?

⁶ Mihting kan kin kangoange kitail. Ahn Sehdan sampah kin song en kaluwetehla atail pwoson oh kak kahrehiong kitail pwunod oh pil mworusala. Ahpw atail mihting kan kin kangoange kitail oh kihong kitail kehl en pousehlahte papah Siohwa. (Wadek Wiewia 15:30-32.) Kitail kin kalapw koasoia ia duwen kokohp kan en Paipel ar pweidahr. Met kak sewese kalaudehla atail kamehlele me sapwellimen Siohwa inou kan ong ahnsou kohkohdo pahn pweida. Riatail Kristian kan kin kangoange kitail kaidehn ihte ahnsou me re kin wia padahk ahpw pil ahnsou me re kin kihda pasapeng oh kapingahki Siohwa arail koul sang mohngiongirail. (1 Kor. 14:26) Oh ni atail kin koasoiong irail mwohn oh mwurin mihting kan, met kin kakehlailiada kitail pwehki mie kompoakepatail tohto me kin uhdahn nsenohkin kitail.—1 Kor. 16:17, 18.

7. Dahme kahrehda e uhdahn kesempwal kitail en towehda mihting kan?

⁷ Ni mihting kan, kitail kin ale sawas sang sapwellimen Koht manaman. Sises kin ketin doadoahngki sapwellimen Koht manaman pwehn kaweid mwomwohdiso kan. Ni mehlel, e mahsanihong kitail me kitail anahne “rong kanahieng dahme [“sapwellimen Koht manaman,” NW] mahmahsanihong mwomwohdiso kan!” (Kaud. 2:7)  Sapwellimen Koht manaman kak sewese kitail en pelianda kasongosong kan oh kalohk ni eimah. E pil kak sewese kitail en wiahda pilipil mwahu kan. Ihme kahrehda kitail anahne wia uwen atail kak pwe kitail en kak towehda atail mihting kan oh ale sawas sang sapwellimen Koht manaman.

8. Ni riatail Kristian kan ar kilang atail towehda mihting oh rong atail pasapeng oh koul, ia duwen met eh kin sewese irail? (Pil kilang koakon me oaralape “E Kin Ahnsou Koaros Nsenamwahula Mwurin Mihting.”)

⁸ Ni mihting kan, kitail ahneki ahnsou mwahu en kasalehiong riatail Kristian kan me kitail poakohng irail. Me tohto nan atail mwomwohdiso kin dadaur pahn kahpwal laud kan. Wahnpoaron Pohl ntingihedi: “Kitail nsenoh sawaspene.” (Ipru 10:24, 25) Kitail kak kasalehda atail nsenohki riatail kan sang ni atail kin tuhpene pwehn kangoange emenemen. Ni atail kohla ni mihting kan, kitail kin kasalehiong riatail kan me kitail men werekiong irail oh koasoiong irail oh men ese ia irarail. Kitail pil kin kangoange irail ni arail rong atail pasapeng kan oh atail koul sang mohngiongitail.​—Kol. 3:16.

9, 10. (a) Menlau kawehwehda ia duwen mahsen en Sises nan Sohn 10:16 eh sewese kitail en wehwehki dahme kahrehda e kesempwal kitail en iang riatail Kristian kan pokonpene. (b) Ma kitail kin kaukaule towehda mihting kan, ia duwen atail kak sewese emen me eh peneinei soikala ih?

⁹ Ni atail kohla ni mihting kan, kitail kin sewese tohn mwomwohdiso en kerenpene. (Wadek Sohn 10:16.) Sises ketin kapahrekihong ih sounsilepen sihpw men oh sapwellime tohnpadahk kan pelin sihpw ehu. Medewehla met: Ma sihpw riemen mi pohn kisin ukada kis, riemen mi nan wahu ehu, oh emen mi ekis wasa tohrohr, ia duwe, sihpw limen pwukat wia pelin sihpw ehu? Soh, pwehki pelin sihpw ehu kin mihpene oh kin idawehn sounsilepen sihpwo. Ni ahlohte, kitail en dehr kadohwanewei kitail sang riatail Kristian kan ni atail sohte iang kohla mihting. Kitail anahne pokonpene pwehn wiahla kisehn ‘pwihn sihpw teieu oh silepatail pahn mehtehmen.’

