A Klemerang el Kirel a Armageddon

“Remekngit el [anghel] . . . a morar king ra belulechad el rokir, el chudelterir . . . , er sel lulngakl el Armageddon el tekoi er a Hebru.”​—CHOCHOLT 16:14, 16.

A ARMAGEDDON, el bebil er a taem e ngokedongall el “Harmagedon,” a ngklel a basio. Tia el basio a diak debetik er ngii er a ngii di leker er tia el beluulechad.

Ngera mera el belkul a tekoi el “Armageddon”? Ngera uchul me kede blechoel el lousbech er ngii el mesaod a tekoi el ua mekemad?

Mlo Mechudel er a Basio el Okedongall el Armageddon

A belkul a tekoi er a Hebru el Har–​Magedon a “Rois er a Megido.” Ngar er ngii a mera el basio el Megido, engdi ngdiak a rois er ngii. Tiang a basio el ngar er a metucheklel a eru el rael el ngar er a mo bedul a diluches ngebard er a beluu el lekiliei er ngii a renged er a Israel er a irechar. Ngbetok el meklou el mekemad a mileketmokl er tia el basio. Misei a uchul me a ngakl el Megido a lousbech er ngii er chelechang el mesaod a mekemad. *

Me nguaisei, engdi a mera el belkul a Megido a diak el aike el mekemad el dilubech er a chelsel, e ngbai sel uchul me te mle kaumekemad. A Megido a mle telkib er sel Beluu er a Nglat el Jehovah el Dios a milsterir a rechad er Israel me ngbelurir. (Exodus 33:1; Josua 12:7, 21) Ngtilbir el mo er a rechad el kmo ngmo mesebechakl er tir er tirke el oldechelakl er tir, e mirruul el uaisei. (Duteronomi 6:18, 19) El ua tiang, ngar er a Megido, e a Jehovah a milsebechakl er a rechad er a Israel er a King el Jabin me a Sisera, el ngike  el mengeteklel a urrurt er a resoldau er ngii.​—Mengeteklel 4:14-​16.

Me nguaisei, a tekoi el “Har–​Magedon” me a lechub e ng “Armageddon,” a ngar ngii a klou a ultutelel el belkul. Ngmesaod el kirel a klautok, el ngii a uchul a eru el mesisiich el urrurt a mo kaisiuekl er a chelsel e mo kaumekemad.

A ulaoch el ngar er a Chocholt a mesaod el kirel a taem el kmal di kmedu el mei, el Satan me a remekngit el anghel er ngii a mo melisiich aika el kabelment er a klechad me te mo dmak e mo oldechelakl er a rechedal a Dios. E tia el odechelakl a mo uchul a kodellir a rebetok el miliol el chad er sel taem el Jehovah a mo okngemedeterir tirka el soldau.​—Chocholt 19:11-​18.

Ngera uchul me a Dios, el ngii a “mui er a klechubechub ma bltikerreng, e meoud el ngmasech a rengul,” a omekoad er a rebetok el chad? (Nehemia 9:17) A lsekum e ngsoad el mo medengelii a uchul me a Dios a meruul a tekoi, e ngkired el mo onger aika el edei el ker: (1) Ngtechang a ulemuchel el oumekemad? (2) Ngera me a Dios a chelsechusem er tia el tekoi? (3) Ngerang a mo rsel tia el klou el mekemad?

1. NGTECHANG A ULEMUCHEL EL OUMEKEMAD?

A mekemad er a Armageddon a diak el di lolechotel a ngesechel a rengul a Dios. Ngbai omerellel el mo mesebechakl er a rungil el chad er tirke el sorir el melemall er tir. Tirke el bai meruul a uldikel a re “king ra belulechad el rokir,” el tir a remengeteklel a belurir. E ngera uchul me te oldechelakl? A Satan a mo melisiich a kabelment er a klechad me a urrurt er a resoldau me te mo dmak e oldechelakl er tirke el mengull er a Jehovah el Dios.​—Chocholt 16:13, 14; 19:17, 18.

