Froude Ta un Problema Mundial

WAYNE tabata un hòmber enkantador i ku stèm suave i kariñoso. E tabata presis e tipo di hòmber ku Karen lo kier a kasa kuné. Karen a bisa: “E tabata tur loke semper mi a resa pidi p’e i a spera di haña. Tur hende ku a mira nos a pensa ku nos tabata perfekto pa otro. El a laga mi kere ku e tabata shete loko un belá ku mi.”

Sin embargo, tabatin un problema. Wayne a bisa Karen ku e tabata e di tres hòmber den rango di responsabilidat den servisio sekreto di Oustralia. E kier a retirá, pero nan no a permitié. E tabata sa muchu hopi di nan aktividatnan i nan lo a mat’é si e bai laga nan! Huntu e pareha a traha un plan. Nan lo kasa, pone nan sèn huntu, bandoná Oustralia i hui bai Canada. Karen a bende su kas i tur kos ku e tabatin, i a konfia Wayne ku e plaka.

E kasamentu a tuma lugá manera nan a plania. Wayne a hui for di e pais, pero Karen a keda atras, bandoná, ku ménos ku shete florin na banko. Poko despues el a haña sa ku e tabata víktima di un plan mañoso i kompliká, yen di mentira ku Wayne a trama ku e solo propósito pa estaf’é. Meskos ku un aktor, Wayne a hunga un ròl spesialmente diseñá pa e kai na smak di Karen. Su antesedente, su interesnan, su personalidat i su supuesto amor pa Karen tabata mentiranan pa gana su konfiansa, un konfiansa ku a kosta Karen mas ku 360.000 florin. Un funshonario polisial a deklará: “Karen a ser violá emoshonalmente. Asta si bo legumai e asuntu di e plaka, ta inkreibel kuantu daño un kos asina por kousa un hende.”

Karen a bisa: “Mi emoshonnan ta kibrá na wèrki. E hòmber ku el a aparentá di ta no tabata eksistí.”

Karen ta simplemente un di e kantidat inkontabel di víktimanan di froude i estafa rònt mundu. No ta konosí kuantu plaka estafadónan ta kita for di hende, ounke outoridatnan ta kalkulá ku e sifra ta laba den míles di miónes di florin i ku e ta bira mas tantu tur aña. Fuera di e pèrdida finansiero, víktimanan manera Karen ta sufri hopi doló emoshonal sabiendo ku un hende a probechá di nan, anto hopi biaha un hende ku nan a konfia.

 Mihó Prevení ku Lamentá

Froude òf estafa ta ser definí komo “un plan mañoso òf engaño deliberá pa optené plaka pa medio di pretenshon-, representashon- òf promesanan falsu.” Lamentablemente, mayoria hende ku kometé froude no ta ser kastigá, pasobra hopi biaha ta difísil pa proba ku di bèrdat ta trata di un kaso di engaño deliberá. Ademas, hopi estafadó konosé e burakunan ku tin den lei i ta probechá di nan: nan sa kon pa estafá hende den maneranan ku ta difísil òf imposibel pa hiba nan dilanti mesa bèrdè. Es mas, pa lanta un kaso kriminal kontra un estafadó ta kosta basta tempu i plaka. Esnan ku por lo general ta ser sentensiá pa nan krímen ta esnan ku a hòrta miónes di florin òf ku a hasi algu asina skandaloso ku nan ta akapará atenshon di henter komunidat. Asta ora nan gara un estafadó i kastig’é, probablemente ya el a gasta òf skonde e plaka ku el a estafá. Konsekuentemente, masha poko bes víktimanan ta risibí kompensashon pa e plaka ku nan a pèrdè.

Pues simplemente bisá, si nan estafá bo, probablemente lo no tin masha kos ku bo por hasi pa rekuperá loke bo a pèrdè. Ta mas mihó bo evitá di bira víktima ku buska un manera pa haña bo plaka bèk despues ku bo bira víktima. Un hòmber sabí a skirbi hopi tempu pasá: “Un hende prudente ta mira maldat i ta skonde, ma e simpelnan ta sigui bai, i ta haña kastigu pa esei.” (Proverbionan 22:3) E siguiente artíkulo lo splika maneranan den kua bo por protehá bo mes kontra froude òf estafa.