Mari​—Reina di Desierto den Pasado

“MI KABES tabata bira di euforia ora ku mi a yega mi kamber e anochi ei despues ku ami ku mi kompañeronan a kaba di selebrá ki afortuná nos tabata,” e arkeólogo franses André Parrot, a kòrda. Na yanüari 1934, na Tell Hariri, serka di e pueblito chikitu Abu Kemal na oriya di Riu Eufrates na Siria, Parrot i su tim a koba i saka un estatua ku tabatin e inskripshon: “Lamgi-Mari, rei di Mari, sumo saserdote di Enlil.” Nan a keda hopi emoshoná ku loke nan a deskubrí.

Porfin nan a haña e stat Mari! Ki importansia e deskubrimentu aki tin pa studiantenan di Beibel?

Dikon e Stat Ta di Interes pa Nos?

Ounke tekstonan di antigwedat a papia di e eksistensia di Mari, su sitio eksakto sí a keda un misterio pa hopi tempu. Segun eskribanan di Sumer, Mari tabata e sede di un dinastia ku podisé na un tempu a dominá henter Mesopotamia. Siendo ku Mari a ser konstruí na oriya di Eufrates, e tabata stratégikamente situá na krusada di rutanan komersial ku a konektá Golfo Pérsiko ku Asiria, Mesopotamia, Anatolia i e Kosta Mediteráneo. Via e stat aki nan tabata transportá merkansianan—entre otro, palu, metal i piedra—ku tabata masha skars na Mesopotamia. Impuesto ku nan tabata kobra riba esakinan a hasi Mari asina riku ku  el a kuminsá ehersé poder riba e region. Sin embargo, e dominio aki a yega na un fin ora ku Sargon di Akad a konkistá Siria.

Pa mas o ménos 300 aña despues di Sargon su konkista, un seri di gobernadó militar a goberná Mari. Bou di nan mando, e stat a bolbe atkerí un midi di prosperidat. Sin embargo, durante e tempu di su último gobernante, Zimri-Lim, Mari a kuminsá pèrdè su poder. Zimri-Lim a purba konsolidá su imperio mediante un seri di konkista militar, tratado i aliansa matrimonial. Pero rònt di aña 1760 promé ku nos era, Rei Hammurabi di Babilonia a konkistá i destruí e stat, poniendo un fin na loke Parrot a yama “un di e sivilisashonnan mas avansá di e mundu di antigwedat.”

Ora e tropanan di Hammurabi a destruí Mari, nan a sirbi sin ku nan mes tabata sa komo un enorme yudansa pa e arkeólogo- i historiadónan moderno. Dor di a tumba e murayanan trahá di klenku di klei, nan a dera sierto edifisionan—na algun sitio bou di un kapa di sinku meter—i asina a protehá nan di e efektonan destruktor di tempu. Arkeólogonan a koba i saka ruinanan di tèmpel- i palasionan huntu ku un gran kantidat di artefakto i míles di inskripshon ku ta tira lus riba sivilisashon di antigwedat.

Dikon e ruinanan di Mari ta di interes pa nos? Pensa riba e tempu ku patriarka Abraham tabata na bida. El a nase na aña 2018 promé ku nos era, 352 aña despues di e gran Diluvio. Su generashon tabata e di dies generashon for di Noe. Riba òrdu di Dios, Abraham a bandoná su stat natal Ur, i a bai Haran. Na aña 1943, tempu ku Abraham tabatin 75 aña di edat, el a bandoná Haran pa bai e tera di Kánaan. Segun un arkeólogo italiano, Paolo Matthiae: “Abraham su biahe di Ur pa Yerusalèm [den Kánaan] a sosodé durante e periodo di Mari.” P’esei, e deskubrimentu di Mari ta di balor pa nos ya ku e por yuda nos visualisá e mundu den kua Dios su fiel sirbidó Abraham a biba. *—Génesis 11:10–12:4.

Kiko e Ruinanan Ta Revelá?

Religion a floresé na Mari meskos ku tabata e kaso otro kaminda na Mesopotamia. Nan tabata pensa ku hende tabatin e obligashon di sirbi e diosnan. Semper e hendenan tabata buska pa sa e boluntat di e diosnan promé ku nan a tuma kualke desishon importante. Arkeólogonan a haña restunan di seis tèmpel. Entre nan tabatin e Tèmpel di Leon (ku segun algun hende ta e tèmpel di Dagan, e Dagon ku Beibel ta menshoná) i e santuarionan di Ishtar, e diosa di fertilidat i tambe di e dios di solo Shamash. Den e tèmpelnan aki tabatin originalmente un estatua di e dios na ken e hendenan tabata hasi nan ofrenda- i súplikanan. Debotonan tabata pone figuranan sonriente di nan mes hasiendo orashon riba e bankinan den e santuario, pensando ku nan imágen lo a  sigui ku e akto di adorashon. Parrot a remarká: “E estatua [di e deboto], meskos ku e bela den adorashon katóliko awe, pero na un grado mas ekstenso tabata en realidat un supstituto di e kreyente.”

E deskubrimentu di mas espektakular den e ruinanan di Tell Hariri tabata e restunan di un inmenso kompleho di palasio ku tabatin e nòmber di su último okupante, Rei Zimri-Lim. E arkeólogo franses Louis-Hugues Vincent a yam’é “e hoya di arkitektura oriental di pasado.” El a abarká un espasio di mas ku 2,5 hèktar i e tabatin rònt di 300 kamber i patio. Asta den tempu di antigwedat nan tabata konsiderá e palasio aki un di e maravianan di mundu. “E tabata asina famoso,” segun Georges Roux den su buki Ancient Iraq (Irak di Antigwedat), “ku e Rei di Ugarit, situá na kosta di Siria, no a vasilá pa manda su yu hòmber bai 600 kilometer den interior ku e solo propósito di bishitá ‘e kas di Zimri-Lim.’”

