Informe di Proklamadónan di Reino

“Víktimanan Lubidá” Ta Ser Rekordá

NA PRINSIPIO di aña 2001, Haykaz, un Testigu di Yehova di 15 aña, a bishitá un ekshibishon titulá “Víktimanan Lubidá,” na Bern, Suisa. E ekshibishon tabata tokante e persekushon ku Testigunan di Yehova a sufri na man di e nazinan. Na final di e bishita, Haykaz a bisa: “Mi a tende di e trato i sufrimentu inhumano ku Testigunan di Yehova a eksperensiá bou di e régimen nazi, pero esaki tabata promé biaha ku mi a mira dokumentonan outéntiko i potrètnan di e tempu ei. E ophetonan ekshibí, e informenan di testigu i e komentarionan di historiadónan na e ekshibishon a hasi un impreshon profundo riba mi mente i kurason.”

Poko tempu despues, ora ku Haykaz mester a skirbi un scriptie pa su eksamen final na skol sekundario, el a skohe e tópiko “Testigunan di Yehova—E Víktimanan Lubidá di Nazismo.” Su maestro a bai di akuerdo ku e tópiko pero el a bisa Haykaz ku e mester inkluí literatura no-religioso den su fuentenan di informashon. Gustosamente Haykaz a bai di akuerdo ku esei. E di: “Mi a lesa algun buki tokante Testigunan di Yehova durante e era nazi i a skirbi un resúmen di nan. Tambe mi a deskribí mi impreshon personal di e ekshibishon ‘Víktimanan Lubidá.’ Mi scriptie di 43 página a inkluí plachi i potrèt.”

Na novèmber 2002, Haykaz a presentá su scriptie na kompañeronan di skol, maestronan, famia i amigunan. Despues, tabatin un seshon di pregunta i kontesta, ku a dun’é un oportunidat di splika su kreensianan basá riba Beibel. Ora ku un mucha muhé den ouditorio a puntr’é dikon el a skohe e tópiko aki, Haykaz a splika ku hopi buki di historia no ta menshoná Testigunan di Yehova i ku e tabata ke pa hende sa ku kuantu kurashi e Testigunan a defendé nan fe kristian. Kiko tabata e resultado di su presentashon?

Haykaz a konta: “Mi kompañeronan di skol a keda babuká. Nan no tabata sa ku Testigunan di Yehova komo grupo a ser persiguí ferosmente. I hopi di nan no tabata sa tampoko ku e Testigunan enkarselá den kamponan di konsentrashon nazi tabatin un símbolo spesial di identifikashon: un triángulo püs.”

Despues di su presentashon, Haykaz a haña mas oportunidat pa papia ku su kompañeronan di klas i por a splika nan e posishon basá riba Beibel ku Testigunan tin pa ku transfushon di sanger, alkohòl i moralidat. Haykaz a remarká: “Ningun di mi kompañeronan di klas no a hasi bofon di mi òf tenta mi.” Es mas, e skol a pone su scriptie den e biblioteka di skol. Esei sigur lo yuda pa hende no lubidá e posishon balente ku Testigunan di Yehova a tuma.