“Ami ku Sophia * tabatin mas ku 39 aña kasá ora Sophia a haña un malesa króniko ku finalmente a kousa su morto. Mi amigunan a sostené mi hopi bon i mi a sòru pa mi ta okupá. Pero pa un aña largu mi tabata kana rònt ku un doló inmenso. Mi tabata sinti ku mi no por a kontrolá mi emoshonnan. I te awe, kasi tres aña despues di su morto, de bes en kuando mi sa sinti un doló inmenso diripiente.”—Kostas.

Abo a yega di pèrdè un ser kerí? Si ta asina, probablemente lo bo a eksperensiá sintimentunan similar ku Kostas. Un di e kosnan mas doloroso ku ta kousa strès i tristesa den bida ta ora bo kasá, famia òf un bon amigu muri. Ekspertonan ku ta studia e doló inmenso ku morto ta kousa ta di akuerdo ku esei. Un artíkulo publiká den The American Journal of Psychiatry ta bisa ku “morto ta un pèrdida permanente i sumamente doloroso.” Debí na e doló insoportabel ku morto ta kousa, e persona ku ta sufri kisas ta puntra su mes: ‘Pa kuantu tempu lo mi sigui sinti asina? Lo mi por sinti mi felis atrobe? Kiko mi por hasi pa mi haña konsuelo?’

Nos lo kontestá e preguntanan ei den e edishon akí di Spièrta! Den e siguiente artíkulo nos lo papia tokante loke bo por spera si bo a pèrdè un ser kerí resientemente. Anto e artíkulonan despues di esei lo trata prinsipio di Beibel ku por yuda bo kalma bo doló.

Ta nos deseo sinsero ku e informashon den e revista akí lo konsolá i yuda tur hende ku ta sufriendo pa motibu ku nan a pèrdè un ser kerí.