¹⁰ Atail mihting kan kin sewese kitail en miniminpene nin duwen peneinei limpoak ehu. (Mel. 133:1) Mie ekei nan atail mwomwohdiso me arail peneinei, duwehte arail pahpa nohno de riarail pwutak de serepein, keseirailla. Ahpw Sises ketin inoukihda en ketikihong irail peneinei ehu me pahn poakohng oh apwalih irail. (Mark 10:29, 30) Ma ke kin kaukaule iang mihting kan, ke kak wiahla ahn emen nan mwomwohdiso eh pahpa, nohno, rie pwutak de serepein. Ni atail medewehla met, kitail pahn men wia uwen atail kak en iang mihting koaros.

11. Ia duwen atail towehda mihting kan eh sewese kitail en patohwanohng Siohwa dahme e ketin warohng sapwellimanki?

¹¹ Ni mihting kan, kitail kin patohwanohng Siohwa dahme e ketin warohng sapwellimanki. Pwehki ih me Sounkapikpatail, kitail en kasalehda atail kalahngan, wahu oh kaping ong ih. (Wadek Kaudiahl 7:12.) Kitail kak wia met ni atail mihting kan sang ni atail kapakap ong Siohwa, koul ong ih oh koasoia duwen ih. Ia uwen eh wia pai kaselel ehu ong kitail en kaudokiong Siohwa wihk koaros!

12. Ia sapwellimen Siohwa pepehm ni atail kin peikiong sapwellime kehkehlik en iang towehda mihting kan?

¹² Siohwa iei me ketin kapikkitailda oh kitail anahne peikiong ih. E ketin kehkehlingkihong kitail en kin pokonpene, ahpw mehlel ni atail kerenlahngehr imwio. Eri ni atail kin peikiong kehkehlik wet, Siohwa kin kupwurperenkihda. (1 Sohn 3:22) E ketin mwahngih me kitail kin uhdahn men iang mihting kan oh e ketin kesempwalki soangen nanti koaros kitail kin wia pwehn lella ni mihting kan.​—Ipru 6:10.

13, 14. Ia duwen atail kin karanihala Siohwa oh Sises ni atail mihting kan?

¹³ Ni atail kin kohla ni mihting kan, kitail kasalehiong Siohwa me kitail men karanihala ih oh sapwellime Ohlo. Ni mihting kan, kitail kin onopki Paipel oh sukuhlki sang Siohwa duwen dahme kitail en wia oh mwomwen atail en kin mour. (Ais. 30:20, 21) Pil ni ahnsou me ekei me sohte kin papah Siohwa kohdo iang mihting, re kin pohnese me Koht kin ketin kaukaweid kitail. (1 Kor. 14:23-25) Siohwa kin ketin doadoahngki sapwellime manaman pwehn kaweid atail mihting kan, oh dahme kitail sukuhlki kin pwilisang reh. Eri ni atail kohla ni mihting kan, kitail kin rong dahme Siohwa mahsanih, pehm ia uwen eh ketin poakohng kitail, oh pil karanihala ih.

¹⁴ Sises, me wia Tapwin mwomwohdiso, mahsanih: “Pwe wasa kis me riemen de silimen kin kohpene ie ni mwarei, I kin iang irail mi wasao.” (Mad. 18:20) Paipel pil mahsanih me Sises kin “ketseli nanpwungen” mwomwohdiso kan. (Kaud. 1:20–2:1) Eri e sansal me Siohwa oh Sises kin ketin ieiang kitail oh ketin kakehlaka kitail nan atail mihting kan. Ia sapwellimen Siohwa pepehm ni eh kin ketin mahsanihada omw wia uwen omw kak koaros pwehn karanihala ih oh sapwellime Ohlo?

