1 DI NOVÈMBER 2021
RUSIA

Ruman Dmitriy Barmakin Ta Sigui Mantené Su Goso Apesar Ku E Tin Hopi Tempu den Detenshon

TOKA NA

Riba 8 di Aprel 2022, korte di teritorio di Primorye a anulá e sentensia ku a deklará ku Ruman Dmitriy Barmakin no ta kulpabel i e kaso lo bai dilanti korte atrobe.

Algun Suseso Ku A Tuma Lugá

Riba 22 di novèmber 2021, korte di distrito di Pervorechenskiy di Vladivostok den e teritorio di Primorye a dikta sentensia i a deklará ku Ruman Dmitriy Barmakin no ta kulpabel, i el a ser apsolvé di tur akusashon kontra dje. Esaki ta promé biaha ku un korte na Rusia a disidí ku un Testigu di Yehova ku a ser akusá di a violá Artíkulo 282.2(1) di e Kódigo Penal di Rusia (ku tin di haber ku organisá aktividat di un organisashon ekstremista) no ta kulpabel. Korte lo kita e restrikshonnan riba su aktividatnan. Si fiskal no apelá e kaso, e veredikto lo drenta na vigor riba 3 di desèmber 2021
20 di aprel 2021

E kaso penal a sigui
18 di desèmber 2020

E kaso penal a bai bèk serka e fiskal pasobra no tabatin sufisiente prueba ku ruman Barmakin a kometé un krímen. Korte no a kita e restrikshonnan riba su aktividatnan
18 di òktober 2019

Despues di 447 dia, Dmitriy a sali for di prizòn, pero korte a pone restrikshon pisá riba su aktividatnan. Dies bes korte a alargá e kantidat di tempu ku Dmitriy mester a keda den aresto preventivo
28 di yüli 2018

Banda di 7 or di mainta, un grupo di polis ku kara tapá i skopèt a drenta e apartamento unda Dmitriy i Yelena tabata keda pa kuida Yelena su wela di 90 aña. Nan a hiba tantu Dmitriy komo Yelena bèk na e stat kaminda nan tabata biba, na Vladivostok, ku ta keda 177 kilometer leu. Mesora nan a arestá Dmitriy, i nan a detené bou di aresto preventivo
27 di yüli 2018

Nan a kuminsá un kaso penal kontra Ruman Dmitriy Barmakin
Òktober 2017

Un señora di 30 aña ku ta traha pa e Agensia Federal di Siguridat di Rusia (FSB) a hasi komo si fuera e ta interesá den Beibel. El a filma kòmbersashon ku e tabatin ku diferente ruman sin ku nan tabata sa

Informashon Personal

Dmitriy Barmakin

Nasí na: 1974 (Alushta, Crimea)

Background: Su mama a muri ora e tabatin dies aña. El a studia pa kòki i despues pa traha software pa kòmpiuter. El a kasa ku Yelena na aña 2006. Nan gusta biaha i saka potrèt di bestia den naturalesa

El a kumpra su promé Beibel komo mucha ora ku e tabata bai skol. E konsehonan práktiko ku el a haña den Beibel a impreshon’é. Ku tempu, el a studia Beibel ku Testigunan di Yehova i a batisá na aña 1994

Loke Nos Ruman A Bisa

Kiko a yuda bo keda enfoká riba kosnan spiritual ora bo tabata den prizòn?

Mi tabatin kustumber di lesa Beibel tur dia promé ku nan a detené mi. Ora bo ta den prizòn, hopi biaha no tin nada pa hasi durante dia. Pues, bo tin mas tempu pa pensa. Bo mente ta kuminsá pensa riba kualke kos ku bo a yega di lesa òf studia. Bo no por djis stòp di pensa. I si bo no a yena bo mente ku kosnan spiritual promé ku bo a kai será, e ora ei lo ta hopi difísil pa bo keda leal.

Ki kualidat a yuda bo perseverá ora bo tabata será?

Hopi bes ora mi tabata pidi Yehova den orashon pa duna mi goso, e tabata kontestá mi orashonnan. I tur hende rònt di mi por a mira ku mi tabata kontentu. Un mainta, ora nan tabata kontrolá si tur prizonero t’ei, un di e wardadónan di prezu a puntra mi: “Barmakin, dikon semper bo tin un smail riba bo kara?” Mi a kontest’é: “Mi ta kontentu, p’esei mi ta smail.” E wardadó di prezu a puntra mi: “Bo ta kontentu ku bo ta den prizòn?” Mi a kontest’é: “Nò! Semper mi tabata un persona kontentu, i mi no ta pèrdè mi felisidat djis pasobra mi ta den prizòn.” Algu hopi interesante ta ku mi mes no a nota ku mi tabata smail. Mi tabata hasié sin ku mi sa.

Sin importá ki desishon korte tuma, kiko bo ta determiná pa hasi?

Mi ta komprondé ku Dios ta permití mi pasa den e situashon akí pa asina su nòmber por ser glorifiká. Aunke ku e enemigunan ta purba di intimidá Yehova su sirbidónan pa nan stòp di prediká, mi por mira ku e huesnan, e hendenan ku ta traha den korte i e fiskalnan ta realisando ku Testigunan di Yehova ta bon hende. P’esei mi ta determiná pa duna gloria na Yehova.

Aunke ku Dmitriy i Yelena ta separá for di otro atrobe pa motibu di prizòn, e pareha akí ta pone un bunita ehèmpel pa nos pasobra nan a hasi ‘e goso di Yehova nan fortalesa.’—Nehemías 8:10.

KOMUNIKADO