Wiewia 15:1-41

  • Akamaiki sirkumsais nan Andiok (1, 2)

  • Peidek me wisikla Serusalem (3-5)

  • Sounapwalih oh wahnpoaron kan tuhpene (6-21)

  • Kisinlikou sang pwihn me kin apwalih mwomwohdiso pwon (22-29)

    • Liksang nta (28, 29)

  • Mwomwohdiso kan ale kangoang sang kisinlikou (30-35)

  • Pohl oh Parnapas tohrohrpeseng (36-41)

15  Eri ohl ekei ahpw kohdihdo sang Sudia oh tepida padahkih riatail kan, nda: “Ma kumwail sohte sirkumsaisla nin duwen kosonned en Moses, kumwail sohte kak komourla.”  Liaktohrohr ahpw pwarada, Pohl oh Parnapas eri akamai kehlail ong irail. Riatail ko eri koasoanehdi me Pohl oh Parnapas oh meteikan en kohdahla oh tuhkihong wahnpoaron ko oh sounapwalih kan* nan Serusalem ire* wet.  Eri mwurin tohnmwomwohdiso arail iangada ohl pwukat ekis aluhla, irail eri kohkohla Penisia oh Sameria oh koasoiahda ni oaritik duwen mehn liki kan ar wekiongehr Koht oh kahrehiong riatail ko koaros ren perenda laud.  Ni arail lella Serusalem, tohnmwomwohdiso oh wahnpoaron ko oh sounapwalih ko ahpw kasamwo irail ni kadek, irail eri koasoiahda soahng tohto me Koht ketin wiadahr ni eh ketin doadoahngki irail.  Ahpw ekei kisehn pwihnen Parisi ko me pwosonlahr ahpw uhda sang nan dewerail oh nda: “Irail anahne sirkumsaisla oh kitail anahne kehkehlingkihong irail en kapwaiada Kosonned en Moses.”  Wahnpoaron ko oh sounapwalih ko eri pokonpene pwe irail en koasoiapene ire wet.  Mwurin arail kapwkapwungpene* ahnsou reirei, Piter ahpw uhda oh ndaiong irail: “Ohl ako, riei ko, kumwail eseier me Koht ketin piliehda mahs sang nanpwungamwail pwe mehn liki kan en rong mahsen en rongamwahwo oh kamehlelehla.  Oh Koht, me kin ketin mwahngih mohngiong, ketin kadehdehda me e ketin kupwurkin irail sang ni eh ketikihong irail sapwellime manaman,* duwehte eh pil ketikihong kitail.  Oh e sohte ketin wiahki me mie wekpeseng nanpwungen kitail oh irail, ahpw e ketin kamwakelehda arail mohngiong pwehki arail pwoson. 10  Eri, dahme kahrehda kumwail kasongosongehki Koht ahnsou wet, ni amwail pwilikihdiong pohn tepinweren tohnpadahk kan, mehn wisik ehu me samatail mehn mahs ako oh pein kitail sohte kak wahda? 11  Eri soh, kitail kin pwoson me kitail pahn komourkihla kadek sapan en Kaun Sises duwehte irail.” 12  Pokono pwon ahpw nennenla oh tepida rong Parnapas oh Pohl ara koasoia kilel tohto oh soahng kapwuriamwei tohto me Koht ketin wiadahr nanpwungen mehn liki kan sang ni eh ketin doadoahngki ira. 13  Mwurin ara kanekehla ara koasoi, Seims ahpw sapengki: “Ohl ako, riei ko, kumwail rong ie. 14  Semion* kawehwehda mwahu duwen Koht eh tepin sohpeiong mehn liki kan pwe en ketikihsang nanpwungarail aramas ekei ong mware. 15  Oh mahsen en Soukohp ako pil pwungki met, duwen eh ntingdi: 16  ‘Mwurin mepwukat, I pahn pwurodo oh pwurehng kauwada imwen* Depit me pwupwudier; I pahn onehda sapahl wasa rengkpeseng kan oh kamwahwihala, 17  pwe aramas akan me luwehdi en kak nantihong rapahki Siohwa,* iangahki tohnwehi koaros, aramas akan me kin adaneki mwarei. Siohwa* me mahmahsen, me kin ketin wiewia mepwukat, 18  me sansaldahr sangete mahs.’ 19  Eri, ei lamalam iei kitail en dehr kedirepwe irail kan me kohsang mehn liki kan me sohpeiongehr Koht, 20  ahpw en ntingkiwohng irail en liksang soahng kan me saminkihla dikedik kan, tiahk samin me pid wia nsenen pwopwoud,* soahng kan me mwopwula* oh nta. 21  Pwe sangete mahs, nan kahnimw koaros, mie irail kan me kin kalohki pwuhken Moses, pwehki re kin wadek ni ngihl laud pwuhk pwukat nan sinakoke kan rahnen sapad koaros.” 