“Trainim wanfala boy for wakabaot followim road wea hem shud followim. Nomata taem hem olo bae hem no lusim datwan.”—Proverbs 22:6, Niu World Transleison.

 “Trainim wanfala pikinini for wakabaot followim road wea hem shud followim; nomata taem hem olo bae hem no lusim datwan.”—Proverbs 22:6, English Standard Version.

Mining blo Proverbs 22:6

 Parents wea teachim olketa pikinini blo olketa for lovem God and respectim olketa law blo hem savve sure training olsem bae benefitim pikinini for full laef blo olketa.

 “Trainim wanfala boy for wakabaot followim road wea hem shud followim.” Nara wei for transleitim toktok hia, hem “helpem wanfala pikinini for wakabaot followim stret road.” Staka difren verse lo buk blo Proverbs encouragem parents for teachim olketa pikinini blo olketa abaotem wat nao stret and rong start taem olketa smol yet. (Proverbs 19:18; 22:15; 29:15) Bat, parents mas savve dat olketa pikinini garem tu raet for chusim samting, semsem olsem olketa adult. So instead for talem pikinini wat for duim, olketa reason witim olketa and helpem olketa for grow for kamap mature, and kamap responsible adult wea savve mekem disison seleva.—Deuteronomy 6:6, 7; Colossians 3:21.

 Samfala Bible scholar tingse mining blo disfala expression hem “trainim wanfala pikinini followim wei blo hem.” Maet diswan hem here mek sense, bat Hebrew expression wea olketa transleitim for “road wea hem shud followim” hem minim laef wea hem gud and stret. Buk blo Proverbs storyim tufala road wea wanfala person savve followim. Wanfala road olketa kolem lo “road blo olketa gud pipol,” “road blo wisdom,” and “stretfala road.” (Proverbs 2:20; 4:11; 23:19) Nara road olketa kolem lo “road blo olketa nogud man,” and “rong road.” (Proverbs 4:14; 16:29) Dastawe road wea pikinini “shud followim” hem minim “stretfala road,” wea hem laef wea Word blo God, Bible teachim.—Psalm 119:105.

 “Nomata taem hem olo bae hem no lusim datwan.” Taem parents teachim pikinini olketa standard saed lo fasin, datwan savve mekem pikinini for stap lo stret road thru aot lo laef blo hem. Bat diswan hem no minim dat pikinini wea kasem gud training olsem bae hem no “lusim” datfala stret road or no go difren from olketa law blo God. For example, if wanfala person spendem taem witim pipol wea encouragem man for duim nogud samting, hem maet “lusim stretfala road” and duim rong samting. (Proverbs 2:12-16; 1 Corinthians 15:33) Nomata diswan maet happen, taem parents trainim olketa pikinini blo olketa for followim olketa standard blo God, tufala savve helpem pikinini for garem big chance for successful lo laef.—Proverbs 2:1, 11.

Context blo Proverbs 22:6

 Proverbs chapter 22 garem olketa short saying wea savve helpem iumi for applyim wisdom blo God lo olketa difren situation lo laef. Olketa saying hia mekhae lo why hem important for garem gud reputation witim Jehovah, a wea wanfala person savve garem taem man hambol, kaen, and waka hard. (Proverbs 22:1, 4, 9, 29) And tu, olketa nara verse showim dat pipol wea no followim olketa standard blo God and treatim nogud lo olketa wea poor bae kasem nogud samting.—Proverbs 22:8, 16, 22-27.

 Nomata staka verse lo Proverbs chapter 22 no storyim for trainim pikinini, bat olketa storyim laef wea bae mekem God hapi and man kasem tru hapi. (Proverbs 22:17-19) Taem parents trainim pikinini blo olketa for garem laef olsem, olketa showim dat olketa laekem best samting for pikinini blo olketa.—Ephesians 6:1-3.

 Watchim disfala short video for lukim overview blo buk blo Proverbs.