15. Ia duwen atail kin iang towehda mihting kan eh kin kasalehiong Koht me kitail men peikiong ih?

¹⁵ Ni atail kin kohla ni mihting kan, kitail kasalehiong Siohwa me kitail men peikiong ih. Siohwa sohte kin ketin idingkihong kitail en wia dahme e mahsanih. (Ais. 43:23) Eri ni atail kin pilada en peikiong sapwellime kehkehlik kan, kitail kin kasalehiong ih me kitail poakohng ih oh me kitail kamehlele me e ketin sapwellimaniki pwuhng en padahkihong kitail dahme kitail en wia. (Rom 6:17) Karasepe, dahme kitail pahn wia ma atail kaunen doadoahko kasik kitail en doadoahk laud oh kahrehiong kitail en sohte kak kaukaule towehda mihting kan? Ele koperment en nan omw wasa nda me ma emen tuhpene pwehn kaudokiong Siohwa, e pahn anahne pwain uwen mwohni ehu, kohla imweteng, de alehdi kalokolok ehu me suwedsang met. De ekei pak kitail pilada en wia mehkot tohrohr ahpw kaidehn en kohla ni mihting kan. Nan ehuehu irair pwukat, Siohwa ketin mweidohng kitail en pilada dahme kitail pahn wia. (Wiewia 5:29) Ahpw ehuehu ahnsou me kitail pilada en peikiong ih, kitail kin kaperenda ih.​—Lep. Pad. 27:11.

16, 17. (a) Ia duwen atail ese me mihting kan uhdahn kesempwal ong tepin Kristian ko? (b) Ia ahn Brother George Gangas pepehm ong mihting en Kristian kan?

¹⁶ Mwurin arail pokonpene ni Pendekos en pahr 33, Kristian ko kin kaukaule tuhpene pwehn kaudokiong Siohwa. Re kin pousehlahte “poadidiong ale padahk sang rehn wahnpoaron ko, oh miniminiong me pwosonlahr akan.” (Wiewia 2:42) Oh re sohte kin uhdihsang arail pokonpene mehnda ma  re ale kalokolok sang koperment en Rom oh kaunen pelien lamalam en mehn Suhs kan. Mendahki e sohte mengei, re kin wia uwen arail kak en pousehlahte pokonpene.

¹⁷ Pil rahnpwukat, sapwellimen Siohwa ladu kan uhdahn kin kalahnganki mihting kan oh perenki iang towehda. George Gangas, me wia emen kisehn Pwihn me Kin Apwalih Mwomwohdiso nan Sampah Pwon daulih sounpar 22, nda: “Ong ie, ei kin tuhwong riei Kristian kan wia mehkot me uhdahn kaperen oh kangoang. I perenki wia emen nanpwungen irail kan me kin tepin lella ni Wasahn Kaudoko, oh ma kak, me keieu pwand en kohkohla. Loaleiet kin peren ni ei koasoakoasoiong sapwellimen Koht aramas akan. Ni ahnsou me I kin mi nanpwungarail I pehm me I mi rehn ahi peneinei, nan wasa ehu me rasehng paradais.” E pil nda: “Ei madamadau oh ineng me keieu laud iei en iang towehda mihting kan.”

18. Ia omw pepehm ong atail mihting kan, oh dahme ke koasoanehdi teng en wia?

¹⁸ Ia duwe, ke pil kin ahneki soangen pepehm wet ong kaudokiong Siohwa? Ma ei, wia uwen omw kak en patehng riomw Kristian kan ni mihting kan, mendahki e apwal. Kasalehiong Siohwa me ke uhdahn ahneki pepehm duwehte ahn Nanmwarki Depit, ni eh patohwan: “Maing KAUN, I patohwan poakohng wasa me komw kin ketin ketiket ie, wasa me sapwellimomwi lingan kin ket ie.”​—Mel. 26:8