22  Wahnpoaron ko oh sounapwalih ko, oh pil mwomwohdiso pwon eri koasoanehdi ren kadarala ohl ekei me re piladahr sang nanpwungarail ong Andiok pwe ren iang Pohl oh Parnapas; re kadarala Sudas me pil adaneki Parsapas oh Sailas, me ahneki pwukoa laud nanpwungen riatail kan. 23  Irail ahpw ntingihedi met oh kihong irail en wahla: “Sang kiht riamwail kan, wahnpoaron kan oh sounapwalih kan, ong riat akan nan Andiok, Siria, oh Silisia, sang wehin liki kan: Riat ako! 24  Pwehki at rongadahr me ekei sang nanpwungat kowehr oh kapingkinkumwailda arail lokaia kan oh songosong ren kauweikumwailla, mendahki at sohte kaweidkin irail mepwukat, 25  kiht koaros eri pwungkidahr sen pilada ohl ekei pwe sen kadarowohng kumwail iangahki kompoakepaht, Parnapas oh Pohl, 26  ohl ekei me tounmeteikilahr ara mour* ong mwaren atail Kaun Sises Krais. 27  Eri, se kadarewei Sudas oh Sailas pwe ira en pil koasoiaiong kumwail soahng kan me ntingdier nan kisinlikou kiset. 28  Pwe sapwellimen Koht manaman* sewesehkin kiht en pwungkipenehr me se sohte pahn katautauwihkin kumwail mehkot likin soahng kesempwal pwukat: 29  kumwail en kin liksang soahng kan me meirongalahr ong dikedik kan, nta, soahng kan me mwopwula* oh tiahk samin me pid wia nsenen pwopwoud.* Ma kumwail kanahieng pwe kumwail en liksang mepwukat, kumwail pahn pweida. Rahn kaselel ong kumwail!” 30  Ohl pwukat eri mweselda kohdihla Andiok oh kapokonepene pwihno pwon oh kihong irail kisinlikowo. 31  Mwurin arail wadekehr kisinlikowo, irail ahpw perenkihda kowahlap mehn kangoango. 32  Oh Sudas oh Sailas, pwehki ara pil soukohp kei, ahpw kangoangehki riatail ko padahk tohto oh kakehlakahda irail. 33  Mwurin ara mihmihki erein ahnsou kis, riatail ko eri kamwurirahla ni popohl, ira eri pwuralahng rehn me kadarirahla ko. 34  *—— 35  Ahpw Pohl oh Parnapas mihmihte nan Andiok, padapadahk oh lohlohkiseli rongamwahu duwen mahsen en Siohwa,* iangahki me tohto. 36  Mwurin rahn ekei, Pohl ahpw ndaiong Parnapas: “Nna* kita pwurala oh tuhwong riatail kan nan kahnimw koaros me kita lohkiseli mahsen en Siohwa,* pwe kita en kilang ia irarail.” 37  Parnapas ahpw ngihtehtehki me Sohn me pil adaneki Mark en iangirahda. 38  Ahpw Pohl sohte pwungki en iangirahda pwehki eh kohkohsang ira nan Pampilia oh sohla iang ira doadoahk. 39  Met me kahrehda ara lingeringerdahte akamaida, ira eri tohrohrpeseng; Parnapas ahpw kahrehda Mark oh sereklahng Saiprus. 40  Pohl eri pilada Sailas oh mwesel mwurin riatail ko ar kapakap ong Siohwa* pwe en ketin kasalehiong ih kadek sapan. 41  E ahpw kotehla Siria oh Silisia, kangkakehlaka mwomwohdiso kan.

Footnote kan

LK, “ohl mah kan.”
De “akamai.”
De “akamai kehlail.”
LK, pneuʹma. Kilang KLL.
Me iei, Piter.
De “mpwal; pelien ihmw.”
Kilang KLL.
Kilang KLL.
LK, por·neiʹa. Kilang KLL.
De “soahng kan me kamakamala de mehla ahpw nta sohte kerasang.”
LK, psy·kheʹ. Kilang KLL.
LK, pneuʹma. Kilang KLL.
De “soahng kan me kamakamala de mehla ahpw nta sohte kerasang.”
LK, por·neiʹa. Kilang KLL.
Kilang Madiu 17:21, ntp.
Kilang KLL.
De kakete, “uhdahn.”
Kilang KLL.
Kilang KLL.