KENNY tabata traha pa un kompania di bolsa di balor eksitoso. El a kore un outo luhoso i tabata doño di un penthouse den un bario di hende riku di un siudat grandi. Komo parakaidista eksperensiá, el agusta e sensashon ku e tabata sinti ora e ta laga su kurpa kai for di un haltura di míles di meter. El a sintié satisfecho? Segun e korant The Wall Street Journal, Kenny a bisa: “Mi tin 45 aña, i mi bida no tin berdadero propósito . . . Mi bida ta bashí.”

Elyn a train duru pa e bira un bon skatsdó. El a logra yega tòp i a haña e fama ku e tabata deseá asina tantu. El a lamentá: “Pero na unda e supuesto felisidat ku mi mester a sinti a keda? Mi ta sinti mi teriblemente solitario. Ku tempu lo mi a bira bieu, i aunke mi tabata bon pará finansieramente, bida lo tabata hopi bashí si esaki ta tur loke tin.”

 Hideo tabata biba pa arte i e tabata konosí pa e manera ábil ku e tabata usa koló. E no tabata bende su obranan di arte pasobra p’e nan tabata muchu balioso. El a biba 98 aña i na fin di su bida el a duna mayoria di su obranan di arte na un museo. Henter su bida el a dediká na arte. Tòg, e no tabata satisfecho. E tabata pensa ku nunka lo e por a logra perfekshoná su arte.

Algun hende ta dediká hopi tempu, energia i rekurso na yuda hende. Tuma por ehèmpel un ehekutivo na Hollywood. Komo visepresidente di un di e kompanianan di sine mas grandi na Merka, e tabata biba den un área residensial eksklusivo i tabatin kontakto ku hendenan famoso. Un biaha e tabata ku fakansi na Cambodja. I ora e tabata kome na un café na Phnom Penh, un mucha muhé a aserk’é pa pidié plaka. El a dun’é un dòler i un limonada. E mucha muhé a keda masha kontentu. Pero e siguiente anochi e mucha tabat’ei atrobe. E ehekutivo a realisá ku un solushon duradero tabata nesesario.

Un aña despues, e ehekutivo akí a disidí di kambia di profeshon. El a laga e trabou di visepresidente ku e tabatin den e kompania di sine pa yuda hende pober na Cambodja. El a funda un skol ku ta perkurá pa mucha haña kuminda, edukashon i un dak riba nan kabes. Tòg, e tin un lucha konstantemente ku su sintimentunan: Di un banda e ta sinti un goso i satisfakshon pa loke e ta logra i di otro banda e ta sintié desesperá i frustrá pa motibu ku e problemanan ta montoná.

Tur e kuater personanan akí a pensa ku nan tabata sa kiko nan ke logra den bida. Tòg, nan a sinti un bashí ora nan a logra loke nan a traha asina duru p’e. Kiko abo ta biba p’e? Kiko ta na promé lugá den bo bida? Bo tin sigur ku lo bo no lamentá despues di e manera ku bo ta hiba bo bida?