Simplemente pa Lusi Bunita?

DI UN ESKRITOR DI SPIÈRTA! NA SPAÑA

BO A yega di ripará ku ta manera kos ku paranan ta dediká hopi tempu na drecha i limpia nan plumanan? Nan ta pasa oranan largu tur dia aparentemente hasiendo nada otro ku okupá nan mes ku nan plumanan. Sea ta lora òf pelikan, mòfi òf flamingo, nan tur diariamente ta pasa dor di e ritual aki. Dikon? Ta simplemente nan ke lusi bunita?

E berdadero motibu ta algu di mas peso ku esei. Para tin ku dediká tempu na limpia i drecha nan plumanan meskos ku un avion mester haña mantenshon kabal. De echo, pa para, mantenshon di nan plumanan den bon kondishon ta un asuntu di bida i morto. Nan plumanan ta gasta lihé, i e manera ku nan ta drecha nan ku nan boka ta yuda tene e plumanan limpi i sin parasit, pero tambe esei ta mantené nan funshonnan airodinámiko.

Un di e kosnan ku ta parti di nan rutina diario di areglá nan plumanan ta ku nan ta “zip” bèk e haknan di pluma ku a sali for di otro. Ora e haknan ta bon será, e pluma ta  fungi mas efisiente dor ku e ta duna e para un èkstra forsa pa bula bai laira. Book of British Birds (Buki di Paranan Britániko) ta splika ku “dos grupo di pluma tin mester di atenshon spesial: e plumanan di bula kuné di e ala i e plumanan di ‘stür’ kuné di e rabu.”

Tambe paranan tin un lucha konstante pa mantené parasit bou di kontròl. E parasitnan chikí aki, fuera di forma un peliger pa e salú di e para, ta kome e plumanan tambe. Biólogonan a tuma nota ku paranan ku nan pik ta leshoná no por limpia nan plumanan bon i, komo resultado, nan tin mas parasit di pluma ku paranan normal. Pa fasilitá e kitamentu di parasit, tin algun para ta kubri nan mes ku vruminga, pasobra aparentemente e ásido di vruminga ta sirbi komo un insektisida efikas.

Por último, nan tin ku zeta e plumanan. Pa para di awa e zeta riba nan pluma ta hasi nan waterpruf, i tur para ta haña un mihó protekshon kontra wer si nan plumanan ta bon zetá. Di unda nan ta saka e zeta? Nan tin un klir spesial nèt riba nan rabu. E klir ei ta produsí zeta i waks, anto e para ku su santu pasenshi ta hunt’é riba su plumanan. Den e kaso aki tambe e plumanan di bula kuné ta haña atenshon spesial.

Pues anto, nos no tin ku kere ku ta pèrdè un para ta pèrdè tempu ora e ta sinta dediká tempu na su plumanan. Ta bèrdat ku e proseso aki ta yuda e para lusi bunita, pero tambe e ta manten’é salú. Den mundu di para, pa bo sobrebibí bo tin ku limpia i drecha bo plumanan.

[Diagram/Plachinan na página 24]

(Pa e teksto den su formato kompleto, wak e publikashon)

“Schacht”

“Haakjes”

“Baardjes”

“Baarden”

[Plachi]

Dor di pasa nan boka riba nan plumanan, para ta hak e komponentenan chikí di nan plumanan na otro manera un zip

[Rekonosementu pa Potrèt na página 23]

Cortesía del Zoo de la Casa de Campo, Madrid

[Rekonosementu pa Potrèt na página 24]

Pelikan: Foto: Loro Parque, Puerto de la Cruz, Tenerife; lora: Cortesía del Zoo de la Casa de Campo, Madrid