Bishitantenan tabata drenta e palasio fortifiká via un solo entrada ku tabatin toren na kada banda, kaba nan tabata yega un patio espasioso. Mari su último rei, Zimri-Lim tabata sinta riba su trono riba un plataforma haltu. For di einan e tabata atendé asuntunan militar, komersial i diplomátiko, dikta sentensia i risibí bishitante- i embahadornan. Tabatin kamber disponibel pa huéspetnan ku e rei a entretené regularmente durante su banketenan ekstrabagante. Entre e platonan ku nan a sirbi tabatin karni di baka, karné, gazèl, piská i galiña sea hòrná, di grill òf herebé. Tur esaki nan tabata sirbi huntu ku sous pika di konofló i un  variedat di bèrdura i keshi. Pasaboka a konsistí di fruta fresku, seku òf kònfeit i bolo trahá den formanan elaborá. Pa sasia set di e huéspetnan tabata sirbi serbes òf biña.

E palasio tabatin fasilidatnan sanitario tambe. Nan a deskubrí bañonan ku tabatin tobo di terra-cotta i burakunan ku a sirbi komo w.c. E flur i e parti mas abou di e murayanan di e kuartonan aki tabata protehá ku un kapa di breu. Nan tabata laga awa sushi sali via goot trahá di klenku, i tin pipanan di klei hasí waterpruf ku breu ku ta funshoná ainda, despues di un 3.500 aña. Ora tres muhé di e ‘harem’ di kas real a haña un malesa fatal, e instrukshonnan tabata masha estrikto. Mester a isolá un muhé malu asina i ten’é den karentena. “Niun hende no tin mag di bebe for di su kòpi, kome na su mesa ni sinta riba su stul.”

Kiko Nos Por Siña for di e Archivonan?

Parrot ku su tim a deskubrí rònt di 20.000 tabla skirbí na spijkerschrift di e idioma akadio. E tablanan tabata karta- i dokumentonan atministrativo i ekonómiko. Solamente un tersera parti di e archivonan aki a ser publiká. Sin embargo, nan ta konsistí di 28 volúmen. Kuantu balor nan tin? Segun Jean-Claude Margueron, direktor di e Mishon Arkeológiko di Mari: “Promé ku a deskubrí e archivonan di Mari, nos no tabata sa kasi nada di e historia, institushonnan i bida diario na Mesopotamia i Siria na prinsipio di e segundo milenio. Debí na e tablanan aki hende por a skirbi kapítulonan kompletu di historia.” Manera Parrot a remarká, e archivonan “ta revelá similaridatnan sorprendente entre e pueblonan ku nan ta menshoná i loke e Tèstamènt Bieu ta konta nos di e periodo di e Patriarkanan.”

E tablanan ku nan a haña na Mari a tira lus tambe riba sierto pasashinan di Beibel. Por ehèmpel, e tablanan ta indiká ku tuma posishon di un enemigu su harem tabata “un echo fundamental di kondukta real n’e tempu ei.” E konseho ku e traidó Ahitofel a duna Rei David su yu hòmber Absalon pa tene relashon ku e konkubinanan di su tata di ningun manera no tabata algu nobo.—2 Samuel 16:21, 22.

For di 1933 padilanti, arkeólogonan a koba 41 biaha na Tell Hariri. Sin embargo te asina leu, nan a analisá solamente 8 hèktar di e total di 110 hèktar di Mari. Probablemente tin hopi kos fasinante mas pa deskubrí na Mari, e reina di desierto den pasado.

[Nota]

[Mapa na página 10]

(Pa e teksto den su formato kompleto, wak e publikashon)

Golfo Pérsiko

Ur

MESOPOTAMIA

Eufrates

MARI

ASIRIA

Haran

ANATOLIA

KÁNAAN

Yerusalèm

Laman Mediteráneo (Laman Grandi)

[Plachi na página 11]

Den e dokumento aki Rei Iahdun-Lim di Mari a broma di su obra di konstrukshon

[Plachi na página 11]

Deskubrimentu di e estatua aki di Lamgi-Mari a pone ku nan por a identifiká Mari ku siguridat

[Plachi na página 12]

Ebih-Il, e superintendente di Mari, hasiendo orashon

[Plachi na página 12]

Plataforma den e palasio, kaminda kisas e estatua di un diosa a para

[Plachi na página 12]

Ruinanan di Mari, ku ta mustra un konstrukshon di klenku di klei

[Plachi na página 12]

Un baño di palasio

[Plachi na página 13]

Piedra di viktoria di Naram-Sin, konkistadó di Mari

[Plachi na página 13]

Nan a haña rònt di 20.000 tabla skirbí na spijkerschrift den e ruinanan di e palasio

[Rekonosementu pa Potrèt na página 10]

© Mission archéologique française de Tell Hariri-Mari (Syrie)

[Rekonosementu pa Potrèt na página 11]

Dokumento: Musée du Louvre, Paris; estatua: © Mission archéologique française de Tell Hariri-Mari (Syrie)

[Rekonosementu pa Potrèt na página 12]

Estatua: Musée du Louvre, Paris; plataforma i baño: © Mission archéologique française de Tell Hariri-Mari (Syrie)

[Rekonosementu pa Potrèt na página 13]

Piedra di viktoria: Musée du Louvre, Paris; ruinanan di palasio: © Mission archéologique française de Tell Hariri-Mari (Syrie)