Chelecha el taem el ngar er a bebil el beluu e a rechad a ngar ngii a ilmeklir el mengedecheduch e dirrek el melilt a klechelid er tir a uchul, me a uldasu el kmo a kabelment a mo melasem el olekngemed a klechelid a ua lak a ultutelel. Engdi a chouaika el odechelakl a mla duubech er a chelsel sel rak er a 1900 el me er chelechang. * Me nguaisei, engdi ngngar er ngii a eru el meklou el kakerous el tekoi er aike el odechelakl er a uchei me sel odechelakl el mo er ngii er a temel a Armageddon. A kot, a odechelakl a mo er ngii er a beluulechad el rokir. Ongerung, a Jehovah el Dios a mo kutmeklii a lmuut el klou el  tekoi el dirkak a ta el lerellii er a irechar el mei. (Jeremia 25:32, 33) A Biblia a mesaod er tia el tekoi el kmo “klaumekemad er sel kloul sils ra Dios, el Cherrengelel a klisiich.”

2. NGERA ME A DIOS A CHELSECHUSEM ER TIA EL TEKOI?

A Jehovah a mengelechel er a remengull er ngii el mo meruul a budech el mo er a rokui e dirrek el mo oubltikerreng el mo er a recherrouir. (Mika 4:1-3; Matteus 5:43, 44; 26:52) Me ngdiak el kirir el melasem el leko ngdi tir el mesebechakl er tir er a mekemad el mo er ngii. Me a lsekum a Dios a diak bo lolsobel er a rechedal, e te rokui el di mo nguemed. E tiang a mo uchul a otuub el mo er a chisel me a dirrek el ngklel a Jehovah el Dios. Me a lsekum a recherraro a mo okngemedeterir a rechedal a Dios, e ngolecholt el kmo a Jehovah a diak el betik a rengul, e chebirukel a omerellel e mechitechut. E tiang a kmal diak el sebechel el mo uaisei!​—Psalm 37:28, 29.

A Dios a kmal diak el soal el omekoad er a rechad me ngomeklatk er tir er a uchei er a bo loruul a tekoi. (2 Petrus 3:9) Me ngoeak a cheldecheduch el kltmokl el ngar er a chelsel a Biblia, e ngomeklatk er a rechad el kmo, a ngar er a mong e ngmlo melaitechei er tirke el chad el mlo oldechelakl er a rechedal. (2 King 19:35) A Biblia a dirrek el mengelechel el kmo a ngar a medad el taem e a Satan me a rechad el oningio er ngii a mo oldechelakl er a rechedal a Dios, e ngii el Jehovah a lmuut el mo olecholt er a klisichel el mo er tirke el mo oldechelakl er a rechedal. E a Tekingel a Dios er a irechar a ulemlaoch el kmo a Jehovah a mo okngemedeterir a remekngit. (Osisechakl 2:21, 22; 2 Thesalonika 1:6-9) E seikid el taem e ngmo bleketakl er a rengrir tirke el mle oldechelakl el kmo, tir a mlo oumekemad el omtok er ngike el Dios el Cherrengelel a Klisiich.​—Esekiel 38:21-​23.

3. NGERA MO RSEL TIA EL KLOU EL MEKEMAD?

A rekil a mekemad er a Armageddon a mo uchul a osobelir a rebetok el miliol el chad. Tiang a mo uchelel a taem er a budech er tia el chutem.​—Chocholt 21:3, 4.

A babier er a Chocholt a mesaod er a diak el mochur el ildois er a “kloul seked” el tir a mo suobel er tia el klou el mekemad. (Chocholt 7:9, 14) Me ngngar er a cheungel a ulekrael er a Dios, e tirka el chad a mo kutmeklii tia el chutem el mo Paradis el ngii a dimla moktek er a Jehovah er a kot el uchul.

Kid kede medengei el kmo ngoingerang e te modechelakl a rechedal a Dios?

[Aike el Footnote]

[Siasing el ngar er a 6 el llel]

A Jehovah el Dios a milsebechakl er a rechedal er a irechar

[Siasing el ngar er a 7 el llel]

A Jehovah a lmuut el mo mesebechakl er a rechedal er sel taem er a mekemad er a Armageddon